Мно́гаго бо воздыха́ния и уны́ния житие́ на́ше есть, и тле́нен есть мир сей. Наказу́ет Бог пре́жде уче́нием ду́ши челове́чески, я́ко мир ме́ртвен и жили́ще умира́ющих есть. О́вем убо причта́вшимся бра́ку скве́рныя ра́ди по́хоте и устремле́ния зла́го, и любви́ не́кия злы́я смуща́ющи: те́мже при́тча нам друга́я и печа́ль, хоте́ние де́тий, и пото́м о воскормле́нии и о наказа́нии, и о жене́ хране́ние, и о дому́, и о рабе́х заступле́ние; с сусе́ды свар; и тяза́ние о име́нии; беды́ о де́тех и труже́ние, и ки́й́ждо день прихо́дит, свое́ принося́ омраче́ние. Но́щию же прие́млющи дневны́я печа́ли, и те́ми мечты́ прельща́ется ум челове́ческий, в печа́лех и во зло́бах погряза́ет во окая́нстве жития́ своего́. Бо́гу на́шему сла́ва, ны́не и при́сно и во ве́ки веко́в. Ами́нь.