Сей блаже́нный оте́ц наш Арка́дий бе нищь, юн во́зрастом оста́ви роди́теля и возлюби́ мни́шеское житие́. И и́де в монасты́рь свята́го Гео́ргия, и, в благогове́нии же и целому́дрии живу́щу ему́, поста́влен бысть от игу́мена своего́ диа́коном, та́же презви́тером. И не по коли́це лет поста́влен бысть игу́меном. Па́ки же от за́висти и наважде́ния диа́воля, изгна́н бысть от монастыря́. Прише́дшу же из Руси́ кня́зю Изясла́ву и возлюби́вшу житие́ его́, и поручи́ ему́ ме́сто свята́го Пантелеи́мона. И пото́м изы́де на пу́сто ме́сто, и созда́ це́рковь Святы́я Богоро́дицы, я́же стои́т и до сего́ дни. По изволе́нию же Бо́жию изведе́н бысть отту́ду на епископи́ю, и поста́влен бысть епи́скопом от митрополи́та Константи́на всея́ Руси́, при кня́зи Святосла́ве, ме́сяца а́вгуста в шесты́й. И пожи́ о Христе́ лет о́семь во епископи́и, в до́бре испове́дании и целому́дрии, мно́ги утверди́в и наста́вив на ра́зум. И посе́м сконча́ся в ле́то шесть ты́сящь шестьсо́т се́дмьдесять пе́рвое, инди́кта втора́го, ме́сяца септе́мврия в осемьна́десятый, в сре́ду по вече́рнии. А зау́тра в девятна́десятый погребено́ бысть те́ло его́ честно́е с фимиа́ном и канди́лы, со свеща́ми и людми́ со всем при́чтом при кня́зи Святосла́ве, на па́мять ве́рным челове́ком. Да моли́твами его́ получи́м оставле́ние грехо́в. Ами́нь.