Стихи́:

Бие́ма пе́рвее боле́зньми Евге́ния,

Червлени́цу обагри́вши ца́рскую от меча́.

Та бя́ше в ца́рство Комо́дово, дщи Фили́ппа, епа́рха Ри́мскаго. Отцу́ же ея́ во Алекса́ндрию Коми́дом поста́влену бы́вшу, да и та́мо епа́рх бу́дет, и поне́же со всем до́мом по́йде, и́де и свята́я Евге́ния с ним, и та́мо научи́ вся́кое писа́ние, е́ллинское и христиа́нское. Елма́ же получи́вши посла́ние Па́вла апо́стола, и проче́тше сию́, и уви́девши су́етие ми́ра сего́, его́же и всесерде́чно оста́вивши, и в му́жа преобразивши себе, со двои́ма скопцы́, и к монастырю́, и́же пред Александри́ею, дости́гши, и прия́та бысть епи́скопом Елео́ном (Ели́ном). И боже́ственое прии́мше креще́ние, и и́же с не́ю су́щим, и мни́шескому чи́ну сподо́бившися, и по не́коему вре́мени вручена́ бысть игу́мении и мно́га чудеса́ сподо́бися твори́ти: тем и не́которей жене́ боля́рине, Мела́нтии нарица́еме, - стра́ждущую неду́гом не́которым, и исцели́ ю́. Пото́м обо́лгана бысть от нея́, я́ко ко смеше́нию блу́дному ту́ю ну́дящи, и ко епа́рху Фил́иппу ту́ю оклевета. О́ному же преподо́бную предста́вльшу, и вся́ко яви́ся о ней и́стина. Не то́чию бо во о́бразе му́жестем жена́ су́щи показа́вшися, но я́ко та сама́ дщи епа́рхова. Те́мже отца́ и ма́терь, и мно́гих ины́х ко Христо́ве ве́ре приведе́. И уже́ тоя́ оте́ц, чин епа́ршеский отложи́в, и крести́ся, и епи́скопом поста́влен бысть, и посе́м муче́нию коне́ц прия́т: напа́дшим нань неве́рным, и закла́ша его́ ноже́м в це́ркви. Свята́я же Евге́ния в Рим приведена́ бысть, с ма́терию и с бра́тиею, и со Про́тием (Прота́сием) и Аки́нтом (Иаки́нфом), ка́женика бы́вша, я́же от нача́ла с не́ю пострада́вшу. И́же и главы́ ею́ отсеко́ша, святе́й же ка́мень навяза́вши тя́жек, и во Фириа́дскую (Тивериа́дскую) реку́ вверго́ша, и отну́дь сохранена́ бысть, ме́чную восприя́т кончи́ну.

1.        От благоро́дия, я́ко благочти́ва не́кая ветвь, 2.        Про́йде Евге́ние, сла́ва родска́я. 3.        От Ри́ма же сама́ ве́тхаго прозябе́, 4.        Роди́телема же, от Алекса́ндрьскаго гра́да, от цари́ честь прии́мшу, 5.        И́же благоро́дное породи́вши со супру́гою, 6.        Прело́ждьшим в Александри́йский град. 7.        Утаи́вшися всех со обои́ми слуга́ми, 8.        Изы́де но́щию и бежавши Евге́ние. 9.        Прите́кши к не́коему епи́скопу му́жеским воображе́нием, 10.    Омы́вшися ба́нею боже́ственою, и остри́гши власы́, 11.    Евге́ние зва́ние получи́вши, 12.    Тече́ к прибы́тку, иде́же крести́вшися ́утро воско́ре, 13.    Пре́йде ко вся́ким доброде́тельным трудо́м, 14.    По́двиги и страстьми́ и предстоя́нием всемоле́бным. 15.    Больми́ просия́, я́ко свети́ло ве́лие, 16.    Я́ко бра́(т)я и засту́пницы хра́му, 17.    Моля́щимся получи́ти и сохрани́ти, 18.    И е́же заступа́ти изоста́вшися до́лу, 19.    Словесы́ уми́льшися распале́нием лю́бве, 20.    Спасти́ не хотя́щи ну́ждею. 21.    Си́це Евге́ние высо́кое сло́во показа́ вся́ким светле́йша и вели́ка 22.    Де́йствием вся́ким и еди́нем боговиде́нием 23.    Во отда́ние(м) до́брым взо́ром. 24.    Но(По) помраче́на душе́ю Мелани́фия, 25.    Сочта́ние су́щи людско́е, 26.    Увы́ и ме́рзости! 27.    Я́ко ви́девши Евге́ния красна́ естество́м, 28.    Раче́нием лю́тым содержи́ма бысть взо́ру, 29.    То́щную при́тчу приве́дши недале́чна нед́уга. 30.    Евге́ние же сокруше́ние сердеч́ное льсти́вым Мела́нтиевым рече́м, 31.    И просте́ртия прише́дшу, я́ко Бо́жию дру́гу, 32.    Собесе́дова и не позна́ пре́лесть. 33.    Я́коже у́бо рождеже́нию Мела́нтиину бо́льшее, 34.    Запали́ разгоре́нием ко раче́нию серде́чному. 35.    Я́ко сле́па замжи́вши о́чи, 36.    Нахожде́ние соде́я зажде́ни стра́сти, 37.    И не получи́вши хоте́ния, отпаде́. 38.    Си́це а написа́ на Евге́нию: 39.    Я́ко хра́мины о́нсица боже́ственый засту́пник. 40.    Жены́ честны́я преблажня́ет льсти́выми словесы́, 41.    Ко мне до́йде, блудни́к сын(й) дерзнове́нен, 42.    Но не получи́, сохра́ньшему Влады́це. 43.    Епа́рх у́бо, и отрокови́цы сый оте́ц, 44.    А́бие слы́шав гне́ва испо́лнися весьма́, 45.    Ко хра́му посла́в на мно́зе ско́ро, 46.    Евген́ию, и́же хра́му засту́пница, 47.    И мни́хи, я́ко осужде́нным и свя́заны, 48.    И лжеслужи́теле, или́ бо́льше злоде́лательники, 49.    Суди́щу епа́ршескому предста́ви, 50.    Словесы́ бесе́дуя отве́товает судии́. 51.    Я́ко у́бо предста́ша с обапо́л суду́, 52.    Наче́нше а́бие Мела́нтие бесе́ды, 53.    И доса́ды излива́ющи на боже́ственаго заступи́теля, 54.    Пове́дающи и оболга́ющи крамо́льно, 55.    И прилучи́вшимся свере́пыми словес́ы, 56.    Вопию́щи и показа́ющи друго́м, 57.    Персто́м намиря́ющи я́ко и ненави́стна де́лателя, 58.    И е́же нань растли́теля и дерзнове́нно глаго́лющия, 59.    Вельми́ крича́щи и пове́дающи: 60.    Вси сие́ послу́шайте, и́стинну кажу́ 61.    Твое́й о́бласти, влады́ко вседе́ржьче! 62.    И а́бие же Евге́ние ри́зы растерза́ напра́сно, 63.    А́бие показа́я, чу́до стра́шно и ужа́сно, 64.    И прише́дшим наважда́ет дерзнове́нно. 65.    Сия́ же вослу́х всем изрече́: 66.    Подоба́ет всем вам благода́рствия принести́ 67.    За доса́ды же и сме́ха, и зло́бы теле́сныя. 68.    Но да небреже́ние смех бу́дет: 69.    Аз жена́ естество́м есмь, дщи 70.    Отца́ моего́ и судии́ возлю́бленного, 71.    Ма́ти же его́ супру́жница, роди́вшия мене, 72.    Сих же бра́тию и рабы́ вменя́ю. 73.    Сия́ же изре́кши до́брое Евге́ния, 74.    Вси ужасо́шася, о́ чу́до ди́вно! 75.    Мела́нтию же свы́ше боже́ственый суд нападе́, 76.    И́же вся́кий слы́шав, кто не удиви́тся? 77.    Оте́ц же ея́ сла́ву а́бие ку́пно, 78.    И бога́тство, и жити́йскую красоту́ 79.    И рожде́ние оста́вив, проважда́ется чу́дно. 80.    Па́стырь же ве́рным показа́ся и́же во гра́де, 81.    Му́ченический проше́д коне́ц житию́, 82.    Неве́рными побие́н му́ками, 83.    Ра́дуяся взы́де ко оби́телем небе́сным. 84.    Ма́ти же воско́ре со дще́рию возлю́бленною, 85.    Страну́ чу́жду оста́вльши, оте́чество 86.    Полюби́вши, всели́ся в то́йже па́ки. 87.    Повеле́нно изше́дши христиа́ном и поклони́тися и́долом, 88.    Или́ зло́ю сме́ртию тем помират́и, 89.    Просия́вши во всех явле́нно Евге́ние Христо́вою любо́вию. 90.    Тя́жку зело́ камени привя́зана бы́вши, 91.    И в во́ду вве́ржена, 92.    И пресла́вно невреди́ма бы́вши, 93.    Мече́м главу ей отсеко́ша, 94.    Стра́стную кончи́ну восприя́т, 95.    Ра́дующися взы́де к люби́вому Жениху́.

Преподо́бный оте́ц наш Николай, и́же пре́жде воево́да бе, и во́ины под собо́ю име́. Не́когда у́бо Ники́фору царю́ Ге́нику воева́вшу на болга́ры, изы́де и той со свои́ми. И иды́й к ве́черу, и вни́де в гости́нницу, и вечеря́в с гости́нником, и помоли́вся, ля́же спа́ти. Ко вторе́й же, и тре́тией стра́жи нощне́й, дщи гости́нникова, сатани́нским раче́нием уязви́вшися, потокши праведнаго, и к скве́рному смеше́нию влеку́щи. Святы́й же к ней рече́: Преста́ни же́но от сатани́нскаго неи́стовнаго раче́ния, и не похощи́ оскверни́ти своего́ де́вства, и мене́ окая́ннаго во глубину́ а́да низвести́. Она́ же вма́ле отступи́: и па́ки пома́ле прише́дши, ну́дяше пра́веднаго. Святы́й же втори́цею о́ну отсла́. Она́ же па́ки отъи́де, клегча́ющи раче́нием, и па́ки к нему́ дойде. Тогда́ святы́й глаго́ла к ней: Окая́ннице, и вся́кого студа́ и неистовле́ния испо́лненая, не ви́диши ли я́ко бе́сове тебе́ возмуща́ют, да твою́ ду́шу в му́ку ври́нут: и твое́ де́вство да растля́т, и смех и поноше́ние всем, твоему́ сро́дствию поста́вят тя? Не ви́диши ли яко аз ме́ньший к язы́ком ва́рварским к кровопроли́тию ше́ствую: и Бо́гу укрепля́ющу мя, ка́ко убо оскверню́ те́ло мое́, к бра́ни мне иду́щу? Сия́ и друга́я не́кая к сей безсту́дней рек, отсла́ ю́. Воста́в же и помоли́вся, по́йде в путь свой. В настоя́щую же па́ки нощь спя́щу ему́, ви́де себе́ в прозра́чне ме́сте стоя́ща, и близ его́ си́льна Не́коего седя́ща, и десне́й но́зе на ле́вей лежи́ме, и рече́ к нему́: Ви́диши ли со обои́х стран во́я? О́ному же отвеща́вшу: Ей Го́споди ви́жу, я́ко гре́цы секу́т болга́р. И глаго́ла Ви́димый к пра́ведному: Погляда́й к нам. И погляда́в ви́дев О́ного, поло́жша десну́ю но́гу на ле́вую, ле́вую же но́гу на десну́ю. Сему́ же бы́вшу, и обозре́вся пра́ведный к во́ем, и ви́де супроти́вныя неща́дно секу́щих гре́ки. И по преста́нии се́чи, рече́ Си́льный Он к пра́ведному: Разсмотри́ испы́тно се́чу телесе́м, и глаго́ли, что ви́димое. Он же озре́вся, ви́де я́вльшуюся ему́ зе́млю, всю ме́ртвых теле́с испо́лнену, и среде́ всех ели́ко лещи́ му́жу, ме́сто зла́чно пра́здно. И глаго́ла ему́: Го́споди вся земля́ я́же неща́дно посе́ченых грек испо́лнена есть, кроме́ е́же еди́ному лещи́. Тогда ви́димый Он Стра́шный рече́ к во́ину: И ты у́бо что мы́слиши о сем? Он же отвеща́: Неве́жда и препро́ст есмь Го́споди, и не разуме́ю о сем. И па́ки к нему́ Стра́шный глаго́ла: О́но ме́сто земля́ зла́чна и пра́здна, ю́же ви́диши, еди́наго му́жа ло́же иму́ща, тебе́ то́кмо есть. На той хотя́ше и ты посе́чен лещи́ со друже́бники свои́ми, и́же такову́ю пра́здность испо́лнити. Но зане́же в мимоше́дшую нощь, триплете́ннаго о́ного зми́я, е́же на скве́рное смеше́ние, три́жды бори́вшагося с тобо́ю, и уби́ти хотя́ща тебе́, удо́бно от себе́ отри́нул еси́. Се уже́ ты сам себе́ от посече́ния свободи́л еси́, и по́льское о́но ло́же без ча́сти сотвори́л еси́, и ду́шу твою́ с телесе́м спасл еси́. Про́чее ниже́ есте́ственная тебе́ смерть облада́ти и́мать, я́ко при́сно Мне порабо́таеши. Сия́ ви́дев и тре́петен быв, возбну́в, и встав помоли́ся. И еди́ного дне разстоя́нием возврати́ся, и взы́де на гору́, и моли́твуя, моля́шеся Бо́гу о во́ех. И вшед царь Ники́фор в клису́ры болга́рския, и внидо́ша в гору́ болга́ри, оста́вльше от себе́ до дву́десяте ты́сящь и мно́жае: и́хже изсеко́ша гре́цы. И разбуя́вшеся без воздержа́ния ко всем напа́дше. И та́ко по ма́ле гре́честии полки́, и си́ла вся уби́йством в поги́бель бысть: то́чию с царе́м Ники́фором, Бо́гу попусти́вшу ма́ло не́что от них возврати́вшымся. Тогда́ пра́ведный виде́ние воспомяну́в, и Бо́га благода́рствив, возврати́ся, отню́д пла́чася и рыда́я о во́ех. И прише́д в монасты́рь, прии́м святу́ю схи́му, и Богу приле́жно порабо́тав, в ле́тех дово́льных: бысть прозорли́в, и вели́к оте́ц.

Да есте́ ве́дуще, бра́тие, я́ко в сей день пост пред пра́зднеством Госпо́дним. Того́ же ра́ди пост есть, да с гове́нием и чистото́ю собере́теся в це́рковь в шесты́й час, гнев попра́вше, плотски́я скве́рны очи́стивше, и вся неподо́бная дела́ отве́ргше, да досто́йни бу́дем устна́ми чи́стыми и се́рдцем непоро́чным причасти́тися Те́ла Бо́жия, в не́же нас деля облече́ся и обнища́ во́лею. Ви́дя ны зло́бою грехо́вною погружены́ и де́лы безсту́дными дия́волу порабо́тившася, не мо́же нас зре́ти в толи́ко зло впа́дшихся. Прекло́нь небес́а, сни́де, без поро́ка и без приме́са во утро́бу Пречи́стыя Де́вы всели́ся, Сло́во Бо́жие безнача́льное пло́тию Челове́к бысть, и сугу́б естество́м челове́ческий род обнови́ти хотя́ и в пе́рвую поро́ду ввести́, из нея́же бе́хом отпали́, врага́ послу́шавше, и за́вистию прелга́в, пра́деда на́шего Ада́ма, пе́рваго челове́ка, в сме́ртное житие́ вве́рже. Да того́ ра́ди сни́де к нам Сын Бо́жий, Безнача́льный, без конца́, без нача́ла, от Отца́ без ма́тере пе́рвое име́ рождество́, второ́е же нас де́ля без отца́ от Ма́тере воплоти́ся. Его́же воплоще́нию ра́дующися, пра́зднуим па́мять пречи́стых его́ пра́дед по пло́тному рождеству́, мню же вели́каго Авраа́ма, Исаа́ка, Иа́кова, и́хже имена́ евангели́ст помяну́, и еще́ же во проро́цех ди́внаго Дании́ла и о́троки три, Ана́нию, и Аза́рию, и Мисаи́ла. Ве́рою я́ко во броня́ обо́лкшеся, и я́рость звери́ну укроти́ша. Ве́ра с чистото́ю спле́тшися, нетле́нными венцы́ увязе́ Христо́вы му́ченики и пра́ведники, и́же ве́рою и де́лы до́брыми дру́зи Бо́гу нареко́шася. Се же им бы́ша дела́: стра́нныя приима́ху, наги́я одева́ху, те́мже и па́мять их тресве́тла. Да и мы, бра́тие, тем до́брым дело́м поревну́им и подви́гнемся сотвори́ти я́, да бу́дем дру́зи Бо́гу и сы́нове Ца́рства Его́. Та́цы бе́ша и ти́и пло́тяне челове́цы, я́коже и мы, но пло́тнаго уго́дия возненави́деша и устроиша телеса́ своя́ не на сла́сти плотски́я, не на пите́ние, ни на спа́ние, но на поще́ние, и на бде́ние, и на поклоне́ние при́сно. И тем ти досто́ит ревнова́ти, а не та́тем, ни пия́ницам, ни злоде́ем, и́мже есть угот́ована му́ка со дия́волом, от нея́же да изба́вит ны Госпо́дь Бог наш, Ему́же сла́ва, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.