Сей преподо́бный и богоно́сный оте́ц наш Дими́трий, бысть ро́дом Росси́йскаго ца́рства, от страны́ Моско́вския, от гра́да Переясла́вля, от благочести́ву и ве́рну роди́телю роди́ся. И посе́м крести́ша и́ во и́мя Отца́, и Сы́на, и Святаго Ду́ха. Измла́да извы́че боже́ственным кни́гам, па́чеже превосходя́ ра́зумом, и смире́нною му́дростию мно́гих све́рстник свои́х. Мно́гими же обы́чаи подо́бяся святы́я, Иоа́нну Златоу́стому, та́коже ни от слуг по́чести приима́ше святы́й, но то́кмо смиренному́дрие всегда́ скрыва́ше в се́рдце своем. Внима́ше бо блаже́нный о бу́дущем ве́це, и о суде́ Бо́жии, и о воздая́нии кому́ждо по дело́м его́, и о Ца́рствии небе́снем, и пра́ведных ра́дости, и весе́лии ра́йския поро́ды Разсмотри́в у́бо святы́й, от ве́тхаго и но́ваго заве́та, сего све́та житие́ скоромину́ющее, и посе́м оста́ви мир сей су́етный: и умили́ся душе́ю в страх Бо́жий, и бысть мона́х в то́мже гра́де Переясла́вли, в монастыре́ Пречи́стыя Богоро́дицы на Гори́цах, и́же та́ко нарица́емо ме́сто. И па́ки мно́го потруди́вся на доброде́тель, трезве́нием и моли́твою и чистото́ю, и смире́нием после́дним, и любо́вию духо́вною ко всем. И отту́ду обре́те плод спасе́ния, поуча́яся в зако́не Госпо́дни день и нощь, трудолю́бный и при́сный богоуго́дный подвиза́тель, целому́дрием, и чи́стым се́рдцем взыска́я Бо́га, и про́сто рещи́, а́нгельское житие́ име́я. Хотя́ше бо святы́й ви́дети та ме́ста, иде́же жела́ют а́нгели приникнути, я́же угото́ва Бог лю́бящым Его́. И та́ко блаже́нному мона́шествующу. Мона́си же и проста́я чадь лю́бяще свята́го за мно́гую его́ доброде́тель. И посе́м сподо́би его́ Бог, свяще́нства дар прия́ти: поста́ви его́ Бог наста́вника и учи́теля лю́дем Свои́м, я́коже до́брый во́ин хотя́ угоди́ти господи́ну своему́. И па́ки в та́же времена́ свято́му отцу́ на́шему Се́ргию устроя́ющу монасты́рь в Ра́донежи Святы́я Тро́ицы, и о́бщее житие́ управля́ше по во́ле Бо́жией. Святы́й же Дими́трий обы́чай име́я ча́сто приходи́ти к свято́му Се́ргию, и бесе́доваше о Христе́, ка́ко бы о́бщее житие́ упра́вити, и лю́ди избра́нныя Бо́гу привести́. Пои́стинне просвети́ Бог Росси́йскую зе́млю, си́ми святыми Свои́ми уго́дники, преподо́бными отцы́ на́шими но́выми чудотво́рцы. И посе́м блаже́нный Дими́трий це́рковь воздви́же, во и́мя свята́го Никола́я чудотво́рца: и монасты́рь поста́ви у е́зера близ гра́да Переясла́вля, и бысть в нем игу́мен. И прихожда́ху к нему́ по́льзы ра́ди душе́вныя, мона́хи и бельцы́, и поуча́я их блаже́нный со смире́нием, хотя́щих с ним жи́тельствовати: и просты́я во святы́й мона́шеский чин облача́я. И та́ко ста́до Бо́жие случа́я, Христо́вых слове́сных ове́ц. Посе́м же о́бщее житие́ устро́ив святы́й со вся́кою ле́потою. И тако повину́ющеся бра́тия свято́му с любо́вию, и с послуша́нием во всем, я́ко а́нгелу Бо́жию, и и́стинному наста́внику, па́че же небе́сному Ца́рствию хода́таю изря́дному. И посе́м отту́ду отъи́де блаже́нный Дими́трий на Во́логду. И та́мо це́рковь созда́ Всеми́лостиваго Спа́са, на освяще́ние вода́м. И бра́тию собра́ мно́гу, и о́бщее житие́ соста́ви, и до́бре упа́с ста́до Христо́во слове́сных ове́ц.