Прекосло́вие и безсту́дие и́гом зло́бы затяза́ется. Прекосло́вец бо ра́вен есть презо́ривому. Хо́щет бо всегда́ одолева́ти и́стине, ча́сто проти́вится, хотя́й старе́й быти, не помы́сля пи́санаго в Зако́не, яко противишася Моисе́ови Коре́й, и Дафа́н, и Авиро́н. И разгне́вася Бог на ня, и отве́рзеся земля́, и пожре́ я́ и сове́тники их. Прие́млющии бо власть о свое́й си́ле без Боѓа, и проти́вящися су́щи от Бо́га вла́сти, таце́м ка́знем пови́нни суть. Пи́шет же и Па́вел о е́терех прекосло́вцех си́це: «Я́коже Ианни́й и Иамври́й проти́вистася Моисе́ю, та́ко и си́и проти́вятся и́стине, челове́цы растле́вшии умом, неискуше́ни о ве́ре». Та́ко и в Дея́ниих Апо́стольских Ели́ма волхв проти́вяшеся Па́влу и Варна́ве, ища́ разврати́ти анфипа́та от ве́ры, и а́бие ослепе́. И па́ки, присыла́я к Тимофе́ю, рече́: «Алекса́ндр ко́вач мно́го ми зла сотвори́: да возда́ст ему́ Госпо́дь. Его́же и ты храни́ся: зело́ же проти́вится на́шим словесе́м». И се прия́ прекосло́вия возда́ние. И проро́к Михе́я, рыда́я прекосло́вия лю́дска, глаго́лет: «Ох мне, ду́ше, поги́бе от земли́ гове́ин». И: «Прекосло́вцы все злом воздвиго́ша». И: «Язы́к их вознесе́ся во усте́х их». И: «Се Госпо́дь а́нгела неми́лостива послет». И па́ки: «Му́дрость челове́ку просвеща́ет лице́ его́, а безсту́дный лице́м возненави́ден будет». И: «Веща́ния непра́ведная никто́же утаи́тся». «Злый же себе́, кому́ добр бу́дет?». Та́коже и Соломо́н: «Зли́и с досажде́нием бесе́дуют, а разуми́вии о себе́ прему́дри суть».

Возбои́мся, бра́тие, боже́ственаго Писа́ния, не восхо́щем бы́ти прекосло́вцы и безсту́дницы, да не и к нам рече́ проро́к: «Лекова́х Вавило́на, и не исцеле́», но внима́й Иса́ии, глаго́люща: «А́ще послу́шаете мене́: блага́я земна́я сне́сте». Мы же молча́нием ся утверди́м, после́дующе свята́го Писа́ния, повину́имся старе́йшинам, уставля́юще прекосло́вие. Вели́ко бо есть ору́жие души́ к челове́ком молча́ние, а к Бо́гу многоглаго́лание. На всяк день сме́рти ожида́ем. Да не уподо́бимся иере́ом жидо́вским, ти́и бо навы́кли бя́ху при́сно проти́витися Бо́гу: «Приступиша бо, рече́, иере́и ко Го́споду: глаго́люще: ко́ею вла́стию се твори́ши или́ кто Ти дасть власть сию́?». Долготерпели́вый же Госпо́дь отвеща́ им, глаго́ля: «Вопрошу́ аз еди́ного словесе́, е́же а́ще пове́сте ми, и реку́ вам». Ему́же и мы помо́лимся, да изба́вит ны от прекосло́вия, Христо́с Бог наш.