По шестой песни:
И поется кондак и икос (или мученичен, аще несть).В то́йже день па́мять свята́го Корни́лия со́тника
Стихи́:
Жи́зни неве́рнейшей Корни́ла изведе́ши к ве́ре нача́льней
И́же из язы́к, Христе́ мой.
Сей бе́яше во времена́ святы́х апо́стол, житие́ чи́сто проходя́. И ви́де а́нгела, наставля́юща его́, и́же призва́ти апо́стола Петра́ и от него́ слы́шати я́ко подоба́ет. И Петру́ к нему́ прише́дшу, и сло́во Госпо́дне к нему́ и прише́дшим пове́да. И огласи́в его́, и крести́ и́, и Скеуси́йскому гра́ду того́ вруча́ет. И и́хже та́мо обре́те, благода́тию Христо́вою всех крести́. И того́ самого́ крести́ кня́зя Дми́трия, со всем до́мом ве́ровавша. И тем апо́стольское житие́ пожи́в, ко Го́споду отъи́де.
В то́йже день па́мять святы́х му́ченик Гордиа́на, Макро́вия, и Илии́, Зо́тика, Лукиа́на и Уаллериа́на
Си́и пострада́ша при Ликини́и. Бя́ше же Гордиа́н от Каппадо́кии: Макро́вий же от Пафлаго́нския страны, млади су́ще во́зрастом, но в Христо́ве ве́ре соверше́ни. И си́и сконча́ни бы́ша, якоже пре́жде писа́ся. Зо́тик же, и Илия́, и Лукиа́н, Протисиме́йска гра́да. Повеле́нием же Макси́ма кня́зя, по мно́гих му́ках мече́м сконча́ни бы́ша. И Уаллериа́н же на гро́бе святы́х пла́ча го́рько, и рыда́я, сконча́ся.
В то́йже день свята́го му́ченика Иулиа́на презви́тера, близ Агки́р Гала́тских
При Ликини́и царе́, бя́ше гоне́ние вели́ко на христиа́ны. И близ бе Агки́ры Гала́тския, презви́тер стар, благогове́ин, Бо́гови стражда́, и́менем Иулиа́н, от страны́ глаго́лемыя Кронту́с, и́же гоне́ния ра́ди со ине́ми четыредесятию́ и девятию́ бежа́ в го́ру ле́сну, и в пеще́ре та́йне кры́яхуся. Бы́вшым же им не́колико вре́мя. Бя́ше же верху́ горы́ куми́рница е́ллинския боги́ни, я́же глаго́лется Ека́ти. Иска́ху же святы́х, и не обрето́ша. Святи́и же по вся дни еди́н ко́ждо взима́я во́ду от бли́жняго исто́чника, и напая́ше про́чыя. Прилучи́ся же свято́му Иулиа́ну налия́ти воды́. Ви́девше же не́цыи от е́ллин, и́мше и́, и ведо́ша ко кня́зю. И вопроше́н быв о про́чих, и не испове́дав. И прия́ на главе́ свое́й чи́стое о́лово разжже́но, и посе́м посе́чен бысть.
В то́йже день свята́го му́ченика Феодо́та
Свята́го му́ченика Феодо́та христиа́на су́ща, и богоче́тца, гове́йна, и добре боя́щася Бо́га, и со дерзнове́нием испове́дающа Христа́, над все́ми су́ща Бо́га, александри́йстии лю́дие идолослужи́телие су́ще собра́вшеся, я́ша его́. И пе́рвое бие́н бысть кре́пко. Посе́м терно́в вене́ц возлож́иша ему́ на главу́, и бию́ще его́ зело́, водя́ще по гра́ду свя́зана, и смея́хуся ему́ руга́ющеся. Посе́м вве́ржен в мо́ре, и ветр лего́к на су́шу изнесе́ его́. И па́ки ят быв предста́ кня́зю, и мно́го му́чен быв, сла́вя Бо́га, и благода́ть воздая́ свято́му и́мени Иису́с Христо́ву, и до после́дняго издыха́ния. И посе́м усе́чен бысть, и погребе́н ве́рными, и богобоя́знивыми му́жи во Александри́йстем гра́де, исцеле́ния творя́ и до ны́не мно́га ве́рным.
P.S. Вероятно имеется в виду Феодор Александрийский (память 12 сентября)
В то́йже день поуче́ние пред Воздви́жением честна́го Креста́
Ве́дуще бра́тие, я́ко в сий день есть предпра́зднество Воздви́жения честна́го Креста́ Христо́ва, на не́мже пригвозди́ Госпо́дь наш пра́дедную кля́тву, я́же бысть преступле́нием, е́же сове́том диа́волим и вкуше́нием дре́вним, и́мже испадо́хом из поро́ды. Того́ ра́ди Влады́ка Госпо́дь наш умерщвя́я стра́стное вкуше́ние, на Кресте́ пригвозди́ плоть, не вку́шшу го́рькаго вку́са, да безстра́стием введе́т живо́тное дре́во. Его́же жела́юще, подви́гнемся бра́тие, и очи́стивше себе́ душа́ и телеса́, приступи́вше к животворя́щему Кресту́ и поклони́мся и чи́стыми устна́ми целу́ем. Той бо очища́ет грехи́ на́ша и душа́ освяща́ет, и тем неду́зи на́ши исцеля́ются, того́ бе́си бе́гают, тем держа́ва а́дова сокруши́ся и Ца́рство Бо́жие отве́рзеся всем ве́рою покланя́ющимся ему́.