Днесь бра́тие Крест пресвяты́й воздви́жется, разреша́я прегреше́ния на́ша, и вся́ко ле́то обновля́я воздви́жением свои́м. И обетша́вшая грехо́м сердца́ на́ша поновля́ет. Тем бо святы́м Кресто́м иску́плени бы́хом, от кля́твы зако́нныя. На том бо пригвозди́ся Госпо́дь Бог наш, и рукописа́ние греха́ на́шего раздра́. На том умертви́ вся прегреше́ния на́ша, и соблажне́ния. Того́ же даде́ нам Влады́ка и Бог ору́жие на проти́внаго врага́. Тем смерть умертви́ся, и ад разруши́ся. Тем Ада́м умерщвле́нный дре́вле, па́ки обнови́ся, и Е́ва от кля́твы свободи́ся. Дре́вним бо вку́сом бе испа́л из рая́ дре́вле, дре́вом же па́ки кре́стным всели́ся в рай. Того́ бо ви́девши смерть, вострепета́ стра́хом, и испусти́ я́же бе поже́рла древ́ле, от пе́рваго Ада́ма, до Того И́же на нем пригвозди́ся. Той бо есть на́ша побе́да. Той есть на́ше ору́жие на проти́внаго. Тем зна́менующеся, не убои́мся ви́димаго и неви́димаго врага́. Той бо есть цели́тель страсте́й на́ших. Той есть насыща́я без труда́ ве́рою сердца́ на́ша. Той есть храни́тель всем христиа́ном, и окорми́тель всем. Тем зна́менаем мы все те́ло и бра́шно на́ше, и не присту́пит к нам зло. Той бо напа́сти на́ша прого́нит. Те́мже бра́тие того́ свята́го Креста́ со стра́хом целу́юще, и кла́няющеся ему́, отве́ржем от себе́ вся́ку зло́бу: я́рость, гнев, клевету́, лихоима́ние, студодея́ние, и пия́нство. Та вся диа́волу пове́ржем. Возлю́бим мир, кро́тость, трезве́ние, нищелю́бие, странноприя́тие, поще́ние, и чистоту́. То бо есть а́нгельское житие́: те́ми бо де́лы вси правове́рнии спаса́ются. Сию́ чистоту́, и подо́бная ей дела́ возлю́бим, да бу́дем сы́нове Вы́шняго, и прича́стницы Ца́рствия Его́. Сла́вяще Пресвяту́ю Тро́ицу, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.