Ве́дуще бра́тие, я́ко в сий день есть предпра́зднество Воздви́жения честна́го Креста́ Христо́ва, на не́мже пригвозди́ Госпо́дь наш пра́дедную кля́тву, я́же бысть преступле́нием, е́же сове́том диа́волим и вкуше́нием дре́вним, и́мже испадо́хом из поро́ды. Того́ ра́ди Влады́ка Госпо́дь наш умерщвя́я стра́стное вкуше́ние, на Кресте́ пригвозди́ плоть, не вку́шшу го́рькаго вку́са, да безстра́стием введе́т живо́тное дре́во. Его́же жела́юще, подви́гнемся бра́тие, и очи́стивше себе́ душа́ и телеса́, приступи́вше к животворя́щему Кресту́ и поклони́мся и чи́стыми устна́ми целу́ем. Той бо очища́ет грехи́ на́ша и душа́ освяща́ет, и тем неду́зи на́ши исцеля́ются, того́ бе́си бе́гают, тем держа́ва а́дова сокруши́ся и Ца́рство Бо́жие отве́рзеся всем ве́рою покланя́ющимся ему́.