Та бя́ше от гра́да Мефими́йскаго, житие́м мона́шица, из де́тскаго во́зраста. И от свои́х сро́дник вдана́ бы́вши в монасты́рь деви́ческий. И осмонадеся́тым ле́том бы́вши, оде́явшися в схи́му, и в бли́жнюю весь изы́де свою́ сестру́ целова́ти. О́ной же но́щию обте́кши Крит, его́же содержа́ше пле́ном Они́сион, вся о́ны и сестру́ ея́ похвати́ша. И око́ло у́бо прибли́жишася, и о́строву тому́, и́же приве́дше, плене́ным уцене́ния разложи́ша. Феокти́стия же тай к лу́гу обрати́вшися, и не обре́тена бы́вши. И та у́бо от тогда́ та́мо пребы́вши, гла́дом, и зимо́ю, и ва́ром мно́гим томи́ма, водо́ю и зе́лием ди́виим пита́ющися, и ники́м же ви́дима. Дости́гши три́десяти и пяти́ лет, Бо́гу еди́ному бесе́дущи, Ему́же живя́ше, и Пречи́стей Влады́чице на́шей Богоро́дице.

И мину́вшым три́десяти и пяти́м ле́том, по не́коему разсмотре́нию лове́ц не́кий лов улови́в. Та́же отлучи́вся свои́х дружи́н, и следя́ вни́де в не́кую це́рковь Богоро́дичную, бя́ше бо пу́сто ме́сто. И помоли́вся, и ма́ло возни́к, ви́де от десны́я стра́ны святы́я Трапе́зы, я́ко изгре́бу ве́тром паха́ему, или́ протя́ж паучи́нную. Да я́ко восхоте ́вни́ти и уве́дети я́вльшееся, слы́ша глас глаго́лющь: Свято́й челове́че, не приближа́йся, стыжу́бося на́га бы́вши яви́тися тебе́. О́ному же устра́шшуся, и тре́петом одержи́му, помы́сли бежа́ти, испра́вишабося бя́ху власы главы́ его́, и сотвори́шася остре́йши те́рния. Не́когда же в себе быв, и вопроси́ ю́: Кто и отку́ду еси́? Она́ же рече́: Молютися, верзи поня́ву не́кую, и покры́вшися глаго́лати не обленюся. И он абие повеле́нное сотвори́. Она́ же я́ко прия́т поняву, и обвившися, и кресто́м себе́ огради́вши изы́де к ловцу́. Бя́ше же виде́ние же́нское, явля́яся па́че челове́ка, власы́ белы́, о́браз почерне́л, ко́жа то́чию содержа́щи соста́вы косте́й: Про́чее же я́ко сень бя́ше. Сказа́вши пе́рвое я́же о себе, приложи́ же и сие с мольбо́ю рещи́ к ловцу́, е́же принести́ ей часть свята́го Те́ла Христо́ва. Муж же шед не облени́вся, принесе ей боже́ственныя Та́йны. И она́ помоли́вшися причасти́ся, и благодаре́ние Бо́гу возда́вши. Он же па́ки на лов изше́д, и возврати́вся обре́те ю́ ме́ртву лежа́щу. И якоже бяше ему возмо́жно, ископа́в зе́млю, и помоли́вся, положи блаже́нную о́ну и достохва́льную жену́ на ме́сте том, иде́же ю́ обре́те: и отъи́де сла́вя Бо́га.