Да есте́ ве́дуще возлю́блении, я́ко в сий день есть предпра́зднество Рождества́ Пресвяты́я Влады́чицы на́шея Богоро́дицы и при́сно Де́вы Мари́и. Да собере́теся в це́рковь на вече́рнюю и на у́тренюю и на Литурги́ю: той бо день есть на́шему спасе́нию нача́ток, в той бо день Госпо́дь наш и Бог преступи́вшая за́поведи Его́ и в глубину́ зол впа́дшая и страсте́м порабо́щшаяся, хотя́ изба́вити от порабоще́ния диа́воля, и восхоте́ сни́ти за избавле́ние на́ше, и пакибытие́м обнови́ти нас, посла́в а́нгела Своего́ благовести́ти пр́а́ведникома Рождество́ Пресвяты́я Богоро́дицы, по пло́ти Ма́тере Го́спода на́шего Иису́са Христа́. Да и мы бра́тие ра́достно ча́юще доити́ сего́ дне, да потщи́мся до́брыми де́лы, просвети́м свети́льники на́ша м́илостынею и ве́рою и любо́вию, те́ми бо душа́ и те́ло просвеща́ется: ве́ра бо без дел мертва́ есть. Те́мже подо́бно есть к ве́ре и ми́лостыню с любо́вию стяжа́ти, та бо на не́бо возно́сит и Ца́рствию две́ри отверзает: ми́луяй бо ни́ща взаи́м дасть Бо́гови. И па́ки рече́: ми́лости хощу́, а не же́ртвы. Те́мже молю́ вы, не мимои́дем ни а́лчна, ни на́га, ни стра́нна, но прии́мем я́ко Самого́ Христа́ с любо́вию в дом свой, да и нас прии́мет Христо́с тех моле́ньми и ве́чное Свое́ Ца́рствие нам да́рует, е́же угото́ва лю́бящим Его́.