По шестой песни:
И поется кондак и икос (или мученичен, аще несть).Стихи́:
Имя́ше Созо́нт те́ло к томле́нию,
И ду́шу имы́й к еди́ному Спаса́ющему:
В седмы́й у́мре Созо́нт бие́мь оброще́нием све́тло.
Сей и́же в Силики́и злата́го истукан́а ру́ку отъе́м десну́ю и прода́сть, це́ну пода́сть ни́щим. Того́ ра́ди и ме́ста о́ного иге́мон мн́огим неведе́нием уму́чи. Святы́й сам себе́ опове́да, и а́бие бие́н бысть вельми́. И в сапоги́ желе́зны обуве́н, ну́димь бы́ше тещи́. И па́ки желы́гами бие́н быв, я́ко и косте́м телеси́ его́ содроби́тися, и та́ко дух в ру́це Божии предасть.
В то́йже день па́мять свята́го му́ченика Евпси́хия
Стихи́:
Благоду́шен Евпси́хие бя́ше к мечу́,
Ра́дуется, я́ко Созда́вшего ра́ди ду́шу жрет.
Сей бя́ше ро́дом и воспита́нием Кесари́йскаго гра́да, ца́рствующу Андриа́ну. Отцу́ его́ житие́ оста́вльшу, то́йже крести́вся, вся име́ния отца́ своего́ ни́щым раздаде. И ят быв каппадоки́йским кня́зем, и растя́жен, и по ре́бром стру́жемь, и в темни́цу вве́ржен. И явле́нием а́нгела оздраве́в. И па́ки пове́шен, и вельми́ стро́ган, и на коне́ц главу́ его́ отсеко́ша. Глаго́лют же и сие́, я́ко в кро́ви ме́сто, млеку́ и воде́ истещи́.
В то́йже день сло́во от Лимони́са о по́двизе
Пове́даше нам мона́х Афана́сий: я́ко прии́де ми не́когда мысль, глаго́лющи: Что бу́дет подвиза́ющымся зде? И бых в восто́рзе. И прии́де не́кто глаго́ля: Во след мене́ иди́. И веде́ мя на не́кое ме́сто све́та испо́лненое, и поста́ви мя при еди́нех две́рех, и́хже виде́ния несть мощи́ испове́дати. И слы́шах, я́ко мно́жества внутрь су́ща, и без числа́ хва́лящих Бо́га. И восклепа́вшым нам: Отвеща́ не́кто извну́трь, глаго́ля: Что у́бо хо́щете? Глаго́ла ему́ водя́ мя, вле́зти хо́щем зде. Он же отвеща́ глаго́ля: Не вхо́дит зде никто́же в ле́ности пребыва́яй. Но а́ще хо́щете вле́зти, иди́те, и подвиза́йтеся, ничто́же размышля́юще о я́же в ми́ре сем су́етнем.
В то́йже день поуче́ние на предпра́зднество Рождества́ Святы́я Богоро́дицы
Да есте́ ве́дуще возлю́блении, я́ко в сий день есть предпра́зднество Рождества́ Пресвяты́я Влады́чицы на́шея Богоро́дицы и при́сно Де́вы Мари́и. Да собере́теся в це́рковь на вече́рнюю и на у́тренюю и на Литурги́ю: той бо день есть на́шему спасе́нию нача́ток, в той бо день Госпо́дь наш и Бог преступи́вшая за́поведи Его́ и в глубину́ зол впа́дшая и страсте́м порабо́щшаяся, хотя́ изба́вити от порабоще́ния диа́воля, и восхоте́ сни́ти за избавле́ние на́ше, и пакибытие́м обнови́ти нас, посла́в а́нгела Своего́ благовести́ти пр́а́ведникома Рождество́ Пресвяты́я Богоро́дицы, по пло́ти Ма́тере Го́спода на́шего Иису́са Христа́. Да и мы бра́тие ра́достно ча́юще доити́ сего́ дне, да потщи́мся до́брыми де́лы, просвети́м свети́льники на́ша м́илостынею и ве́рою и любо́вию, те́ми бо душа́ и те́ло просвеща́ется: ве́ра бо без дел мертва́ есть. Те́мже подо́бно есть к ве́ре и ми́лостыню с любо́вию стяжа́ти, та бо на не́бо возно́сит и Ца́рствию две́ри отверзает: ми́луяй бо ни́ща взаи́м дасть Бо́гови. И па́ки рече́: ми́лости хощу́, а не же́ртвы. Те́мже молю́ вы, не мимои́дем ни а́лчна, ни на́га, ни стра́нна, но прии́мем я́ко Самого́ Христа́ с любо́вию в дом свой, да и нас прии́мет Христо́с тех моле́ньми и ве́чное Свое́ Ца́рствие нам да́рует, е́же угото́ва лю́бящим Его́.