По шестой песни:
И поется кондак и икос (или мученичен, аще несть).Стихи́:
И о́браз и ум у му́жа Феодо́ра:
В пе́рвый на́десятый после́дним сном Феодо́ра у́спе.
В боже́ственей кни́зе Заве́та Но́ваго, я́ко сравни́тися рече́, деви́цам десяти́м Ца́рствия небе́снаго Христо́вых уст. Му́жеским о́бразом жен де́сять притупи́ша жа́ла человекоуби́йцева, дар боже́ственый получи́вше, и зва́нием еди́нем нарица́емая бе́яше от таковы́я ве́си Алекса́ндрьския, и уже́ зако́нно припле́тшейся супру́гу, и благоучи́нно провожда́ющи небла́знено житие́. За́вистию же бе́са, вся́кому злу ра́да, грехолюби́деивому тогда́ впа́дши, поразуме́вши и спасе́ние и́щущи, и ева́нгельский глас Госпо́день слы́ша так: и́же ни весьма́ утаи́тися а́ще и скро́вен, я́ко погреши́вшей си, терпя́щи и про́чее я́ко уве́девшей грех, я́ко не́нависть нечи́стую, я́ко мерзость, и оде́жду студу́ отве́ргши, и я́ко Фео́дор а́нгельскую оде́жду прии́мши, е́юже прише́дши к безсупру́жному ли́ку, пла́чущи и рыда́ющи о гресе́х на мно́гая ле́та, рабо́ты тя́жкия стра́ждущи и рабо́тающи с наи́мники. Слы́ша блудни́к бы́ти обличе́нием сицевы́м, младе́нца той наметну́вшим, из оби́тели ту́ю изгна́ша, за́вистию душетли́теля зми́я нанесе́наго от ино́го кого́. И́же и прии́мши и́, пита́ше и́ приле́жно, тща́щися утаи́тися, я́ко жена́ су́щи естество́м, студе́нию и ва́ром со́лнечным сла́бостию терпя́щи вся́кая благода́тию. Седми́жды томле́на бы́вши клевето́ю, сни́де когда́ в оби́тель ну́ждно. Се я́ко жена́ воображе́нием, но па́ки му́жеским а́бие сама́ ча́стыми моли́твами и труды́ иста́явши те́ло, стоя́нием всено́щным, Госпо́дне прии́мши вы́шнее насле́дие. И гоня́щи дости́же Его́же любля́ше, и стра́шно чудотворя́ше. Кто уже́ не диви́тся жены́, утаи́вшися от мно́жества мужи́й безсупру́жных, я́ко еди́на от них среде́ сбо́ра, по́стнически просия́вшая я́ко свети́ло ве́лие, досто́йныя принося́ще по́чести труды́, отъи́де с ра́достию к Боже́ственому Жениху́. И́ноцы же чу́до сие́ стра́шное ви́девше, удиви́шася: О́ле стра́шному виде́нию!
В то́йже день святы́я му́ченицы И́и
Свята́я му́ченица И́я, бе от гра́да глаго́лемаго Виза́да. В плен же я́та бысть с девятию́ ты́сящь христиа́н от перс, Саво́рием беззако́нным царе́м. Оклевета́на же бы́вши, я́ко Христу́ покланя́ется, и предана́ бысть старе́йшине волхво́в, и́же пону́ди ю́ отврещи́ся Христа́. И не то́кмо не покори́ся, но и пору́ган бысть от нея́. Тем в темни́цу ве́ржена бысть, и ле́то все гла́дом беди́ма. Посе́м изведена́ из темни́цы, и бие́на бысть кре́пко сукова́тым же́злием. И па́ки затворена́ бысть в темни́це: и пребы́сть ме́сяц пятна́десять. И па́ки изведена́ из темни́цы, и свя́зана бысть вервьми́. Го́лени же, и бе́дре, и ру́це, стя́жене бы́сте заверте́нием ту́го, я́ко и ко́стем ея́ троскота́ти. И посе́м би́ша ю́ реме́нием су́ровы ко́жи, по ля́двиям и по чре́ву. И посе́м усе́кнуша главу́ ея́.
В то́йже день страсть святу́ю му́ченику Диодо́ра и Диди́ма
Стихи́:
Диодо́р к уби́тию с Диди́мом
Телеса́ пода́вше, пре́лесть уби́вше.
Свята́я му́ченика Диодо́р и Диди́м, бе́ста от гра́да Лаодики́и Си́рския. Христиа́на же су́ща, и уча́ста о и́мени Господа на́шего Иису́са Христа́, сотво́ршаго не́бо и зе́млю, и мо́ре, и вся я́же в них. И мно́ги от неве́рных к Бо́гу обраща́юща, и креща́ста. Оклевета́на же бы́ста злочести́выми е́ллины, к лаодики́йскому кня́зю, и предста́ста суди́щу его́. Вопроше́на же бы́вша, и себе́ христиа́на нареко́ста. Кре́пко же и на мно́зе му́чена бы́ста, и Христа́ не отверго́стася, но и па́че лесть и́дольскую обличи́ста, и кня́зя я́ко беззако́нна поплева́ста, и обличи́ста, и укори́ста, я́ко Бо́га и́стинна оста́вль, и лжи́вым бого́м кла́няешися ре́ста. И та́ко благода́рствующа, и моля́щася Бо́гу, в тех му́ках и умро́ста.
В то́йже день поуче́ние свята́го отца́ Фео́дора, игу́мена Студи́йскаго, е́же не отча́ятися свои́ми грехи́ Бо́жия ми́лости
Ничто́же проти́вно хотя́щему спасти́ся, ни сумне́ния обдержа́й, а́ще и в после́дний вид злых грехо́в впаде́т, вои́стинну глаго́ля: по́слуси бо сему́ суть мно́зе, и́же о Дави́де старе́йшине разбо́йником: как бе пе́рвие человекоуби́йца и всего́ зла испо́лнен, и как пока́явся мни́шеский взя о́браз, и бысть искуше́н, и от диа́вола насиля́емыя исцеля́ше. Рече́ бо а́нгел к нему́: «Дави́де, Дави́де! Отпусти́ Госпо́дь Бог грехи́ твоя́». Не то́чию же прости́ его́, но и чудотво́рца показа́. Хо́щеши ли и друга́го ви́дети? Виждь Манаси́я, и́же на 50 и два ле́та преврати́ Изра́иля служи́ти безду́шным ка́пищем. И той в ма́ло дний пока́явся, спасе́ся и возда́ хвалу́ Бо́гови, ю́же и доны́не пою́т Бо́жия це́ркви. И па́ки боже́ственый Дави́д по любодея́нию и разбо́и, и проро́ческий прия́ дар. Мари́я же Еги́птяныня по несы́тстве грехо́внем во а́нгельский дости́же о́браз и проро́чества сподо́блена бысть. И ини́и мно́зи па́дшеся грехи́, покая́нием воста́ша.
Те́мже никто́же никогда́же не отча́имы себе́, но потщи́мся покая́нием дости́гнути спасе́ния. Того́ ра́ди и мы, бра́тие, бодрели́вейше бу́дем и благонаде́жно ве́рующе, я́ко а́ще Бог в пучи́ну грехо́в впа́дшая безме́рным человеколю́бием поми́лова и призыва́я спаса́ет, кольми́ па́че нас предстоя́щих Ему́ спасе́т.
И да никто́же рцы, слы́ша сия́: А́ще та́ко соде́явше та́ко прия́ти бы́ша Бо́гом, то и всех нас поми́лует невостягнове́нно от страсти́й живу́щих. Не помышля́йте сих: они́ бо по отпуще́нии а́нгельски пожи́ша. А невостягнове́нно пожи́вшеи зде, свои́ми су́дятся со́вестьми и в бу́дущий век осужда́еми му́чатся без конца́: поне́же восприя́ша сбира́емая тле́ющая скро́вища, стона́ти у́бо и пла́кати подоба́ет таковы́х. Ничто́же есть наслажде́ние све́та сего́ проти́ву му́це согреша́ющих.
Те́мже бра́тие, подви́гнемся на покая́ние, прося́ще отпу́ста грехо́в, ра́дуимся друг о дру́зе, спе́ющим к Бо́гу терпе́нием и покоре́нием и сдоле́нием плотски́х по́хотий, е́же есть второ́е муче́ние, да те́ми сверше́ни насле́дницы бу́дем ве́чныя жи́зни.