Ширина́ земли́ и концы́ ея́, ничто́ нам приспе́ют, в той стра́шный день Суда́. Того́ у́бо ра́ди бра́тие, доко́ле есмы́ жи́ви, име́йте па́мять о бу́дущем Суде́. И помышля́ем во уме́ негаси́маго того́ пла́мене муче́ние, нетворя́щим во́ли Бо́жии. И воспомяне́м, я́ко никто́ мо́жет никому́ помощи́. Но ко́йждо свое́ бре́мя нося́ ста́нет, ждый осужде́ния хотя́щаго изы́ти нань. А дру́гу о́ друзе не отвеща́ти, но ко́ждо о себе́ отве́т даст. О убо́гий челове́че, мно́го начне́ши тужи́ти тогда́ и се́товати, егда́ пра́веднии возра́дуются, сла́ву и венцы́ прие́млюще, и Ца́рство не преиму́щееся. О гре́шныи, мно́го пла́кати на́чнеши уми́льно, и глаго́лати со слеза́ми лю́те стоня́, го́ре мне скве́рному, не отве́ргшему бре́мене сего́ грехо́внаго. А ны́не небе́сных благ насы́тился бых, и со а́нгелы бых пребыва́л. О зла́го сего́ ве́ка маловре́менная пре́лесть, худа́го де́ля наслажде́ния в безконе́чную осужда́юся му́ку, и сла́сти ра́ди пло́тныя, огню́ и́мам пре́дан бы́ти. Пра́веден у́бо Суд Бо́жий есть, зово́м бо бях, не послу́шах. Учи́мь бех, не внима́х. Изве́стовах бо ми, я́ко грехо́вных ра́ди дел, родство́ о́гненое ожида́ет, и му́ка ве́чная и боле́знено се́тование. Аз же о всем том не ради́х, но лжу мнех. О коли́ко вре́мя изгуби́х окая́нный аз в ле́ности и небреже́нии. И ка́ко мя есть прельсти́л пусто́шный он мир. Ка́ко ины́я ви́дя трудя́щася Бо́га ра́ди, и постя́щася и наделя́юща сироты́ и вдови́цы, аз о всем том не ради́х. И кни́ги слы́шах что́мы, не внима́х, и чту́щим я́ руга́хся. Го́ре мне я́ко не слу́шах уча́щих мя. А ны́не пла́чу лю́те вопия́, и не слы́шит мене́ Бог. Лю́те мне я́ко сам ся погуби́х, и сам наруга́хся себе́. У́не ми бя́ше с те́лом труди́тися, и пости́тися и пла́катися, не́жели обрести́ся на ме́сте сем муче́ния. И что ми успе́ло, о́ного ми́ра бога́тьство и сла́ва, но вся оста́шася. Аз же погиба́ю в лю́тыя му́ки осужа́емь. Сия́ на уме́ иму́ще возлю́бленнии, потщи́мся в ны́нешнем ве́це с пра́вдою пожи́ти. Я́коже апо́стол Па́вел учи́т ны глаго́ля. Бра́тие отве́рзите лжу, глаго́лите и́стину, и друг ко дру́гу любо́вь и́стинну име́йте, не гра́бите не кра́дите, не гне́вайтеся не зави́дите, к це́ркви воста́ните, и не упива́йтеся в пия́ньство. А́ще си сотворите́, блаже́ни бу́дете. А́ще же не сотворите́, осуже́ни бу́дете. Сего́ ра́ди моли́теся, да не вни́дете в такова́я. Бо́гу на́шему слава, ныне и при́сно и во ве́ки веко́в.