Рече́ блаже́нный Иоа́нн Златоу́стый: седя́щу ти в почита́нии слове́с Бо́жиих, пре́жде моли́ся Бо́гу да отве́рзет ти о́чи серде́чнеи. Да не то́кмо чте́ши напи́саных, но да и твори́ши, да не в грех себе́ святы́х жития́ и словеса́ чтем. Егда́ же чте́ши приле́жно и всем се́рдцем, со мно́гим прилежа́нием прочита́й словеса́, а не тщи́ся листы́ то́кмо обраща́ти. А́ще ти есть тре́бе, не лени́ся, но и двокра́ты прочита́й словеса́, да разуме́еши си́лу их. Егда́ же хо́щеши чести́ или́ послу́шати ино́го чту́ща, то помоли́ся Бо́гу си́це глаго́ля: «Го́споди Иису́се Христе́, отве́рзи ми о́чи серде́чнеи услы́шати сло́во Твое́ и разуме́ти е́ и твори́ти во́лю Твою́, я́ко пришле́ц есмь аз на земли́. Не скрый от мене́ за́поведей Твои́х, но откры́й о́чи мои́ да разуме́ю чудеса́ зако́на Твоего́. Скажи́ ми безве́стная и та́йная прему́дрости Твоея́, на Тя упова́ю, Бо́же мой. Да те́ми просвети́ши ум и смысл све́том ра́зума Твоего́, не то́кмо чести́ напи́саных, но и твори́ти. Да не во грех себе́ святы́х жития́ и словеса́ почита́ю, но во обновле́ние и просвеще́ние, и во святы́ню, и во спасе́ние души́ мое́й, и в провожде́ние жи́зни ве́чныя. Я́ко Ты еси́ Просвеще́ние лежа́щим во тме, и от Тебе́ есть вся́ко дая́ние бла́го и всяк дар соверше́н. [Ами́нь.]»