Стихи́:

Изы́де дви́гся Иу́да в сеть:

Сни́де дви́гся Матфе́й:

Пове́сиша на дре́ве Матфе́я в девя́тый.

Той святы́й апо́стол Матфе́й бе еди́н от седми́десять учени́к Христо́вых, и́же и причте́н бе ко еди́ному на́десяте апо́столом, во Иу́ды ме́сто Искарио́тскаго. Пропове́да Ева́нгелие во вне́шней Ефио́пии. И мно́го от них томле́н быв, и мно́ги претерпе́в му́ки; Овогда́ влачи́мь бе и бие́н и стру́жемь и пожига́емь, оклевета́емь и уничижа́емь, оба́че укрепля́ющу его́ Христу́, с ра́достию му́ки приима́ше и терпя́ше. И с ми́ром у́спе о Го́споде, в ру́це Бо́гу ду́шу свою́ предаде́. Восприи́м Ца́рство угото́ванное ему́ от сложе́ния ми́ра.

Стихи́:

А́ще и те́ло Анто́ниево пе́пелом по́лно,

Но Дух светле́йшее исполня́ет стра́нныя.

Той бе алекса́ндрянин ро́дом, благове́рен и боя́ся Бо́га. Ят же быв и приведе́н ко кня́зю, и вопроше́н быв, испове́да себе́ христиа́на су́ща, и Христа́ И́стиннаго Бо́га со дерзнове́нием пропове́да. Те́мже и на дре́ве пове́шен и стро́ган бысть, и не отве́ржеся, но сопротивля́шеся и терпя́ше в му́ках. Тем и огне́м коне́ц восприя́т, и предстоя́щыя уча́ше си́це: «Бра́тие моя́ возлю́бленная, не всегда́ те́лу рабо́тайте, но па́че души́. И помина́йте я́ко от Бо́га вам дана́ есть, и сродна есть разу́мным и боже́ственым си́лам, да ту чи́сту Влады́це принесе́м». Сконча́ся же святы́й, и обре́тен бысть посреди́ огня́, ника́коже врежде́н.

И́же от десяти́х тала́нт пре́дан, и еди́н не́где или́ два удержа́вый, про́чая же отдав, неблагоразу́мен ра́ди отдая́ния мно́жайших познава́ется: но непра́веден и лихои́мец о мале́йших лише́нии облича́ется. Что же глаго́лю о лише́нии? Внегда́ и́же еди́н тала́нт вве́реный, та́же отда́в о́но са́мое соверше́но и це́ло е́же прия́л бе, зане́ не притяжа́ к да́нному, осужда́ется. И́же де́сять лет отца́ почты́й, еди́ну же я́зву по́слежде возложи́в ему́ то́чию, не я́ко благода́тель почита́ется, но я́ко отцеуби́йца осужда́ется. Ше́дше у́бо рече́ Госпо́дь: «Научи́те вся язы́ки, уча́ще их не о́ва у́бо блюсти́, о о́вех же не ради́ти: но блюсти́ вся ели́ка запове́дах вам». И апо́стол после́дованне пи́шет: «Ни еди́но же ни в чесо́м же даю́ще претыка́ние, я́ко да не про́чно бу́дет служе́ние. Но во всем представля́юще себе́ я́ко Бо́жия слуги́». А́ще бо не вся нам ко спасе́ния ра́зуму ну́ждни бы́ша, ниже́ напи́саны бы́ли бы́ша вся за́поведи, ниже́ вся храни́мы бы́ти рече́нны бы́ша? Что ми по́льза от ине́х исправле́ний, а́ще хощу́ уро́да наре́к брат пови́нен бы́ти гее́нне? Что же по́льза и́же от мно́гих свобо́ды, иже от еди́наго держи́му в рабо́ту: творя́й бо рече́ грех, раб есть греху́. Что же ли прибы́ток от мно́гих безстра́стия, и́же еди́ною стра́стию растлева́ющему те́ло? Да у́бо рече́, мно́жествия христиа́нская не храня́ща вся за́поведи, без успе́ха ли и́мут хране́ние? К сему́ блаже́ннаго Петра́ воспомяну́ти добро, и́же по толи́цех у́бо исправле́ниих, такове́х же блаже́нствиих, о еди́ном то́кмо слы́шащу: «А́ще не умы́ю тебе́, не и́маши части со Мно́ю». Оставля́ю глаго́лати я́ко ниже́ о́но са́мое разлене́ния, и преоби́дения имя́ше указа́ния, но че́сти и благогове́инств явле́ние. Но у́бо егда́ рече́т кто: «Пи́сано есть: всяк и́же а́ще призове́т И́мя Госпо́дне, спасе́тся. Те́мже довле́ет и са́мое призва́ние И́мене Госпо́дня спасти́ призыва́ющаго». Но да слы́шит и той апо́стола глаго́люща: «Ка́ко у́бо призову́т, в Него́же не ве́роваша?». А́ще ли ве́руеши, слыши Го́спода зову́ща: «Не всяк глаго́ляй ми, Го́споди, Го́споди, вни́дет в Ца́рство небе́сное: но творя́й во́лю Отца́ Моего́, И́же есть на небесе́х». Иде́же и во́лю Бо́жию де́лаяй, и не я́коже хо́щет Бог, ниже́ в ра́зуме и́же к Бо́гу любо́вь сию́ творя́, неуспе́шно и́мать и́же о сей тща́ние, по гла́су Самого́ Го́спода ре́кшаго: «Я́ко творя́т за е́же ви́детися от челове́к, ами́нь глаго́лю вам: я́ко восприе́млют мзду свою́».

Послу́шайте бра́тие за́поведи Госпо́дни, е́же рече́ к зако́ннику. Сия́ есть пе́рвая за́поведь вели́кая: да лю́биши отца́ своего́ и ма́терь, да бла́го тебе́ бу́дет, и бу́деши долголе́тен на земли́. И́же бо чтет роди́теля своя́ и слу́шает повеле́ния ею́, сей очи́стит грехи́ своя́, и от Бо́га просла́вится. А́ще кто озло́бит роди́теля своя́, сей пред Бо́гом греши́л, и от люде́й про́клят. И́же бие́т отца́ или́ ма́терь, от Це́ркви да отлучи́тся, и сме́ртию да у́мрет. Пи́сано бо есть, о́тча кля́тва, непокорли́ва сы́на су́шит, а ма́терня искорени́т. Сын бо рече́ непокори́в, в па́губу бу́дет. И́же бо гневи́т отца́, или́ досажда́ет ма́тери, и мни́тся не согреша́я Бо́гу, сей соо́бщник есть нечести́вым. О ни́хже рече́ Иса́ия: «Да во́змется нечести́вый и не у́зрит сла́вы Госпо́дни». И п́аки: «О́ко намиза́ющееся отцу́, и укоря́ющаго ста́рость ма́терню, да исклюю́т вра́нове, и ско́ро изъяде́н бу́дет орлы́». Чтяй отца́, возвесели́тся о ча́дех, и в день печа́ли изба́вит его́ Госпо́дь, и моли́тву его пода́ст ему́. Послу́шаяй Бо́га, поко́ит ма́терь свою́ до́бре. Угожда́я своему́ отцу́, мно́го во благи́х поживе́т. Те́мже бра́тие, де́лом и сло́вом угожда́йте роди́телем, да на́йдет на вы благослове́ние от них. Благослове́ние бо о́тчее утвержда́ет до́мы ча́дом, и моли́тва ма́терня спасе́т от напа́сти. Бра́тие заступа́йте ста́рость отца́ ва́шего, а́ще и оскуде́ет ра́зумом, не безче́ствуйте е́го в се́рдцы свое́м. Ми́луй отца, моли́тва о́тча не забу́дется пред Богом. И не забыва́йте труда́ ма́терня, я́же о ча́дех печа́ль и боле́знь. Не глаго́ли уже́ мно́го сотвори́х им оде́ждею и пи́щею, но не мо́жеши их роди́ти, и та́ко о них боле́ти я́коже они́ о тебе́. Те́мже со стра́хом и раболе́пно служи́те и́ма, да зде до́бре поживете́, и в бу́дущем ве́це насладите́ся. Бо́гу на́шему сла́ва, ны́не и при́сно и во ве́ки веко́в. Ами́нь.