Сих у́бо и мы подража́ем, не ктому́ мне ко всем сло́во, но к жела́ющым нача́льства. А́ще ве́руеши, я́ко Бо́жие есть избира́ние, да не негоду́еши. На о́наго бо негоду́еши, и проти́ву о́ному гне́ваешися. Он есть избра́вый. А́ще же той у́бо избра́л есть, ты же сме́еши на сего́ негодова́ти, то́жде твори́ши, яково́ же Ка́ин. Подоба́ше бо воприя́ти, е́же Бо́гу уго́дно бысть, сей же, зане́ предпочте́нна бысть же́ртва бра́тняя, оскорби́вся, негодова́, подоба́ше умили́тися. Аз же не сие́ глаго́лю, но я́ко о по́лзе ве́де по смотре́нию стро́ити Бог. Мно́жицею бо, нра́вом у́бо кротча́йшь еси́ ты, неизря́ден же. Па́ки есть тебе́ у́бо житие́ безпоро́чно, и нрав свобо́днич, в це́ркви же не тех то́кмо тре́бе есть. И́накоже, и ин ко ино́му прили́чен есть. Не зри́ши ли ели́ко о сих сотвори́ло есть сло́во, боже́ственное писа́ние. Но да реку́ чесо́ ра́ди съпре́телна вещь сия́ бысть; Зане́ не я́ко на нача́льство и предста́тельство бра́тии прихо́дим, но я́ко на честь и упокое́ние. А́ще бо ве́дал бы еси́, я́ко всем до́лжен есть бы́ти епи́скоп, всех бремена́ нося́, я́ко ине́м у́бо гне́вающымся проще́ние есть, тому́ же нигде́же, я́ко ине́м согреша́ющым изве́т есть мно́гий, сему́ же не ктому́, то не бы потща́лся еси́ нача́льство сие́, не бы поте́кл еси́. И́бо сей всех подлежи́т усто́м, всех судово́м, и му́дрых и нему́дрых. Печа́льми на ко́ждо ураня́емь быва́ет день, на ку́юждо нощь. Бо́гу на́шему сла́ва и ны́не и при́сно и во ве́ки веко́в.