Сей, взыска́нию бы́вшу не́когда между́ иуде́и, и фарисе́и, и саддуке́и, и е́ллины о Го́споде на́шем Иису́с Христе́, и о́вем глаго́лющим, я́ко проро́к есть, и ине́м, я́ко льстец есть, други́м, я́ко Сын Бо́жий есть, став же Стефа́н на высоце ме́сте, благовествова́ всем Го́спода на́шего Иису́с Христа́, рек: Му́жи и бра́тие, вску́ю умно́жишася в вас зло́бы, и размеси́ся весь Иерусали́м? Блаже́н челове́к, и́же ве́рова в Го́спода на́шего Иису́с Христа́. Той бо есть «Преклонив́ый небеса́ и Соше́дый» грех ра́ди на́ших и роди́ся от Деви́цы Святы́я, Чи́стыя, и Избра́нныя пре́жде сложе́ния ми́ру. «Той не́мощи на́ша взят, и неду́ги понесе́»: слепы́я бо сотвори́л есть прозира́ти, прокаже́нныя очи́сти, и бе́сы прогна́.

Они́ же слы́шавше его́, весь сонм архиере́ов, «не можа́ху бо сопроти́вится прему́дрости и Ду́ху, е́же глаго́лаше». И вше́дше, приведо́ша му́жи не́которыя, глаго́лющая, я́ко слы́шахом сего́ беседующа глаго́лы ху́льныя на ме́сто свято́е и на зако́н, и про́чая собесе́довавше, я́коже в свяще́нных Дея́ниих Апо́стольских изоблича́ется. Воззре́вше же нань вси, и ви́деша лице́ его́, я́ко лице́ а́нгелово. И срамоту́ и уко́ру не терпя́ще, ка́мением побива́ху его́, моля́щуся ему́ и глаго́лющу: «Го́споди, не пост́ави им греха́ сего́».

И поне́же изря́дно, ра́ди мни́маго ему́ па́дшемуся телеси́, боже́ственый первому́ченик Стефа́н сопроти́вника низложи́в, и сла́дким сном почи́в. Ску́тано же бысть свяще́нное те́ло его́ благочести́выми му́жи, в ра́це соде́ланней затверди́вше, и близ це́ркве положи́ша. Зако́ну учи́тели же Гамалеи́л и сын его́ Аве́лие ве́роваша во Христа́, и от апо́стола креще́ни бы́ша. Соверша́ет же ся собо́р его́ в его́ муче́нии, близ Константиа́н.