Стихи́:

Со юнце́м бо́решися до́брый му́чениче Анти́па,

Тебе́ опаля́ющь, ты не веля́ ничто́же:

В единонадеся́тый в ме́дян вол Анти́па вве́ржен, сожже́ся.

Той бя́ше во времена́ Дометиа́на царя́, совре́менник святы́х апо́стол, внегда́ богосло́в, и благове́стник Иоа́нн в Патм прогна́н бя́ше. И па́ки то́йже и во еписто́лии о нем и́нде написа́, свяще́нника того́ ве́рна и му́ченика до́бра нарица́ет. И́мже в це́ркви Перга́мстей, архиере́й святы́й Анти́па поста́влен во мно́зе ста́рости и тве́рде. Ят же быв от идолослужи́тель, я́вльшымся бесо́м, и́мже они́ же́ртвы приноша́ху, я́ко не могу́щым в свое́м ме́сте жи́ти, ниже́ приноша́емыя же́ртвы приима́ти, но прогоня́емым им Анти́пою. Приведе́н же быв к иге́мону. Иге́мону же наче́ншу вопроша́ти его́, я́ко старе́йшая честне́йша суть, не́жели но́вая, мня и́дольскую слу́жбу ста́рую, и ле́ты мно́гими: а христиа́нскую едва́ вчера́ наче́ншуюся, и от ма́лых прие́мшуюся. Отвеща́в же к нему́ святы́й: «Ка́ин старе́йши бя́ше, а А́вель ме́нши, но Бог прия́т А́велевы же́ртвы, на Ка́иновы же ни поне́ очи́ма погля́дав: да не мози́ ми хвали́тися о дре́вней слу́жбе». Сие́ же слы́шавше неве́рнии, и на гнев подви́гшеся, вол ме́дян ско́ван вельми́ разже́гше, и та́мо свята́го вве́ргоша. И в нем мно́го Бо́гу помоли́вся, и вели́кую Его́ си́лу воспе́в: и о и́хже сподо́блься Того́ благода́рствив. И о помина́ющых его́ во вся́ких боле́знех, и о неутеши́мей зу́бней боле́зни, безстра́стно цели́ти испроси́в. И о ми́ре помоли́вся, и отпуще́ние грехо́в, и бу́дущаго суда́ очище́ние получи́ти того́ помина́ющым. И ко Го́споду отъи́де. И положе́н бысть в це́ркви Перга́мстей, ми́ро и цельбы́ непреста́нно точа́. Соверша́ет же ся собо́р его́, в собра́нии свята́го и всехва́льнаго апо́стола и благове́стника Иоа́нна Богосло́ва, близ святы́я и Вели́кия це́ркве.