Стихи́:

Жи́зни пра́ведно пребыва́ющей уподо́бльшися Матро́на

И я́ко в житии́ пожи́вши досто́йно,

В девя́тый гроб Матро́ну прия́т ме́стно.

Та бе́яше при Лве вели́цем цари́ от Пе́ргия Памфили́нскаго и, совоку́пльшися му́жеви и еди́ному отроча́ти ма́ти бы́вши, прихо́дит в Константи́нь град со свои́м му́жем, пятна́десяти ле́том су́щи. И позна́вшимся с не́которою деви́цею Евге́ниею, и той поще́нию поревнова́вши, не отступа́ше от це́ркве, но раня́щи посто́м и бде́нием тща́щися на благочти́вое е́же к Бо́гу раче́ние тепле́йшее ражже́гшися, преда́вши дщерь свою́ зна́емей не́коей жене́ и́менем Суса́не, сама́ же му́жескую наложи́вши оде́жду, и в монасты́рь свята́го Васи́лия прихо́дит, и преобрази́вшися ка́женическим о́бразом и прия́та бы́вши игу́меном и совокупи́ ю́ пребыва́ти с мни́хи. Преподо́бному же открове́нием е́же о ней уве́девшу, посла́в в Енеси́йский град в монасты́рь же́нский. И отту́ду прехо́дит во Иерусали́м, та́же и на Сина́йскую го́ру, та́же в Вири́т, во и́же моли́твою в безво́дне ме́сте во́ду изве́д. Мно́ги же и нахо́ды бесо́вская подъя́вши, и от не́коего явле́ния а́бие до́йде в Константи́нь град, я́вльшися свято́му Васиа́ну. И от него́ повеле́но ей бысть пребыва́ти в хра́ме, и́же во и́мя его́ нарече́тся и досе́ле. Жи́вши стом ле́том дости́гши, с ми́ром ко Го́споду отъи́де ра́дующися.

Стихи́:

Ко́ньми Ониси́форе к Бо́гу теки́й,

И́маши слугу́, сти́чуща ти.

Сей святы́й Порфи́рие и Ониси́фор, гоне́нию дости́гшу, я́ти бы́вше, я́ко христиа́ни, и веде́ни на суди́ще и ста́ша о́стро и без боя́зни, испове́дающе Христа́ И́стиннаго Бо́га, не́бу же и земли́ Творца́, и такова́го ра́ди испове́дания бие́ние ра́нам мно́гим претерпе́вше и му́чени разли́чно по всему́ телеси́, та́же на сковрада́х раждеже́ных положе́ни бы́вше, во всех же сих внима́юще ве́чных благ, а́ще и от безбо́жных стражда́ху, но Бо́гом облегчев́аеми бе́яху. Лю́тии же они́ злочести́вии, ви́девше неврежде́ны святы́я, во мно́жайше неи́стовство разгоре́шася, и привяза́вше честны́я но́ги их к коне́м ди́виим, и ко́ни от во́ин гони́ми на мно́гия часы по те́рнию и дра́чию и острых ме́стех, и телеса́ их растерза́ша. Тогда́ не́цыи христиа́не, тай взе́мше святы́я их мо́щи, положи́ша в ве́си Иангиа́нстей, сла́вяще и благодаря́ще Бо́га.

Блаже́нный Иоа́нн нарече́нный Ко́лов послуша́ния ра́ди, юн сый оста́вив мир, и отше́д в скит с при́сным бра́том свои́м Дании́лом, и бы́ста мона́ха. И се́дша в ке́ллии подвиза́стася, посто́м и моли́твами тружда́ющеся. Во еди́н же от дней рече́ Иоа́нн к Дании́лу бра́ту своему́: Аз не хощу́ о телеси́ пещи́ся, ни пи́ти же ни я́сти бра́шна огне́м устро́ена: но я́ко а́нгел без печа́ли в пусты́ни хощу́ пребыва́ти. И снем ри́зы и́де наг из ке́ллии. В ту же нощь бысть мраз вели́к, и не возмо́г терпе́ти, возврати́ся в ке́ллии, и прилежа́ше в две́ри толки́й. И хотя́ брат наказа́ти его́, едва́ отвеща́: Кто еси́ та́ко прилежа́й? И рече́: Аз Иоа́нн брат твое́й, не моги́й мра́за терпе́ти, возврати́хся послужит́и тебе́. И глаго́ла: Не отве́рзу, отъиди́ де́моне и не блазни́ мене́: мой брат а́нгел есть, и о телеси́ неради́т, ни пи́щи тре́бует: да я́ко пока́яся, отве́рз прия́т его́. И глаго́ла ему́: Бра́те, плоть и́маши, подоба́ет ти страда́ти оде́жды ра́ди и пи́щи.

И посе́м и́де к не́коему вели́ку ста́рцу фиве́янину, и́менем Па́влу, и рабо́таше ему́: и уча́ше его́ о послуша́нии. И яко обеща́ся при всем послу́шати старца. Взем же ста́рец су́хо дре́во, потче́ на горе́, и рече́ ему: По вся дни напоя́й корча́гою воды́, до́ндеже плод сотвори́т. Бе же дале́че их вода́, до ве́чера и́ти, и приити́ зау́тра. И по три ле́та сотвори́ се, и оживе́ дре́во, и принесе́ плод его́. Ста́рец же в це́ркви бра́тии глаго́ля: Приими́те и яди́те, се есть плод послуша́ния. И па́ки рече ему старец: На о́ном ме́сте ви́дехом моты́ла гие́ны, иди́ принеси́ ми я́. Бе бо ту гие́на зла живу́щи, умерщвля́ющи челове́ки и скоты́. И рече́ Иоа́нн: Что сотворю́ о́тче, а́ще на мя прии́дет гие́на зверь? Ста́рец же оскла́бився рече́: А́ще на тя прии́дет, свяжи́ ю́, и приведи́ се́мо. И́де же ве́чер та́мо Иоа́нн, и се прии́де гие́на зверь. Он же по словеси́ ста́рчу нача́ гони́ти ю́ глаго́ля: Оте́ц ми рече́ связа́ти тя. И им ю́ связа́. И седя́ше скорбя́ ста́рец ждый его́. И се прии́де ведый гие́ну свя́зану. Ви́дев же ста́рец диви́ся, и хотя́ смири́ти его́, да не возвели́чится. И взем па́лицу бия́ его́ глаго́ля: Пса ли еси́ блу́де приве́л се́мо? Разреши́ ю́. И а́бие оте́ц отпусти́ ю́.

Стихи́:

Лезви́тское воспита́ние деви́ца Феокти́стия,

Зижди́телю Бо́гу приве́дшися неве́ста прекра́сная.

Та бя́ше от гра́да Мефими́йскаго, житие́м мона́шица, из де́тскаго во́зраста. И от свои́х сро́дник вдана́ бы́вши в монасты́рь деви́ческий. И осмонадеся́тым ле́том бы́вши, оде́явшися в схи́му, и в бли́жнюю весь изы́де свою́ сестру́ целова́ти. О́ной же но́щию обте́кши Крит, его́же содержа́ше пле́ном Они́сион, вся о́ны и сестру́ ея́ похвати́ша. И око́ло у́бо прибли́жишася, и о́строву тому́, и́же приве́дше, плене́ным уцене́ния разложи́ша. Феокти́стия же тай к лу́гу обрати́вшися, и не обре́тена бы́вши. И та у́бо от тогда́ та́мо пребы́вши, гла́дом, и зимо́ю, и ва́ром мно́гим томи́ма, водо́ю и зе́лием ди́виим пита́ющися, и ники́м же ви́дима. Дости́гши три́десяти и пяти́ лет, Бо́гу еди́ному бесе́дущи, Ему́же живя́ше, и Пречи́стей Влады́чице на́шей Богоро́дице.

И мину́вшым три́десяти и пяти́м ле́том, по не́коему разсмотре́нию лове́ц не́кий лов улови́в. Та́же отлучи́вся свои́х дружи́н, и следя́ вни́де в не́кую це́рковь Богоро́дичную, бя́ше бо пу́сто ме́сто. И помоли́вся, и ма́ло возни́к, ви́де от десны́я стра́ны святы́я Трапе́зы, я́ко изгре́бу ве́тром паха́ему, или́ протя́ж паучи́нную. Да я́ко восхоте ́вни́ти и уве́дети я́вльшееся, слы́ша глас глаго́лющь: Свято́й челове́че, не приближа́йся, стыжу́бося на́га бы́вши яви́тися тебе́. О́ному же устра́шшуся, и тре́петом одержи́му, помы́сли бежа́ти, испра́вишабося бя́ху власы главы́ его́, и сотвори́шася остре́йши те́рния. Не́когда же в себе быв, и вопроси́ ю́: Кто и отку́ду еси́? Она́ же рече́: Молютися, верзи поня́ву не́кую, и покры́вшися глаго́лати не обленюся. И он абие повеле́нное сотвори́. Она́ же я́ко прия́т поняву, и обвившися, и кресто́м себе́ огради́вши изы́де к ловцу́. Бя́ше же виде́ние же́нское, явля́яся па́че челове́ка, власы́ белы́, о́браз почерне́л, ко́жа то́чию содержа́щи соста́вы косте́й: Про́чее же я́ко сень бя́ше. Сказа́вши пе́рвое я́же о себе, приложи́ же и сие с мольбо́ю рещи́ к ловцу́, е́же принести́ ей часть свята́го Те́ла Христо́ва. Муж же шед не облени́вся, принесе ей боже́ственныя Та́йны. И она́ помоли́вшися причасти́ся, и благодаре́ние Бо́гу возда́вши. Он же па́ки на лов изше́д, и возврати́вся обре́те ю́ ме́ртву лежа́щу. И якоже бяше ему возмо́жно, ископа́в зе́млю, и помоли́вся, положи блаже́нную о́ну и достохва́льную жену́ на ме́сте том, иде́же ю́ обре́те: и отъи́де сла́вя Бо́га.