Что реку́, или́ что возглаго́лю? Что вас нареку́: овца́ или́ па́стыря, гребца́ или́ ко́рмчия, ученицы́ или́ учи́теля? Ка́ко ва́шей почужу́ся ре́вности, огня́ тепле́йшей? Овца́ вас нареку́? И́бо есте́ кро́тцы и безмо́лвни. Па́стыря вас нареку́? И́бо есте́ па́ству щадя́ще. Гребца́ нареку́? Ибо есте иску́с бу́ри терпя́ще. Ко́рмчия вас нареку́? И́бо есте́ я́коже изря́дный ко́рмчий, седя́й при корми́лех и хи́тростию треволне́ния убега́я, и цель спаса́я кора́бль, и в благоути́шное приста́нище руково́дствуя, та́кожде и вы. Ученики́ вас нареку́? И́бо есте́ гото́ви к послуша́нию. Но учи́теля вас нареќу? Но па́ки реку́: есте́, всей бо вселе́нней учи́тели есте́.

Что́ у́бо реку́, или́ что возглаго́лю? Что вас нареку́: овца́ или па́стыря, гребца́ или́ ко́рмчия, ученицы́ или́ учи́теля? или како ва́шей удивля́юся ре́вности, огня́ теплейшей? Что убо речем? Хощу́ вам предста́вити днесь трапе́зу духо́вную, не те́ло пита́ющу, но ду́хом защища́ющую и ду́шу омыва́ющую. Такова́я бо трапе́за духо́вная, а не я́коже трапе́за чревообъя́стных, сы́тость твори́т: сло́во бо есть духо́вно, благоуха́ния по́лно; воспомина́я бо челове́к, благово́ние во вся издава́ет, я́коже ми́ро жвяй и благово́ние не́кое испуща́ет, не то́кмо себе́ утеша́ет, но и су́щая с ним исполня́я. Но сопротя́гнете ми себе́, молю́ вы: сло́во бо извести́ хощ́у. А́ще бо не́цыи от но́рец вмета́юще себе́ от корабле́й в мо́ре, и́щуще би́сер изъя́ти: не мно́га ли па́че мы иму́ща вме́сто корабля́ ве́тхий и но́вый Заве́т, вме́сто корми́ла крест, вме́сто ко́рмчия Христа́, вме́сто ве́тра Дух Святы́й, вме́сто кора́бленаго влады́ки Отца́, вме́сто ката́рта благода́ть, вме́сто гребе́ц ученицы́, вме́сто кора́бленик проро́цы? Не у́бо ли и мы вметне́м себе́ от корабля́ в усе́рдно в пучи́ну разуме́ний, не я́ко да би́сер изнесе́м, но и вся́кого би́сера честне́йшее сло́во хощу́ изнести от глубины́ разуме́ний? Да не убо отпустите́ и я́ко недоуме́нно прии́мете себе́; пи́сано бо есть: «не помета́йте би́сера Моего́ пред сви́ниями, и не дади́те свята́я псом». Сви́ния у́бо егда́ слы́шиши, да безслове́сные сия́ помы́слиши: сви́ния у́бо глаго́лет и́же во блуде́ живу́щая, и пес глаго́лет и́же туне на влады́ку бесу́ющихся. Сотвори́те у́бо себе́ досто́йны би́серу, его́же хо́щем вам днесь предложи́ти: и́бо и землетру́дцы не про́сто се́мена вмета́ют в зе́млю, а́ще не пе́рвие волы воспрягу́т и ра́ла протя́гнут и те́рние исто́ргнут и бразды́ разорю́т, и тогда́ се́мена вмета́ют; и обре́т та дождь, сходя́ бо на зе́млю, тогда прие́млющи земля́ раждает клас. Но та́мо у́бо ожида́ют зи́му и ле́то и дождь небе́сныя и луча́ со́лнечныя и вре́мя жа́тве, и тогда́ собира́ют в жи́тницу: аз же ни зи́му, ни ле́то, ни луча́ со́лнечная, ни дождь, ни ме́сто, ниже́ волы́ вопряза́ю, ниже́ ра́ло привлачу́, ниже́ бразду́ секу́, ниже́ те́рние истерза́ю; днесь се́ю, днесь и жну: не де́лаю бо зе́млю безслове́сную, но слове́сну, не безду́шну, но одушевле́ну. И блажен аз, я́ко таковы́я земля́ насле́дник бых; тогда́ блаже́н есмь, егда́ глаго́лю во у́ши слы́шащих. И па́ки глаго́лет, я́ко преслуша́ние смерть соде́ловает. Блаже́н у́бо аз, блаже́ни же и вы; и́бо Госпо́дь во Ева́нгелии ко ученико́м рече́: Блажени есте, а́ще сло́во Мое́ соблюдете́. Протя́гнете ми слу́хи своя́ и вне́млете глаго́лемым: хощу́ бо во при́тчи научи́ти, кто есть Бог; сло́во прие́мь, глаго́лю. Подо́бен есть Бог му́жу, седя́щему на высоте́ зе́льней и зря́щу всю тварь, мо́ре, корабля́ пла́вающая в нем; ов у́бо волну́емь треволне́нием, воздви́жущихся нань зе́льных ветр возве́янием; изря́ден же ко́рмчий любопря́ся волна́м, тща́ся во благоути́шное приста́нище кора́бль устреми́ти и спеша́ за е́же то вско́ре пости́гнути, боя́ся, да не ка́ко погруже́н бу́дет кора́бль; ин же кора́бль зрит без ве́тра прав путь протя́жуще; ин же погруже́н бы́вши, и сокруши́вшуся кораблю, уме́ршим же не́которым, ине́м же оста́вшим и объе́мшимся уми́льно за не́которая корми́ла и треволне́нии на су́шу измета́емом, а и́хже уже́ умро́ша телеса́ пове́ржена; сия́ вся зрит седя́й на высоте́: та́ко есть и Бог. И я́коже предвари́в рех, сло́во прие́м, глаго́лю. Егда́ же Бога реку седя́ща на высо́ких, да не непщу́еши его́ на высо́ких то́чию, но и повсю́ду: не бо ме́стом разстоя́ние и́мать; но Сам Себе́ ме́сто сый, всю́ду вмеща́ется, вмеща́ет же Того́ ничто́же. Кто бо мо́жет вмести́ти бестеле́сное естество́ и невеще́ственое и непроходи́мое и неизсле́димое и недомы́слимое и непостижи́мое? Тако́в бо есть Бог; а иже не и́мать сия́, несть Бог. О благочести́вых бо си́це подобает разумева́тися Бо́гу: се на́ша наде́жда; сия́ же есть ве́чная жизнь, я́ко да зна́ют Тебе́ еди́наго И́стиннаго Бо́га, и Его́же посла́ Иису́с Христа́. Отсю́ду наша е́млют еретицы́, чту́ще и не разумева́юще. Христа́ же егда́ слы́шиши, не Бо́га непщу́й то́кмо, ниже́ е́же во пло́ти смотре́ние еди́но, но обоя́: поне́же вем Христа́ алка́вша, и вем Христа́ от пяти́х хлеб и пять ты́сящь му́жий насы́тивша ра́зве жен и дете́й; вем Христа́ возжада́вша, и вем Христа́ во́ду в вино́ претвори́вша: вем Христа́ пла́вавша, и вем Христа́ по вода́м ше́ствовавша; вем Христа́ уме́рша, и вем Христа ме́ртвыя воздви́жуща; вем Христа́ Пила́ту предстоя́ща, вем Христа со Отце́м седя́ща; вем Христа́ от а́нгел покланя́ема, и вем Христа́ от иуде́й досажда́ема: и о́во у́бо возлага́ю Божеству́, о́во же челове́честву. Сего́ ра́ди со обои́ми рече́ся Христо́с: поне́же вем Христа́ от Мари́и рожде́нна, и вем Христа́ пре́жде век рожденна. Просла́вим убо Христа, Сте́ну необори́мую, Основа́ние И́же на ка́мени основа́нное. Сам бо рече́ Петро́ви: «Ты еси́ ка́мень, и на сем ка́мени сози́жду Це́рковь Мою́, и врата́ а́дова не одоле́ют ей». Подо́бне и Па́вел глаго́лет: «Основа́ния бо ино́го никто́же мо́жет положи́ти па́че лежа́щаго, е́же есть Христо́с». Молю́ у́бо вас, я́ко да во вся́кой кро́тости внима́ем друг дру́гу. В настоя́щем бо житии́ пи́щами и питие́м и разли́чными сластьми́ прельща́емся, в бу́дущем же суд и пра́вда. Не дади́м у́бо ме́ста диа́волу: не бо есть брань нам ко кро́ви и пло́ти, но к нача́лом и ко власте́м, к миродержи́телем тме ве́ка сего́. Потщи́мся у́бо убе́гнути ве́чнаго муче́ния, я́ко да не грех нас в то ври́нет, но да па́дшаяся изведе́т Бог. Такова́ бо и́мамы человеколю́бца Бо́га и ми́лостива, и сведе́тельствует глаго́ля Дави́д: «Бог Суди́тель Пра́веден, Кре́пок, Долготерпели́в и не гнев наводя́ на всяк день; а́ще не обратите́ся, ору́жие Свое́ очи́стит». Сия́ глаголет, не да нас судит, но да не лени́ви бу́дем. А́ще бо бы хоте́л нас погуби́ти, не бы кровь Свою́ излия́л за ны: у́мре, да тебе́ безсме́ртие да́рует; взалка́, да Свое́ю пло́тию насы́тит тя; возжада́, да тебе́ кро́вию Свое́ю напои́т; в корабли́ поседе́, да тебе́ превы́ше херуви́м посади́т небе́сных; крести́ся, да тебе свободи́т; ше́ствова, да тебе́ без труда́ сотвори́т; пла́ва, да тебе́ без труда́ сотвори́т; спа, да тебе́ безпеча́льна сотвори́т; от жены́ произы́де, да преступле́ние е́же в раи́ уще́дрит; нарече́ся челове́к, да тебе́ сы́на Бо́жия нарече́т; взят на́шея, и дарова́ нам Своя́; помоли́ся, да тебе́ ве́рна сотвори́т, я́коже глаго́лет над Ла́зарем: «Отче́! просла́ви Своего́ Сы́на, да и Сын Твой просла́вит Тя». И прии́де глас от небе́с: «И просла́вих, и па́ки просла́влю». Вем, я́ко всегда́ Мя послу́шаеши; но наро́да ра́ди предстоя́щаго рех, да ве́руют, я́ко Ты Мя посла́. А́ще что у́бо пострада́, не пострада́ Себе́ ра́ди, но пострада́, да спасе́т челове́ческий род, всяќо же креста́ ра́ди. И аще хо́щеши уве́дети, возлю́бленне, си́лу Креста́, навы́кни: Крест - христиа́ном упова́ние, Крест - живы́м жизнь, Крест - заблу́ждшим наста́вник, Крест - слепы́м жезл, Крест - убо́гим утеше́ние, Крест - бога́тым узда́, Крест - го́рдым разруши́тель, Крест - блу́дным покая́ние, Крест - побе́да на бе́сы, Крест - диа́волу гони́тель, Крест - ю́ным нака́затель, Крест - недоуме́ющимся доуме́ние бла́го, Крест - безнадежных наде́жда, Крест - пла́вающих окорми́тель, Крест - обурева́емым приста́нище, Крест - ра́туемых побе́да, Крест - оте́ц си́рым, Крест - засту́пник вдови́цам, Крест - оби́дящим судия́, Крест - прав́едным сове́тник, Крест - скорбя́щим отр́ада, Крест - младе́нцем храни́тель, Крест - муже́м глава́, Крест - ста́рцем соверше́ние, Крест - свет и́же во тме седя́щим, Крест - царе́м велеле́пие, Крест - ору́жие вечно, Крест - ва́рваром любому́дрие, Крест - рабо́м свободи́тель, Крест - ненака́занным му́дрость, Крест - беззако́нным зако́н, Крест - пророком про́поведь, Крест - апо́столом возвеще́ние, Крест - мучеником похвала́, Крест - и́ночествующих поще́ние, Крест - девам целому́дрие, Крест - свяще́нником ра́дость, Крест - це́рквам основа́ние, Крест - вселе́нныя утверже́ние, Крест - и́дольскым хра́мом разоре́ние, Крест - ка́пищем потреби́тель, Крест - сква́рам губи́тель, Крест - иуде́ом собла́зн, Крест - нечести́вым потреби́тель, Крест - боля́щим исцели́тель, Крест - прокаже́нным очище́ние, Крест - разсла́бленным оставле́ние, Крест - а́лчущим хлеб, Крест - жа́ждущим исто́чник, Крест - наги́м одея́ние; наготу́ же егда́ реку́, возлю́блении, не теле́сную глаго́лю, но неве́рия, егда́ же кто ве́рует, тогда́ и облачи́тся. И слы́шавши Па́вла, глаго́люща: «Ели́цы во Христа́ крести́стеся, и во Христа́ обеко́стеся». Христа́ же егда́ слы́шиши, не Христа́ непщу́й токмо, ниже́ и́же во пло́ти смотре́ние еди́но, но обоя́. Мно́жицею бо рех, и ны́не глаго́лю и глаго́ля не преста́ну: мне у́бо е́же глаго́лати неле́ностно, вам же утверже́ние. Хощу́ вас всех учи́тель бы́ти, рече́ Христо́с. Елма́ у́бо во плоть оде́явся, Иису́с нарече́ся и́мя пло́ти; Сло́во же, поне́же Бо́жий Сын: поне́же у́бо от Отца́ Единоро́ден, поне́же от Единого Бо́га Бог, поне́же Творе́ц. Слы́ши Иоа́нна, глаго́люща: «В нача́ле бе́яше Сло́во, и Сло́во бе к Бо́гу, и Бог бе Сло́во; сие́ бе искони́ к Бо́гу; вся Тем бы́ша, и без Него́же не бысть ничесо́же». Зри́ши ли, я́ко Той есть, Его́же глаго́лю, И́же не́бо протяги́й, разли́чным лико́м зве́зды украси́вый, и показа́ я́коже рай не́бо; Той есть И́же со́лнце возжеги́й и учини́в е́му пути́; Той есть И́же луну́ уста́вивый на за́падох; той есть Иже землю основа́вый на вода́х; Той есть И́же земли́ повеле́вый израща́ти травны́й злак, исто́чником поточи́ти во́ды и река́м тещи́ и е́зером собира́тися, и мо́рю преде́лы положи песо́к, и вода́м извести́ душа́ жи́вы, ве́тром же ве́яти, и гора́м уста́вль преде́лы и облако́м двиза́тися, ското́м четвероно́гим, га́дом и пти́цам. И что мно́го глаго́лю? Той есть И́же сотвори́вый а́нгелы и арха́нгелы, престо́ли, херуви́ми и серафи́ми, нача́ла; уставлей времена и ле́та и ме́сяцы и неде́ли, дни и но́щи, свет и тму; пото́м же веще́м оби́лия; последи́ же сотвори́ челове́ка по о́бразу Своему́ и по подо́бию, в раи́ положи́ его́. Ви́дев же челове́ческий род коле́блемь от диа́вола, нача́ло на́ше взем, пригвозди́ то на дре́ве: я́ко да дре́ва ра́ди преступле́ние, си́це и дре́ва ра́ди бу́дет спасе́ние. Позави́де у́бо диа́вол, я́ко той от небе́с све́ржен быв, Ада́м же в раи́ бе, я́коже трубу́ обре́те зми́я, де́йствова тем, и та́ко проглаго́ла к ним, я́ко бысть в раи́: безпло́тному бо к плотяны́м глаѓолати не бе возмо́жно; и рече́ к Е́ве, что добро́ есть дре́во в виде́ние, и во́ньже день а́ще сне́сте от него́, и бу́дете я́ко бо́зи. Отсю́ду повину́ Е́ву, та́коже она́ покори́ своего́ му́жа. Яду́щим же у́бо им, и яви́шася нази. И рече́ Бог: «Ада́ме, где бе?» Егда́ же слы́шиши е́же: где бе? да не неве́дяще непщу́еши Бо́га; елма́ у́бо глаго́лаше тем диа́вол: во́ньже и а́ще день сне́сте от того́ дре́ва, бу́дете я́ко бо́зи. Мня́щим же тем, я́ко хотя́т бы́ти я́ко бо́зи, сего́ ра́ди глаго́лаше Бог: где бе? вме́сто е́же: сый где низпаде́? се бо и сне́де, и пребыва́еши я́ко челове́к. Не запове́дах ли тебе́: не сне́сте от дре́ва? снел еси́, преступи́л еси́, си́речь, где бе. Ли́ствием же смоко́вным бы́ша обложе́ны и покрывающе виде́ние студа́. И что рече́ Ада́м? глас твой слышах ходя́щу ти в раи́, и убоя́хся, зане́же наг бех, и сокры́хся. И рече́ к нему Бог: «Кто возвести́ тебе́, я́ко наг еси́?» Он же глаго́ла: «Жена, ю́же дал ми еси́, та мя прельсти́». Таже к Е́ве: «Ты же что, Е́во, бу́ди дах тя му́жу твоему́, егда́ и зми́ю тя дах?» Сея́ же вины́ дая́ху, хотя́ще себе изъя́ти муче́ния. И рече́ Бог к Ада́му: «Проклята́ земля́ в де́лех твои́х, те́рние и волче́ц да прозя́бнет тебе́; в по́те твое́м я́си хлеб твой». Та́же к жене́: «В печа́лех роди́ши ча́да, и множа умно́жу печа́ли твоя́». Та́же к зми́ю рече́: «На пе́рсех твои́х и на чре́ве пресмыка́ешися, и зе́млю да я́си во вся дни живота́ твоего́; и ты тому́ блюде́ши пя́ту, и той твою́ да блюде́т главу́». Чесо́ ра́ди пе́рси прокля́т? Я́ко в них лежа́ше грех, вмени́вый зло́е. Чесо́ ра́ди чре́во? Зане́же пи́щею прельсти́. Зе́млю я́си во вся дни живота́ твоего́: елма́ у́бо Ада́м от земли́ зе́мен бе; прия́т три́жды осужде́ние за преступле́ние, я́же сотвори́ша. Елма́ у́бо дре́ва ра́ди преступле́ние бысть, сего́ ра́ди и дре́ва ра́ди спасе́ние бысть. Бо́гу на́шему сла́ва во веќи веко́в. Ами́нь.

Стихи́:

Сий же с горта́нем Спа́се воздви́жение прино́сит:

Совоздвиза́ема зря́ще Креста́ тварь

Константи́н, вели́кий царь и пе́рвый в христиа́нех, имя́ше не́когда рать на Магне́нтия в Ри́ме, пре́жде держа́нию ца́рства, я́коже глаго́лют истори́ческая писа́ния. Другу́ю же рать на Дуна́йстей реце́ со Ски́фы. Ви́де же мно́жества супроти́вник и недоуме́яшеся. И в еди́ной же нощи́ ви́де честны́й Крест на небеси́ и писа́ние, зве́здами явля́ющее: «Константи́не, сим одолева́й». И створи́в подо́бен крест, и соодоле́ враго́м. Крести́ же ся сам и мати его Еле́на, ю́же и посла́ во Иерусали́м обрести́ честны́й Крест Христо́в. Я́коже обре́те того́ скрове́на, и покло́ньшися тому́ и облобыза́вши, та́коже и весь синкли́т. Хотя́ху же и про́чии поклони́тися, и не можаху. И помоли́шася поне́ ви́дети его́. И тогда́ взы́де Макарий, патриа́рх Иерусали́мский, сотвори́ воздви́жение на а́мвоне, показа́в честны́й Крест. И нача́ша лю́дие зва́ти: «Го́споди, поми́луй!». И оттогда́ нача́т быва́ти пра́здник Крестовоздви́жению.

Стихи́:

Моля́шеся к тече́нию стеня́,

Помо́щника бли́жае Бо́га стяжа́вый.

Сей бе в ца́рство Максимианово, и Ма́гна иге́мона, гра́да Раланде́йска, Ликао́нския страны́. И́же мно́го му́чен быв разли́чно, и сокруше́ние лани́т прия́т, пове́шения же, и строга́ния желе́зными ногты́, и пригвожде́ния желе́зных сапого́в, и в них тещи́ пону́жден пред ко́ньми. И та́ко предаде́ ду́шу свою́ Го́сподеви.

Два не́кая мона́ха, идя́ста от пусты́ни в Тарс град потре́бы ра́ди, и обита́ста в гости́ннице, е́же ту препочи́ти нощь. И по смотре́нию Бо́жию, обрето́ста ту три ю́ношы, иму́ща с собо́ю блудни́цу, и смути́вшася седо́ста. И еди́н же от нею́ изъе́м от влагалища Ева́нгелие, и нача́т чести́. Блудни́ц же я́ко узре́ старц чтуа, и оста́вльши ю́ношы, и се́де прише́дши ста́рца близ. Ста́рец же отри́нув ю́ рече́: «Зело́ ми на па́кость еси́, о́ стра́стнице безсту́дная, ка́ко не устыде́лася еси приити́ се́мо, и се́сти близ нас?». Сия́ же отвеща́ глаго́лющи: «Ни о́тче, не гнуша́йся мене́, а́ще и испо́лнена есмь вся́каго греха́: но не отри́ну бо и дре́вле прише́дшую блудни́цу, Влады́ка Госпо́дь Бог всех». Старец же рече́ к ней: «Но блудни́ца та от Христа́ не возврати́ся на грех». Сия́ же рече́ ста́рцу: «Наде́юся и аз на Сы́на Бо́га Жива́го, я́ко от часа́ сего́, и аз не возвращу́ся ко грехо́м, а́ще мя на путь покая́ния наста́вита». Сия́ же обеща́стася, спасти́ся ей реко́ста, аще послу́шаеши на́ю. Она́ же оста́вльши ю́ношы, и вся своя́ приобре́тения, и после́дова ста́рцема. И ведо́ста ю́ в монасты́рь деви́чь, и остриго́ста ю́, и преда́вше игу́мении, отъидо́ста. Сия́ же в покая́нии пребы́сть и до ста́рости, и мног ра́зум стяжа́. И чудеса́ сотво́рши, почи́ с ми́ром: Бе же и́мя ей Мари́я.

Днесь бра́тие Крест пресвяты́й воздви́жется, разреша́я прегреше́ния на́ша, и вся́ко ле́то обновля́я воздви́жением свои́м. И обетша́вшая грехо́м сердца́ на́ша поновля́ет. Тем бо святы́м Кресто́м иску́плени бы́хом, от кля́твы зако́нныя. На том бо пригвозди́ся Госпо́дь Бог наш, и рукописа́ние греха́ на́шего раздра́. На том умертви́ вся прегреше́ния на́ша, и соблажне́ния. Того́ же даде́ нам Влады́ка и Бог ору́жие на проти́внаго врага́. Тем смерть умертви́ся, и ад разруши́ся. Тем Ада́м умерщвле́нный дре́вле, па́ки обнови́ся, и Е́ва от кля́твы свободи́ся. Дре́вним бо вку́сом бе испа́л из рая́ дре́вле, дре́вом же па́ки кре́стным всели́ся в рай. Того́ бо ви́девши смерть, вострепета́ стра́хом, и испусти́ я́же бе поже́рла древ́ле, от пе́рваго Ада́ма, до Того И́же на нем пригвозди́ся. Той бо есть на́ша побе́да. Той есть на́ше ору́жие на проти́внаго. Тем зна́менующеся, не убои́мся ви́димаго и неви́димаго врага́. Той бо есть цели́тель страсте́й на́ших. Той есть насыща́я без труда́ ве́рою сердца́ на́ша. Той есть храни́тель всем христиа́ном, и окорми́тель всем. Тем зна́менаем мы все те́ло и бра́шно на́ше, и не присту́пит к нам зло. Той бо напа́сти на́ша прого́нит. Те́мже бра́тие того́ свята́го Креста́ со стра́хом целу́юще, и кла́няющеся ему́, отве́ржем от себе́ вся́ку зло́бу: я́рость, гнев, клевету́, лихоима́ние, студодея́ние, и пия́нство. Та вся диа́волу пове́ржем. Возлю́бим мир, кро́тость, трезве́ние, нищелю́бие, странноприя́тие, поще́ние, и чистоту́. То бо есть а́нгельское житие́: те́ми бо де́лы вси правове́рнии спаса́ются. Сию́ чистоту́, и подо́бная ей дела́ возлю́бим, да бу́дем сы́нове Вы́шняго, и прича́стницы Ца́рствия Его́. Сла́вяще Пресвяту́ю Тро́ицу, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.