Той бе алекса́ндрянин ро́дом, благове́рен и боя́ся Бо́га. Ят же быв и приведе́н ко кня́зю, и вопроше́н быв, испове́да себе́ христиа́на су́ща, и Христа́ И́стиннаго Бо́га со дерзнове́нием пропове́да. Те́мже и на дре́ве пове́шен и стро́ган бысть, и не отве́ржеся, но сопротивля́шеся и терпя́ше в му́ках. Тем и огне́м коне́ц восприя́т, и предстоя́щыя уча́ше си́це: «Бра́тие моя́ возлю́бленная, не всегда́ те́лу рабо́тайте, но па́че души́. И помина́йте я́ко от Бо́га вам дана́ есть, и сродна есть разу́мным и боже́ственым си́лам, да ту чи́сту Влады́це принесе́м». Сконча́ся же святы́й, и обре́тен бысть посреди́ огня́, ника́коже врежде́н.