Той святы́й священному́ченик Пио́ний, бе в ца́рство Де́кия царя́, поп Сми́рнския святы́я це́ркве. Облича́ше же иуде́ов, и е́ллин препира́я от боже́ственых Писа́ний, я́ко Еди́н есть Бог И́стинный Сотвори́вый вся́ческая, и Единоча́дый Его́ Сын Госпо́дь наш Иису́с Христо́с, и Святы́й Дух. И по сих рече́: Я́ко вси гре́шнии и неве́рнии от того му́чени будут, и огню́ ве́чному предадя́тся. И се я́ве есть от содо́мскаго огня́, и и́же и от Сикели́и исхо́дит. Сие глаго́ля, ят бысть от идолослужи́тель со ине́ми христиа́ны. И пе́рвие свя́зан бысть вери́гами, и по́слан идоложе́рцы ко кня́зю Сми́рнскаго гра́да, и той приведе́ его́ ко иге́мону страны́ тоя́. Иге́мон же би его́ зело́, и на дре́ве пове́си, и поджже́ свеща́ми горя́щими ре́бра его́. И посе́м снем со дре́ва его́, и разжже́ пещь вели́ку, и вве́рже его́ в ню. Святы́й же моля́шеся Бо́гу, и сконча́ся в ней.