Стихи́:

Тща́шеся блюсти́ и зако́ннаго ро́га,

Софро́ние, не́же с небеси́ ро́га:

В единонадеся́тый за́йде Софро́ние во гроб.

Сей бя́ше от страны́ Фини́ческия, Ливостефа́нския, гра́да Дама́скова, сын отца́ Калуми́нфа (Пли́нфа), ма́тере же Мы́ры (Миру́сы). И обои́м благочести́вым и целому́дреным. Тем кре́пко по вся́ких худо́жествиих преесте́ствено прие́м, и е́же в пусты́нях в по́стницех сбыва́емую доброде́тель. Той во гра́де живы́й, и худо́жно прехожда́ше. Та́же шед во огра́ду вели́каго Феодо́сия: пото́м во Еги́пет. Мно́жайшему же наказа́нию жела́я, иде́же вся́ка прему́дрость: получи́в му́жа нарица́емаго Иоа́нна, любо́вию к нему́ присво́ився: и единосожи́тель его́ и стру́дник быв, от о́ного прие́мля и подава́я изве́стнейше, иде́же и очи́ма боле́знь пострада́в. И святы́ма Ки́ром и Иоа́нном уврачева́н быв, и врачева́нию мзду обеща́ся, я́ко е́же повсегда́ от него́ соверша́ема чудеса́ о́нех писа́нию преда́ти, и́же и преда́сть. Пото́м и епи́скопом Иерусали́мским поста́влен быв. Плене́ну же бы́вшу свято́му граду от перс, и отъи́де во Александри́ю к вели́кому Иоа́нну Ми́лостивому, и́же тогда́ апо́стольскаго престо́ла пра́вящу и к блаже́нному поко́ю отше́дшу. Сей прему́дрый Софро́ний неизочте́нное его́ ми́лостыни сокро́вище и жития́ высо́кое, похва́льными и надгро́бными словесы́ показа́в. И па́ки же ко свято́му гра́ду обра́тися. Несть ка́ко сказа́ти, с коли́ким попече́нием и трудо́м свою́ упасе́ це́рковь. И е́же у́бо боре́ние его́ на бе́сы, но и на еретики́, и́хже и пи́смени и преда́нии оте́ческими препира́ше, и непотре́бны отсыла́ше. И ина́я же мно́жайшая, и па́мяти сло́ву досто́йная списа́ния це́ркви оста́ви, житие́м пра́вым и наказа́тельным, и по Бо́зе жи́тельствуя. Е́же и зде есть преди́вная по́весть его́, о я́же в жена́х преизя́щней и равноа́нгельней Мари́и Еги́птяныне, я́же па́че естества́ челове́ческаго пусты́ннаго подвиза́вшися по́двига. До́бре же и благолюбе́зне сам пожи́ве, и пр́очих наказа́в, и уста́ Христо́ва быв, с ми́ром к Нему́ отъи́де.

Во всем разуме́йте ча́да коль вели́ка ми́лостыни дела́ суть: и в сем ве́це помога́ет, и в о́ном ра́дости духо́вныя наполня́ет, и к Бо́гу приближа́ет, и ра́вна а́нгелом сотворя́ет. О той бо и Са́мая И́стинна глаго́лет в писа́нии: Твори́те ми́лостыню, да и вам ми́лостив будет Влады́ка и Госпо́дь. Дади́те, и да́сться вам. Пи́сано бо есть: огнь горя́щь угаси́т вода́, а ми́лостыни очи́стит грехи́. И па́ки глаго́лет: Сокры́й ми́лостыню в се́рдцы, и си́и за тя мо́лит. И па́ки Благи́й Оте́ц поуща́ет ны глаго́ля: А́ще изоби́ло в тебе́ бу́дет, мно́го пода́й же. А́ще ли по оску́ду бу́дет, то по си́ле с ра́достию пода́ти потщи́мся. Вели́ка бо есть си́ла поще́нию и прия́тию стра́нным. Приимы́й проро́ка во и́мя проро́че, мзду проро́чу прии́мет. Приимы́й пра́ведника, мзду пра́ведничу прии́мет. Да се слы́шаще, бра́тие, потщи́теся твори́ти ми́лостыню, да ве́чную жизнь получи́те в небе́сных селе́ниих. Ами́нь.