Ве́руй во Еди́наго Бо́га Отца́, от Него́же вся, и мы о Нем. И во Еди́ного Го́спода Иису́са Христа́: И́мже вся, и мы Его́ ради: И́же есть о́браз Бо́га неви́димаго, Пе́рвенец всея́ тва́ри и всех век: Я́ко о Нем созда́шася вся́ческая, я́же на небеси́, и я́же на земли́, ви́димая и неви́димая: А́ще престо́ли, а́ще госпо́дьства, а́ще нача́ла, а́ще вла́сти, вся Тем бы́ша. Без Него́же ничто́же бысть, е́же бысть. И во Еди́наго Ду́ха Свята́го, о Не́мже вся: И́же И́стинный, и Животворя́щий, Бог, и боготворя́й. Дух Благи́й, Дух Пра́вый, Дух Уте́шительный, Дух сынотворе́ния. Сих Бог у́бо ко́ждо по Себе́ ви́димь, я́ко Оте́ц, и Сын, и Дух Святы́й. Еди́н же Бог в трех ипоста́сех Еди́но естество́, Еди́но Ца́рство, Еди́на си́ла, Еди́на сла́ва, Еди́но существо́, разделе́ни соста́вы то́кмо. Еди́н бо Оте́ц, Ему́же Свое́, нерожде́ние. Един Единоча́дый Сын, и Свое́ Ему́, рождество́. Еди́н же Святы́й Дух, и Свое́ Ему́, исхожде́ние. Та́ко бо мы от све́та Отца́, све́та ве́дуще Сы́на, во све́те Святы́м Ду́хом освеща́емся. В трех соста́вех (ипоста́сех) Еди́но Божество́ сла́вяще. И Той есть И́стинен Еди́н Бог, И́же в Тро́ице познава́емый. Я́ко от Того́, и Тем, и в Том вся́ческая.

Сего́ ра́ди и аз и́же о тебе́ уве́дев по́слан есмь научи́ти тя, я́коже навыко́х и соблюдо́х изнача́ла и досе́ле моея́ седи́ны. А́ще бо ве́руеши и крести́шися, спасе́шися. А́ще же не ве́руеши, осужде́н бу́деши. Сия́ бо днесь я́же ви́диши, и́миже велича́ешися, а́ще сла́ва или́ пи́ща, или́ бога́тство, и вся сия́ жите́йская пре́лесть, я́ко не су́ща и вма́ле прехо́дит: изведу́т же тя отсю́ду и не хотя́ща. И те́ло у́бо затворе́но бу́дет в малем гро́бе, еди́но оста́влено, всех люби́мых, и сро́дников, и друго́в лише́н, отню́дуже кра́сная ми́ра сего́ пре́йдут. И посе́м мно́гое скаре́дие злосмра́дная тля, в ны́нешния ме́сто добро́ты и благоуха́ния объи́мет тя: Ду́шу же твою́ вложа́т в преиспо́дняя земли́, во осужде́ние а́дово до после́дняго дне воскресе́ния. Егда́ па́ки прии́мши душа́ свое́ те́ло, отве́ржена бу́дет от лица́ Госпо́дня, и преда́стся родству́ огня́ паля́щаго. Помы́сли, какова́я ти та́мо приключа́тся, а́ще пребу́деши в неве́рствии. А́ще же усе́рдно послу́шаеши зову́щаго тя на спасе́ние, и све́том Его́ зна́менаешися, всех у́бо отве́ргся, Тому́ же Еди́ному приле́плься, какова́ получи́ши утверже́ния и весе́лия, послу́шай: А́ще седи́ши, без боя́зни бу́деши: А́ще же спи́ши, в сладость спи́ши, и не бои́шися стра́ха наше́дшаго, ни стремле́ния нечести́вых находя́щаго: Но по́йдеши упова́я я́ко лев, и поживе́ши с весе́лием и ра́достию ве́чною. На главе́ бо твое́й ра́дость, и хвала́ и весе́лие пости́гнет тя. Отбежи́т боле́знь, и печа́ль, и воздыха́ние. Тогда́ яви́тся зау́тра свет твой, и исцеле́ния твоя́ вско́ре восия́ют, и предъи́дет пред тобо́ю пра́вда твоя́, и сла́ва Бо́жия объи́мет тя. Тогда́ воззове́ши, и Бог услы́шит тя. Еще́ бо ти глаго́лющу, рече́т: Се приидо́х, Аз бо есмь очища́яй беззако́ния твоя́, и не помяну́ их: Ты же я́ помяни́, и не осу́дишися: Глаго́ли ты пе́рвие беззако́ния твоя́, да оправди́шися. И а́ще бу́дут прегреше́ния твоя́ обагре́на, я́ко снег убелю их: аще же бу́дут я́ко червле́на, я́ко яри́ну убелю́ я́. Уст́а бо Господня глаго́лаша сия́.