Свята́я му́ченица И́я, бе от гра́да глаго́лемаго Виза́да. В плен же я́та бысть с девятию́ ты́сящь христиа́н от перс, Саво́рием беззако́нным царе́м. Оклевета́на же бы́вши, я́ко Христу́ покланя́ется, и предана́ бысть старе́йшине волхво́в, и́же пону́ди ю́ отврещи́ся Христа́. И не то́кмо не покори́ся, но и пору́ган бысть от нея́. Тем в темни́цу ве́ржена бысть, и ле́то все гла́дом беди́ма. Посе́м изведена́ из темни́цы, и бие́на бысть кре́пко сукова́тым же́злием. И па́ки затворена́ бысть в темни́це: и пребы́сть ме́сяц пятна́десять. И па́ки изведена́ из темни́цы, и свя́зана бысть вервьми́. Го́лени же, и бе́дре, и ру́це, стя́жене бы́сте заверте́нием ту́го, я́ко и ко́стем ея́ троскота́ти. И посе́м би́ша ю́ реме́нием су́ровы ко́жи, по ля́двиям и по чре́ву. И посе́м усе́кнуша главу́ ея́.