Стихи́:

Соверше́н учени́к, Христе́, Варфоломе́й,

Подо́бяся Тебе́ и терпи́т кре́стную страсть:

Сокруша́емо подъя́т Варна́ва ка́мение:

В единонадеся́тый распя́ша благому́дрена Варфоломе́я.

Варфоломе́й еди́н сый от обою́ на́десятих учени́к, и́же во Инди́и, нарица́емей Евдоно́ма (Евде́мона), свято́е благове́стие пропове́да, е́же от Матфе́я о́нем Ева́нгелие предаде́, на кресте́ пригвожде́н в Енарву́не (Авари́и) гра́де, и́же и пресла́вне сконча́ся. И во оловя́ную ра́ку вложе́н, и в мо́ре вве́ржен. И Бо́жиим промышле́нием, да́же до Сикили́и в Липа́р о́стров несе́н. И яви́ся та́мо и погребе́н быв.

Варна́ва же, и сей во апо́стольских писа́ниих пи́шется еди́н сый от седми́десятих, слико́вник Петро́вых поста́влен бысть. Толку́ет же ся и́мя его́, «Сын утеше́ния», от пле́мени Леви́ина нари́чемь. Рожде́н и воспита́н в Ки́пре о́строве. Сей пе́рвие во Иеросали́ме и в Ри́ме и во Александри́и Христа́ пропове́дав. И прише́д в Кипр, от иуде́й и от е́ллин ка́мением побие́н бысть, и огню́ пре́дан. Его́же блаже́нный апо́стол и благове́стник поче́т положи́в в верте́пе, и отплы́ во Ефе́с к Па́влу, и пове́да ему́ кончи́ну Варна́вину. Пла́ка же по нем блаже́нный. Глаго́лет же ся погребе́ну бы́ти с ним, и́же от того́ напи́санное от Матфе́я свято́е Благовествова́ние, и́же и последи́ изъобре́тено бысть со апо́стольским телесе́м. Е́же ве́рнии в законе́ние прие́мше, не подкланя́тися епи́скопу того́ о́строва, но от своего́ епи́скопа поставля́тися. Соверша́етжеся собо́р его́ в пречестне́м апо́стольстве свята́го и верхо́внаго апо́стола Петра́, служа́щем при святе́й Вели́цей це́ркви.

Бога́тии ми́лостиви бу́дите, да не та́же вся прии́мете, я́ко бога́тый он. И убо́зии же хваля́ще Бо́га, терпи́те ско́рби, да тех сподо́битеся, и́хже и Ла́зарь ни́щий. Бысть рече́ Ла́зарь во Иерусали́ме вельми́ нищь, и зле боле́знию одержи́мь, его́же ине́м в при́тчу Госпо́дь приведе́. Бе же у́бо и бога́т не́кто в багряни́цу облача́яся, и всегда́ на трапе́зе мно́га бра́шна име́я, и ча́ши ко́ваны, и пи́ры по вся дни; То где и́мя бога́таго, нигде́ в писа́нии несть обрести́. Но на всех бога́тых скупы́х сло́во се. Коли́ку име́ сла́ву и бога́тьство, а ни и́мени ему́ несть, я́ко и дре́во ли́ствено плода́ не имы́й. Ни́щий же он Ла́зарь бо́лен и гно́ен пред враты́ бога́таго лежа́ше, жела́я крупи́ц насы́титися я́же пси ядя́т, ни целя́щих имя́ше. Но пси облиза́ху гной его́. В такове́х же сый беда́х Ла́зарь, ниже́ поропта́, ниже́ похули́, не милосе́рдие бога́таго и безчелове́чие и ску́пость. И в сконча́ние же у́бо толи́ки сподо́бися че́сти, я́ко от а́нгел ноше́ния в ца́рьство. У́мре же и бога́тый, и поребе́н бысть; По и́стинне бо жи́ву ему́ су́щу, поко́пана бе ду́ша его́, я́ко и гроб нося́щи плоть. У́мер же, во ад низво́дится. И возве́д о́чи свои́ во а́де, сый в му́ках, ви́де Авраа́ма издале́ча, и Ла́заря с ним, и возгласи́в рече́, о́тче Авраа́ме поми́луй мя, посли́ Ла́заря, да язы́к ми устуди́т, кра́ем пе́рста своего́, изгара́ю бо в пла́мени сем. Почто́ же не у ино́го от пра́ведник, Ла́заря ви́де но у Авраа́ма; Бя́ше бо страннолю́бец Авраа́м, и́же ми́мо ходя́щыя в дом свой влеча́ше; Сей же и внутрь лежа́щаго не зря́ше. К нему́ же Авраа́м отвеща́, ча́до помяни́ си, я́ко блага́я своя́ восприя́л еси́ в животе́ свое́м; Смотри́ му́дрость пра́веднаго. Не рече́ неми́лостиве, и злосе́рде. Но веща́, помяни́ я́ко ты в животе́ за ма́лое добро́ мно́го прия́ оби́лие и сла́ву. А Ла́зарь за ма́лыя грехи́ зла́я претерпе́; Ны́не же утеша́ется, а ты в пла́мени жгомь еси́. К сему́же про́пасть ме́жду на́ми есть, и ва́ми; И явля́ет ра́зность гре́шных с пра́ведными, разли́чны бо во́ли их бе́ша. И се же ве́домо, я́ко оби́дяй оби́димаго у́зрит в ка́цей сла́ве есть. Рече́ же молю́ тя Авраа́ме о́тче, да по́слеши в дом отца́ моего́, и́мам бо пять бра́тий, да им пове́дает, да не и ти́и в му́ку прии́дут; Погреши́ я́же о себе́ бога́тый скупы́й, о о́нех полага́ет мольбы́. К нему́ же Авраа́м рече́, и́муть зако́н и проро́ки, и мно́ги учи́тели. Бога́тый же рече́, ни о́тче. Поне́же бо и аз сам писа́ния слы́ша не ве́роваше, и ба́снем бы́ти глаго́лемая мня́ше; И я́ко сам не слу́шаше писа́ния, глаго́лаше от себе́ разсужда́я. Но а́ще кто из ме́ртвых воскре́снет, ве́ру и́мут. Та́цы и ны́не суть, и́же глаго́лют. Кто весть и́же во а́де, кто ли отту́ду прише́д возвести́л нам; Но да слы́шат авраа́мовы глаго́лы, я́ко а́ще писа́ний не послу́шают уче́ния, то ниже́ от ме́ртвых кто прии́дет не́ ймут ве́ры; Се бо я́ве жи́дове сотвори́ли; Поне́же писа́ний не послу́шаху, ни мертвецы́ у́бо ви́дяще воскреша́емы, я́ша ве́ры, но и Ла́заря уби́ти хотя́ху, его́же от ме́ртвых возва́ Христо́с. И в распя́тие мно́гим воста́вшим ме́ртвым, они́же па́че лю́тее творя́ху, апо́столы бо Христа́ имену́юща, поби́шя. Поне́же а́ще бы сие́ по́льза на ве́ру, то бы Госпо́дь твори́л ча́сто. Ны́не же всех поле́знее, от писа́ний и́стинна уве́дати. И а́щебы ме́ртвым воста́яти, мно́гих бы дия́вол прельсти́л мечта́нием свои́м. Нам же Госпо́дь писа́ние на утверже́ние пре́дал. Я́ко свет просвеща́я всех, си́це и писа́ние нас. Ничего́ же у́бо дия́вол измудри́ти такова́го возмо́жет. Писа́ние бо вся неприя́зниваго обнажа́ет се́ти. И того́ слу́шающе, спасе́мся, а не иска́ти ме́ртвым воскресе́ния. Иде́же пра́веднии водворя́ются, во све́те ра́дости ве́чныя присносу́щныя. А гре́шных же оби́тели мно́га разстоя́ния и́мут.

Сих у́бо и мы подража́ем, не ктому́ мне ко всем сло́во, но к жела́ющым нача́льства. А́ще ве́руеши, я́ко Бо́жие есть избира́ние, да не негоду́еши. На о́наго бо негоду́еши, и проти́ву о́ному гне́ваешися. Он есть избра́вый. А́ще же той у́бо избра́л есть, ты же сме́еши на сего́ негодова́ти, то́жде твори́ши, яково́ же Ка́ин. Подоба́ше бо воприя́ти, е́же Бо́гу уго́дно бысть, сей же, зане́ предпочте́нна бысть же́ртва бра́тняя, оскорби́вся, негодова́, подоба́ше умили́тися. Аз же не сие́ глаго́лю, но я́ко о по́лзе ве́де по смотре́нию стро́ити Бог. Мно́жицею бо, нра́вом у́бо кротча́йш еси́ ты, неизря́ден же. Па́ки есть тебе́ у́бо житие́ безпоро́чно, и нрав свобо́днич, в це́ркви же не тех то́кмо тре́бе есть. И́накоже, и ин ко ино́му прили́чен есть. Не зри́ши ли ели́ко о сих сотвори́ло есть сло́во, боже́ственное писа́ние. Но да реку́ чесо́ ра́ди съпре́телна вещь сия́ бысть; Зане́ не я́ко на нача́льство и предста́тельство бра́тии прихо́дим, но я́ко на честь и упокое́ние. А́ще бо ве́дал бы еси́, я́ко всем до́лжен есть бы́ти епи́скоп, всех бремена́ нося́, я́ко ине́м у́бо гне́вающымся проще́ние есть, тому́ же нигде́же, я́ко ине́м согреша́ющым изве́т есть мно́гий, сему́ же не ктому́, то не бы потща́лся еси́ нача́льство сие́, не бы поте́кл еси́. И́бо сей всех подлежи́т усто́м, всех судово́м, и му́дрых и нему́дрых. Печа́лми на ко́ждо ураня́ем быва́ет день, на ку́юждо нощь. Бо́гу на́шему сла́ва и ны́не и при́сно и во ве́ки веко́в.

Наче́ншу у́бо зда́ти Евсе́вию епи́скопу це́рковь в Пилу́сии посла́ к Си́дору пусты́нику. Прося́ благослове́ния от писа́ему си́це, зи́жеши я́ко ре́ша це́рковь в Пилу́сии, све́тло у́бо козньми́ зло же начи́нии. И непра́вдами и досаже́нием и убо́гим и ни́щих сконча́ние. Е́же несть и́но но я́ко зи́ждай сио́на в кро́вех Иерусали́ма, в непра́вдах не тре́буеть же Бог от чужи́х же́ртьвы, но я́ко закала́ема пса на тре́бу ненави́дит. Преста́ни у́бо зи́жай непра́вдуя. Да не храм таковы́й на обличе́ние твое́ обря́щется пред Бо́гом укра́шен и высо́к стоя́ вопия́же на тя в ве́ки к Бо́гу, не премо́лчно и со ере́ими, го́ре зи́жущим дом свой на высоту́ с непра́вдою. И се́рдце его́ вне разсуже́ний от бли́жняго де́лати ту́не. И мзды его́ не отда́сть. Обы́чай зол стяжа́в улиша́я стра́жущих на и́ма и сам от Бо́га своея́ мзды лише́н бу́деть. Ви́дець бо есть дел рук челове́ческ. И не утаи́тся от Него́ ничто́же. Госпо́дь вся ви́дит, о́чи бо Его́ мно́жицею со́лнца светле́йша. Призира́я ищи́ тая́ пути́ вся челове́ческая, испыта́я сердца́ и утро́бы, не скры́ется пред Ним ни еди́но сло́во. Ни де́ло челове́че. Те́мже пра́вдою поживе́м да благода́ть восприи́мете.