Ца́рствующу Аврилиа́ну, бысть гоне́ние вели́ко на христиа́ны. Вся́чески бо угоди́ти иска́ше диа́волу, с ни́мже в бе́здне погруже́н бысть. Сам же и́де на восто́к. Антони́на же своего́ воево́ду на Памфили́ю посла́, да везде́ у́бо вся изы́щет христиа́ны, и прину́дит их пожре́ти и́долом. Прише́дшу же Антони́ну в Си́ду град Памфили́йский, ят бысть Алекса́ндр презви́тер ту су́щия це́ркве. И сед на суди́щи воево́да вопроси́ его́, кто у́бо есть и отку́ду приведе́н? Алекса́ндр же рече́: Памфили́анин ро́дом, христиа́н ве́рою. Презви́тер са́ном, пасту́х Христо́ва ста́да: Князь же рече́: Где есть Христо́во ста́до? Алекса́ндр же рече́: Под все́ю небе́сною челове́ки сотвори́л есть Христо́с, а заблу́ждшии от ста́да суть, неве́рующии в Него́. Князь же рече́: Двоего́ у́бо ра́ди му́ки вели́ки ти есть прия́ти. Пе́рвое, да ми пове́си ве́рующыя во Христа́: Второ́е же, да пожре́ши бого́м. И повел́е его́ би́ти сухи́ми жи́лами по чре́ву. Пото́м же повеле́ развари́ти смолу́ с ма́слом, и поврещи́ ту Алекса́ндра, и не прикосну́ся ему́ огнь. Посе́м повеле́ разжещи́ сковраду́ желе́зну, и возложи́ти на ню Алекса́ндра. А́нгел же Госпо́день прише́д, устуди́ сковраду́. И ви́деша вси лю́дие я́ко сам тре́тий бысть. И рече́ князь: Алекса́ндре, пожри́ бого́м, да бу́деши друг царе́ви. Алекса́ндр же укори́ царя́, и кня́зя, я́ко рабо́тающа диа́волу. Повеле́ же князь пове́сити его́, и строга́ти ногты́ желе́зными, и ника́коже вреди́ его́. И посе́м пусти́ша на него́ два льва, и прише́дше львы лиза́ста но́зе свято́му, и отъидо́ста во огра́ду свою́. И посе́м мече́м повеле́ его́ усе́кнути. И усе́чен бысть свяще́нный Алекса́ндр, ме́сяца ма́рта, в пятнадеся́тый день. И взе́мше христиа́не те́ло его́, погребо́ша че́стно.