В ца́рство Маркиа́на царя́, сей бе сигкли́тик са́ном, благоро́ден сый, и юн име́я во́зраст. Ят же бысть я́ко христиа́н, и ну́димь бе пожре́ти и́долом. И я́ко не покори́ся, пове́шен бысть, и мечи́ разсека́емь. И посе́м положе́н бысть на огни́. Таже вве́ржен бысть в сковраду́ горя́щую: и посе́м в коно́б врящь. И от тех всех неврежде́н бысть Бо́жиею благода́тию. И посе́м пуще́ни бы́ша нань зве́рие, льво́ве, и медве́ди, и изба́влен бысть от них: ну́димь же бе вни́ти в це́рковь и́дольскую и пожре́ти. Святы́й же рече́: Хощу́ принести́ же́ртву бого́м. Сие́ же глаго́ла искуша́я царя́. Рад же бысть сие́ слы́шав царь. И вшед Марин пред вс́еми людьми́, помоли́ся Иису́су Христу́, и падоша и́доли, и сокруши́шася. Тогда́ огорчи́ся царь, и усе́кну главу́ его́: дух же его́ вн́иде в ру́це Го́сподеви. Мо́щи же его́ погребены́ бы́ша че́стно, ве́рными богобоя́знивыми людьми́.