Да есте́ ве́дуще, бра́тие, я́ко в сей день пост пред пра́зднеством Госпо́дним. Того́ же ра́ди пост есть, да с гове́нием и чистото́ю собере́теся в це́рковь в шесты́й час, гнев попра́вше, плотски́я скве́рны очи́стивше, и вся неподо́бная дела́ отве́ргше, да досто́йни бу́дем устна́ми чи́стыми и се́рдцем непоро́чным причасти́тися Те́ла Бо́жия, в не́же нас деля облече́ся и обнища́ во́лею. Ви́дя ны зло́бою грехо́вною погружены́ и де́лы безсту́дными дия́волу порабо́тившася, не мо́же нас зре́ти в толи́ко зло впа́дшихся. Прекло́нь небес́а, сни́де, без поро́ка и без приме́са во утро́бу Пречи́стыя Де́вы всели́ся, Сло́во Бо́жие безнача́льное пло́тию Челове́к бысть, и сугу́б естество́м челове́ческий род обнови́ти хотя́ и в пе́рвую поро́ду ввести́, из нея́же бе́хом отпали́, врага́ послу́шавше, и за́вистию прелга́в, пра́деда на́шего Ада́ма, пе́рваго челове́ка, в сме́ртное житие́ вве́рже. Да того́ ра́ди сни́де к нам Сын Бо́жий, Безнача́льный, без конца́, без нача́ла, от Отца́ без ма́тере пе́рвое име́ рождество́, второ́е же нас де́ля без отца́ от Ма́тере воплоти́ся. Его́же воплоще́нию ра́дующися, пра́зднуим па́мять пречи́стых его́ пра́дед по пло́тному рождеству́, мню же вели́каго Авраа́ма, Исаа́ка, Иа́кова, и́хже имена́ евангели́ст помяну́, и еще́ же во проро́цех ди́внаго Дании́ла и о́троки три, Ана́нию, и Аза́рию, и Мисаи́ла. Ве́рою я́ко во броня́ обо́лкшеся, и я́рость звери́ну укроти́ша. Ве́ра с чистото́ю спле́тшися, нетле́нными венцы́ увязе́ Христо́вы му́ченики и пра́ведники, и́же ве́рою и де́лы до́брыми дру́зи Бо́гу нареко́шася. Се же им бы́ша дела́: стра́нныя приима́ху, наги́я одева́ху, те́мже и па́мять их тресве́тла. Да и мы, бра́тие, тем до́брым дело́м поревну́им и подви́гнемся сотвори́ти я́, да бу́дем дру́зи Бо́гу и сы́нове Ца́рства Его́. Та́цы бе́ша и ти́и пло́тяне челове́цы, я́коже и мы, но пло́тнаго уго́дия возненави́деша и устроиша телеса́ своя́ не на сла́сти плотски́я, не на пите́ние, ни на спа́ние, но на поще́ние, и на бде́ние, и на поклоне́ние при́сно. И тем ти досто́ит ревнова́ти, а не та́тем, ни пия́ницам, ни злоде́ем, и́мже есть угот́ована му́ка со дия́волом, от нея́же да изба́вит ны Госпо́дь Бог наш, Ему́же сла́ва, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.