Иси́дор Христо́в му́ченик, бе в ца́рство Де́кия царя́, от Алекса́ндрьскаго гра́да. Вои́нствуя же во оптио́нстем чину́. Вшед же в Хио́н о́стров в во́инских корабле́х, и та́мо к Нуме́рию оба́жен бысть Иулиа́ном со́тником я́ко христия́н. И ят бысть, и вопроше́н, а́ще Христа́ чтет. Он же рече́: «Во и́стину испове́дую Его́ Бо́га су́ща, я́ко Той сотвори́ не́бо и зе́млю, и мо́ре и вся я́же в них, и ве́рую Вонь». И за такова́я словеса́ в разли́чныя му́ки вложе́н бысть. Последи́ же мече́м сконча́ся.