Два не́кая мни́ха любодея́ния брань прия́ста от дия́вола, идо́ста и поя́ста себе́ жене́. По вре́мени же не́колице ре́ста в себе́, что приобрето́хома, я́ко оста́вихома а́нгельский чин и приидо́хома в скве́рну сию́, и по сих в му́ку о́гненую и́маема вни́ти. Но по́йдема па́ки в пусты́ню и пока́емася, и Бог прии́мет на́ю. И ше́дша в монасты́рь, умоли́ста отца́ да́ти и́ма покая́ние, и пове́даста, я́же соде́яста. И затвори́ я на ле́то. И обе́ма ра́вно дая́ше хлеб и во́ду, бе́ста бо о́бразом ра́вна себе́. И егда́ сконча́ста вре́мя покая́ния, откры́ся отце́м, я́ко прости́ ею́ Бог греха́ то́го. Отве́рзшеже, изведо́ша я. И ви́деша отцы́ еди́наго их бле́да и уми́лна лице́м велми́, а друга́го ве́села и све́тла и сла́вна, и диви́шася вси, я́ко бра́шна ра́вно восприима́ста. Вопроси́ша же уны́вшаго глаго́люще, ка́ко стяза́шеся с мы́слию в ке́лии свое́й. Он же рече́, зла́я и́же соде́ях и му́ку помышля́х, и в ню́же ми поити́, и от него́ стра́ха прилпе́ кость моя́ пло́ти мое́й. Вопроси́ша же и друга́го, а ты что помышля́ше в ке́лии свое́й. Он же рече́, хвали́х Бо́га, я́ко исто́рже мя от жития́ сего́ су́етнаго и печа́лныя му́ки, и приве́де мя во а́нгельское достоя́ние и житие́, и хваля́ Бо́га, весели́хся. И реко́ша ста́рцы, я́ко ра́вно есть обе́ма покая́ние к Бо́гу. И того́ ра́ди отдаде́ обе́ма греха́ ею́.