От че́тьих мине́й: Свята́я Ариа́дна му́ченица ве́ровавши во Христа́ и чту́щи И́, бе же раба́ Тере́нтила не́коего старе́йшины Примеси́йскаго гра́да, страны́ Фриги́йския. Во еди́н же от дний рождеству́ твори́му сы́ну господи́на ея́. Пону́ждена бысть в тре́бище и́дольское вни́ти и спра́здновати с ни́ми. Не покори́вши же ся, бие́на бысть. И вве́ржена бысть в темницу, и гладом уморя́ема кре́пко. Посе́м ведена́ бысть ко кня́зю страны́ тоя́. И пове́шена бы́вши, стро́гана бысть. И пу́щена бы́вши от му́ки на го́ру тече́. Хотя́щим же гоня́щим пости́гнути ю́. Помоли́ся изба́витися от них, и разсе́дшуся ка́мене. Повеле́нием Бо́жиим вни́де вонь. И па́ки соступи́ся, бысть неви́дима. И та́ко скры́ся.

От проло́га: Та пострада́ при Андреа́ни, и Антони́не цари. Раба́ бы́вши не́коего Ферти́ла старе́йшаго Примиси́йскаго гра́да Фриги́е, Салута́рие. И зане́же не восхоте́вши ей спра́здновати о рожде́нии отроча́ти господи́на своего́ в це́ркви и́дольстей, стро́гана бысть вельми́ и отпу́щена, па́ки же иге́моном гони́ма бы́вши. И ка́мени не́которому прибли́жившися и помоли́ся изба́влена быти. И боже́ственым манове́нием ка́мени разсе́дшуся, и вни́де внутрь. И па́ки состу́пльшуся ему́. Гони́телие же явле́нием а́нгельским, свои́ми копии́ сва́дишася, са́ми ся избодо́ша и погибо́ша.