Сей бя́ше при Диоклитиа́не царе́, от Евро́ния свяще́нник сый амфи́йскаго гра́да святы́я Бо́жия Це́ркве. Роди́теля же ему́ Ефра́тий, и Евста́фия, благоро́дна зело́ и бога́та, от ста́раго Ри́ма су́ща. Святы́й же Моки́й всегда́ учи́тельству приседя́. И Христа́ пропове́дая, и оша́ятися пре́лести и́дольския завещева́я. Же́ртве же твори́ме Лаодики́ем антипа́том Диони́су, и идолослуже́бником со́браным, разврати́ святы́й жре́мая, и ят быв, и испове́дав Христа́. Пе́рво пове́шен и стро́ган, по ве́ждам и по лани́там и по ре́бром. Та́же пещь запа́льше, смоло́ю и изгре́бьми и ло́зием. И бы́вшу пла́мени до седми́ лакте́й высото́ю, и посреде́ вве́ржен быв. Пла́мень же прии́мый того́ це́ла сохрани́, и ви́дим бя́ше среде́ пла́мене ходя́, со ины́ми треми́ му́жи сла́вными. Во́ньже еди́ному лице́ па́че зари́ блиста́яше. И изы́де святы́й из пла́мене невреди́м, ниже́ поне́ еди́ному вла́су его́ косну́вшуся огню́. И и́же испу́щься попали́ антипа́та, и с ним де́вять муже́й. Я́ко внегда́ утоли́вшуся пла́мени, не обрести́ от о́нех ни по не́коей ма́лей ча́сти от телесе́. Тогда́ всаже́н в темни́цу Фаласи́ем принги́пом, блаже́нный му́ченик. Пото́м же Макси́му антипа́ту прише́дшу изведе́н бысть святы́й на испыта́ние. И не поко́рся отврещи́ся Христа́, но па́че Того́ я́сно пропове́дав, к двема́ колесе́ма привя́зан быв, е́же от них да попра́н и сокруше́н бу́дет. И́же и от них пресла́вне изба́влься, звере́м вдае́тся, и невреди́м от них изы́де. Наро́ду же возопи́вшу е́же отпусти́ти того́, по́слан бысть к Филиписи́ю во град Пири́нф фраки́йский, и́же ны́не Иракли́я нари́чется. И отту́де в Византи́ю, иде́же и ме́чное прия́т осуже́ние, и главу́ ему́ отсеко́ша. И тогда́ по́прищем еди́нем от гра́да, те́ло его́ не́кими ску́тано бысть. Пото́м со́здане бы́вши це́ркви вели́цей Константи́ном вели́ким царе́м, и та́мо многоче́стне и многоле́потне положе́н бысть. Соверша́ет же ся собо́р его́ во святе́м его́ муче́нии.