Му́ченик Христо́в Са́вва, бя́ше в ца́рство Уалентиа́на царя́, от страны́ Го́тфския, изде́тска христиа́н сый. Не то́чию у́бо отвраща́шеся идоложе́ртвеных мяс, но и хотя́щым вкуша́ти возбраня́ше: и в тех ме́сто Христо́ву ве́ру предлага́ше. Мно́гих же и креща́ше обраща́я. Прише́дше же идолослужи́тели, из гра́да изгна́ша и ну́ждею. По не́коем же ле́те Афанари́ху кня́зю го́тфскому, гоне́ние подви́гшу на христиа́ны. Ят бысть и святы́й Са́вва, и бие́н бысть кре́пко. Посе́м к колеси́ привя́зан бысть, и на бревне́ хра́миннем пове́шен бысть. Вкуси́ти же идоложе́ртвеных не восхоте́. И приведе́н бысть к реце́ Муси́йстей, и привя́зан к дре́ву вели́ку по вы́и, и вве́ржен бысть в реку́, и ту утопе́. Поживе́ лет три́десять и еди́но. Та́ко у́бо бо́дрене взы́де к Бо́гу.