Стихи́:

Горта́нь Вла́сиев пресе́чен бысть мече́м:

Моля́щим горта́ньми, то́ки подае́т вре́дом:

В единонадеся́тый Вла́сию посече́ вы́ю мечь же́стокий.

Сей бя́ше во времена́ Ликини́я царя́, епи́скоп Севасти́йский, живя́ в не́коей пеще́ре го́рстей, иде́же ди́вии зве́рие укроти́ми благослове́нием свята́го явля́хуся. Бя́ше же и враче́встей хи́трости иску́сен, мно́гия цельбы́ творя́ше: и чуде́сная соде́лования от Го́спода прии́м. Сей ят быв, и приведе́н ко Агрикола́ю иге́мону, и испове́да и́мя Христо́во, бие́н бысть же́злием, и пове́шен и стро́ган. Та́же ведо́му ему́ в темни́цу, после́доваша ему́ седмь жен, я́же посе́чени бы́ша мече́м, испове́дания ра́ди Христо́ва. Святы́й же Вла́сий во глубину́ езе́ра вве́ржен, и изы́де неврежде́н. Пото́м же главу́ его́ отсеко́ша, со обои́ми младе́нцы су́щими в темни́це. Глаго́лется же, я́ко сей бя́ше вели́каго му́ченика Евстра́тия пи́сменым уче́нием предпоче́т во вре́мя муче́ния его́, я́коже и в ветхих воображе́ниих обрета́ется воображе́н святы́й Вла́сий, стоя́ посреде́ святы́х пяти́ му́ченик, близ свята́го Евстра́тия, и прие́мля от руки́ его́ сви́ток счине́ния. Соверша́ется же собо́р муче́ния его́ во святе́м его́ муче́нии, су́щем близ свята́го апо́стола Фили́ппа в Мелтиа́де.

Стихи́:

От благочести́вых ве́твие благоче́стию,

Прозя́бшия гро́здие правосла́вию.

Та бя́ше жена́ Фео́фила царя́ иконобо́рца: не бя́ше бо та иконобо́рица и ерети́ца, я́коже и муж ея́. Он бо свята́го Мефо́дия патриа́рха Константи́ня гра́да изгна́, и в того́ ме́сто поста́ви Анни́я леканома́нтия, и святы́я ико́ны сожже. Сия́ же а́ще я́ве и не сме́яше поклоня́тися святы́м ико́нам, но оба́че имя́ше сокрове́нны в ло́жнице свое́й, и но́щию стоя́ше на моли́тве, моля́щися Бо́гу, да сотвори́т ми́лость с пра́ведными. Роди́ же сы́на и́менем Михаи́ла, и научи́ его́ правосла́вию. По сме́рти же му́жа своего́, а́бие приве́дши свята́го Мефо́дия, и собра́ свяще́нный собо́р, и прокля́ иконобо́рцы, и Анни́я сведе́ с престо́ла, и святы́я ико́ны внесе́ в це́рковь. И совеща́нием свята́го оте́ческаго собо́ра, помоли́ся Бо́гу о му́же свое́м, и изъя́ его́ от му́ки, и получи́ти его́ сотвори́ неизрече́нный живо́т. Такова́я же сотво́рши, и до́бре подвиза́вшися, к нему́же жела́ше Бо́гу, и ду́шу преложи́, оста́вльши ца́рство сы́ну своему́ Михаи́лу.

Сей преподо́бный и богоно́сный оте́ц наш Дими́трий, бысть ро́дом Росси́йскаго ца́рства, от страны́ Моско́вския, от гра́да Переясла́вля, от благочести́ву и ве́рну роди́телю роди́ся. И посе́м крести́ша и́ во и́мя Отца́, и Сы́на, и Святаго Ду́ха. Измла́да извы́че боже́ственным кни́гам, па́чеже превосходя́ ра́зумом, и смире́нною му́дростию мно́гих све́рстник свои́х. Мно́гими же обы́чаи подо́бяся святы́я, Иоа́нну Златоу́стому, та́коже ни от слуг по́чести приима́ше святы́й, но то́кмо смиренному́дрие всегда́ скрыва́ше в се́рдце своем. Внима́ше бо блаже́нный о бу́дущем ве́це, и о суде́ Бо́жии, и о воздая́нии кому́ждо по дело́м его́, и о Ца́рствии небе́снем, и пра́ведных ра́дости, и весе́лии ра́йския поро́ды Разсмотри́в у́бо святы́й, от ве́тхаго и но́ваго заве́та, сего све́та житие́ скоромину́ющее, и посе́м оста́ви мир сей су́етный: и умили́ся душе́ю в страх Бо́жий, и бысть мона́х в то́мже гра́де Переясла́вли, в монастыре́ Пречи́стыя Богоро́дицы на Гори́цах, и́же та́ко нарица́емо ме́сто. И па́ки мно́го потруди́вся на доброде́тель, трезве́нием и моли́твою и чистото́ю, и смире́нием после́дним, и любо́вию духо́вною ко всем. И отту́ду обре́те плод спасе́ния, поуча́яся в зако́не Госпо́дни день и нощь, трудолю́бный и при́сный богоуго́дный подвиза́тель, целому́дрием, и чи́стым се́рдцем взыска́я Бо́га, и про́сто рещи́, а́нгельское житие́ име́я. Хотя́ше бо святы́й ви́дети та ме́ста, иде́же жела́ют а́нгели приникнути, я́же угото́ва Бог лю́бящым Его́. И та́ко блаже́нному мона́шествующу. Мона́си же и проста́я чадь лю́бяще свята́го за мно́гую его́ доброде́тель. И посе́м сподо́би его́ Бог, свяще́нства дар прия́ти: поста́ви его́ Бог наста́вника и учи́теля лю́дем Свои́м, я́коже до́брый во́ин хотя́ угоди́ти господи́ну своему́. И па́ки в та́же времена́ свято́му отцу́ на́шему Се́ргию устроя́ющу монасты́рь в Ра́донежи Святы́я Тро́ицы, и о́бщее житие́ управля́ше по во́ле Бо́жией. Святы́й же Дими́трий обы́чай име́я ча́сто приходи́ти к свято́му Се́ргию, и бесе́доваше о Христе́, ка́ко бы о́бщее житие́ упра́вити, и лю́ди избра́нныя Бо́гу привести́. Пои́стинне просвети́ Бог Росси́йскую зе́млю, си́ми святыми Свои́ми уго́дники, преподо́бными отцы́ на́шими но́выми чудотво́рцы. И посе́м блаже́нный Дими́трий це́рковь воздви́же, во и́мя свята́го Никола́я чудотво́рца: и монасты́рь поста́ви у е́зера близ гра́да Переясла́вля, и бысть в нем игу́мен. И прихожда́ху к нему́ по́льзы ра́ди душе́вныя, мона́хи и бельцы́, и поуча́я их блаже́нный со смире́нием, хотя́щих с ним жи́тельствовати: и просты́я во святы́й мона́шеский чин облача́я. И та́ко ста́до Бо́жие случа́я, Христо́вых слове́сных ове́ц. Посе́м же о́бщее житие́ устро́ив святы́й со вся́кою ле́потою. И тако повину́ющеся бра́тия свято́му с любо́вию, и с послуша́нием во всем, я́ко а́нгелу Бо́жию, и и́стинному наста́внику, па́че же небе́сному Ца́рствию хода́таю изря́дному. И посе́м отту́ду отъи́де блаже́нный Дими́трий на Во́логду. И та́мо це́рковь созда́ Всеми́лостиваго Спа́са, на освяще́ние вода́м. И бра́тию собра́ мно́гу, и о́бщее житие́ соста́ви, и до́бре упа́с ста́до Христо́во слове́сных ове́ц.

Пове́даше Иоа́нн игу́мен монастыря́ Гига́нта, и́же во Иерусали́ме: Прии́де ко мне, рече́, не́кто ю́ноша глаго́ля: Бо́га ра́ди приими́ мя, хощу́ пока́ятися: се же глаго́лаше со мно́гими слеза́ми. Аз же ви́дев его́ зело́ сокруше́на, глаго́лах ему́: Чесо́ ра́ди прише́л еси́ в толи́ко смире́ние? Пове́ждь ми ча́до вину́, и и́мать Бог помощи́ тебе́. Сей же рече́: Пои́стине о́тче господине, зело́ гре́шен есмь. Аз же рех: Мно́зи суть ча́до и разли́чны греси́, та́ко мно́ги и разли́чны по́мощи. Но а́ще хо́щеши цельбу́ улучи́ти, пове́ждь ми и́стинною сведе́ния твоя́, да и аз тем подо́бная пода́м врачева́ния: И́нако бо цели́тся блудни́к, и и́нако разбо́йник, и тать, и лихои́мец, друго́е клеветни́к, и злопа́мятник, и да ти мно́гих не нари́чу: я́коже плотски́м боле́знем разли́чная исцеле́ния, так и о душе́вных страсте́х многи суть врачбы́. Он же вельми́ воздохну́в, со слезами бия́ше в пе́рси, от стуже́ния се́рдца разлива́яся, и не можа́ше что глаго́лати. Аз же ви́дя его́ в толи́це умиле́нии рех: Ча́до, послу́шай мене́, и глаго́ли сотворе́ное, и́мать Бог наш пода́ти тебе́ мно́ю исцеле́ние. Той бо мно́гим Его́ человеколю́бием все на́шего ра́ди спасе́ния соде́я: с мытои́мцы водворя́яся, и блудни́цы не отврати́ся: разбо́йника прия́т, и друг гре́шником бысть: и тебе Свои́ма рука́ма не прии́мет ли обраща́ющася к покая́нию? Не хо́щет бо сме́рти гре́шника, но ожида́ет обраще́ния, и́мже жи́ву ему́ бы́ти. Тогда́ удержа́вся от го́рькаго того́ во́пля, нача́т ми глаго́лати: Аз го́споди о́тче вся́каго греха́ испо́лнен есмь, недосто́ин сый небесе́ и земли́. Су́щу ми во гра́де мое́м, слы́шах я́ко старе́йшины гра́да дщи де́ва у́мре, и погребе́на бысть во многоце́нных ри́зах вне гра́да. Аз же се слы́шав, от обы́чая зла идо́х но́щию ко гро́бу: и влез во гроб, нача́х совлача́ти ю́. И я́ко совлеко́х все, и льняны́я срачи́цы не оста́вих, и обнажи́в ю́ я́ко рожде́ну. И хоте́х уже́ из гро́ба изле́сти, и воздви́гшися ят мя леви́цею за десну́ю мою́ ру́ку, и глаго́ла ми: Челове́че, та́ко ли ти го́де, обнажи́ти мя? Не убоя́лся ли еси́ Бо́га? Ни ли устраши́лся Суда бу́дущаго, и по дело́м воздая́ния? Почто́ о́бщаго не постыди́лся еси́ естества́? Но христиа́н сый, та́ко веле́л еси́ ста́ти мне пред Христо́м? Ни ли же́нскаго устыди́лся еси естества? Ни ли от жены́ рожде́н еси́? Не уже́ ли твою́ ма́терь со мно́ю укори́л еси́? И кий отве́т окая́нный челове́че Бо́гови да́си за мя в Стра́шный день, я́ко жи́ве мне су́щи, не ви́де челове́к лица́ моего́, ты же по сме́рти обнажи́л еси́ мя? Лю́те тебе́ челове́че, в каково́ прегреше́ние впал еси́? Или́ ка́ко си́ма рука́ма прии́меши Пречи́стое Те́ло, и Святу́ю Кровь Го́спода на́шего Иису́са Христа́? Аз же диви́вся крепко держи́мь, едва́ трепе́ща глаголах ей: Пусти́ мя, яко посе́м не сотворю́ того́. Она́ же рече́ ми: Яко хотев вшел еси зде, и я́коже хо́щеши не изы́деши отсю́ду, но гроб сей общь бу́дет нам. Но не мни я́ко ско́ро и́маши умре́ти, но на мно́ги дни зле му́чимь преда́си ду́шу твою́. Аз же кля́хся Вседержи́телем Бо́гом, па́ки не сотвори́ти того́, и мно́ги излия́х сле́зы. И отвеща́вши рече́ ми: А́ще хо́щеши избы́ти беды́ сея́, даждь ми сло́во, да а́ще тя отпущу́, я́ко не то́кмо сих оста́нешися окая́нных грехо́в твои́х, но да и ми́ра отве́ржешися, и бу́деши мона́х, и пока́ешися о нихже согреши́л еси́, и рабо́таеши Христо́ви. Аз же кля́хся: Тако ми Бо́га хотя́щаго изъя́ти ду́шу мою́, я́ко от часа́ сего́ не иду в дом мой, от отсю́ду в монасты́рь пойду́. Тогда́ рече́ ми деви́ца: Оде́й мя я́коже мя еси́ обре́л. Облекшу же мне, па́ки возле́гши у́спе. Сия́ же слы́шав аз от ю́ноши, и поучи́в его́ о покая́нии, остриго́х его́, и облеко́х в мона́шеский о́браз. И заклепа́х его́ в пеще́ре внутрь огра́да, и вельми́ хвали́в Бо́га, подвиза́ся о свое́й души́. И не́колико пребы́в в покая́нии, прие́м извеще́ние от Бо́га, я́ко прия́ проще́ние от грехо́в, и ма́ло поболе́в, преста́вися к Бо́гу в ве́чную жизнь.