Сия́ бя́ше в ле́та Феодо́сия, роди́телю благочести́ву дщи в Константи́не гра́де. Седми́м же ле́том бы́вши, у́мре оте́ц ея́. Ма́ти же взе́мши ея́, постриже́ ю в не́коем монастыри́ в Византи́и. Пото́м уме́рши ма́тери, и оста́вльши блаже́нней все свое́ бога́тьство. Она́же от зла́та и сребра́ три ико́ны скова́, Христа́ Бо́га, и Богоро́дицы, и му́ченицы Анастаси́и. Про́чее же разда́ ни́щым. По не́коем же ле́те Льву злочести́вому ца́рьствие восприе́мшу, и благочести́вому Феодо́сию сконча́вшуся. И зане́же не покаря́тися злочести́вым его́ повеле́нием, вели́кому в патриа́рсех Ге́рману, сей мечи́ и дреко́лми ну́ждею из патриархи́и изгна́, и святу́ю и Влады́чнюю ико́ну Христа́ Бо́га на́шего, и́же превы́ше врат, я́же ме́дяная глаго́лются, тща́шеся звероимени́тый свести́ и огню́ преда́ти. Да внегда́ такова́я соверша́хуся, и спафа́рий его́ вшед на ле́ствицу, хотя́ святу́ю ико́ну низложи́ти. А́бие блаже́нная Феодо́сия со ине́ми благочести́выми жена́ми, ле́ствицу пото́ргше, и спафа́рия на зе́млю пове́ргше, сме́рти преда́шя. И доше́дше в патриархи́ю, бия́ху ка́мением Анаста́сия злочести́ваго патриа́рха. И того́ ра́ди у́бо про́чия жены́ посе́чены бы́шя. Святу́ю же су́ров не́кий и безчелове́чен влеки́й слуга́ к волу́ему торгу́, и похи́тив о́вний рог и неми́лостивно по вы́и бив, муче́нию вене́ц ей исхода́тай. О несве́домых же чуде́с ея́, и́же по всегда́ ея́ ра́ди соде́ловаемых, подоба́ет вся́кому хотя́щему уве́дети. Сове́ршаетжеся собо́р ея́ во оби́тели дексиокра́тстей, иде́же лежи́т свято́е те́ло ея́.