Стихи́:

Агге́й сосу́д испо́лнь яви́ся благода́тем,

Я́ко веще́ствено времене́м сокруши́ся.

В шестна́десятый Агге́я земля прият.

Сей бе́яше от пле́мене Леви́ина, и рожде́н бысть в Вавило́не в пле́не. Еще́ и млад сый, прии́де от Вавило́на во Иерусали́м и проро́чествова с Заха́риею три́десять и шесть лет. Предвари́ша же воплоще́ние Христо́во за четы́реста и се́дмьдесять лет, и явле́нно о развраще́нии людсте́м проро́чествова, и ви́дев отча́сти созда́ние церко́вное. У́мре и погребе́н бысть близ гробо́в иерусали́мских пресла́вно, зане́же и той бя́ше от ро́да свяще́нническаго. И бя́ше же плеши́в и стар, окру́жену име́я браду́, и о́бразом че́стен, доброде́телию явле́н, люби́м и чтом вся́ким, я́ко пресла́вен и вели́кий проро́к. Толку́ется «Пра́здник» или́ «Пра́зднуя».

Стихи́:

Главу́ Мари́н гото́вит к мечу́,

Е́йже вене́ц угото́влен бысть Го́сподем.

В ца́рство Маркиа́на царя́, сей бе сигкли́тик са́ном, благоро́ден сый, и юн име́я во́зраст. Ят же бысть я́ко христиа́н, и ну́димь бе пожре́ти и́долом. И я́ко не покори́ся, пове́шен бысть, и мечи́ разсека́емь. И посе́м положе́н бысть на огни́. Таже вве́ржен бысть в сковраду́ горя́щую: и посе́м в коно́б врящь. И от тех всех неврежде́н бысть Бо́жиею благода́тию. И посе́м пуще́ни бы́ша нань зве́рие, льво́ве, и медве́ди, и изба́влен бысть от них: ну́димь же бе вни́ти в це́рковь и́дольскую и пожре́ти. Святы́й же рече́: Хощу́ принести́ же́ртву бого́м. Сие́ же глаго́ла искуша́я царя́. Рад же бысть сие́ слы́шав царь. И вшед Марин пред вс́еми людьми́, помоли́ся Иису́су Христу́, и падоша и́доли, и сокруши́шася. Тогда́ огорчи́ся царь, и усе́кну главу́ его́: дух же его́ вн́иде в ру́це Го́сподеви. Мо́щи же его́ погребены́ бы́ша че́стно, ве́рными богобоя́знивыми людьми́.

Стихи́:

Близ Го́спода цари́ца Феофа́ния,

И доброде́тельми, стоя́ше, блеща́щися.

Та бя́ше рожде́нием и воспита́нием Константи́ня гра́да. От кро́ве ца́рския рожде́ние име́ющи, от блеща́ний Мартинаки́йских. Дщи Константи́нова, са́ном иллустри́я, и матере Анны: от со́лнечнаго восто́ка пове́даема. Сим вы́ну жа́лящым си, и жела́ющым яко неиму́щым отроча́те. И Пресвяту́ю Влады́чицу Богоро́дицу на по́мощь призыва́ху, и к тоя всечестне́й це́ркви, и́же во Фораки́и вы́ну приходя́ще, и моле́ния своя́ та́мо излива́юще, да разреши́тся, Влады́чице, глаго́лаху, ми́ру Госпоже́, истоща́ющееся раб Твои́х безде́тие. И зане́же ве́рно проша́ху, прия́ста отроча́ же́нский пол. Сему́ же отдои́вшуся, и от шести́ лет книгам учи́ма бы́вши, и вся́кими до́брыми вещьми́, и доброде́тельми венчева́ется. Сию зря́ще роди́телие ра́довахуся и веселя́хуся, и благоча́дию недале́че отложи́ти до́брому наде́яхуся. Внегда́ вре́мя во́зраста ея́ дости́же, и све́рстниц па́че к лу́чшым преспева́ше. Взысканию же бы́вшу от царя Васи́лия македо́нянина, сы́ну его́ Льву прему́дрому, на сочета́ние бра́ка о отрокови́це благоле́потне, и доброде́тельне: сию́ во всех добре́йшу изобре́т, совокупля́ет Льву сы́ну своему́ и царю́, и про́чее радости и весе́лия вси испо́лнени бя́ху. Не по мно́зе же лука́вый плевелосе́ятель все́я в слух царю́ Васи́лию, ре́чию сантавари́на Ва́рды, и царя́ Лео́нта ку́пно с жено́ю я́тники сотвори́в, и в не́котором ме́сте затвори́, и стра́жники за три ле́та поста́вль. Обновле́нию же проро́ка Илии́ приспе́вшу, царь сы́на своего́ изведе́, и с ним прое́зд творя́ше. Да внегда самоде́ржец пронарече́н бысть от отца́ Лев царь, неду́жнаго ра́ди впаде́ния, тогда́ честна́я цари́ца Феофа́ния в ца́рская вше́дши, душе́вному спасе́нию прилежа́ше, и сла́вы ца́рския нивочто́же вменя́ющи. И красоты́ жите́йския я́ко сметие́ и сон вменя́ше. И не почива́ше но́щию и днем, вы́ну псалмы́ с пе́сньми поя́ше. И та́ко Бо́гу угожда́ющи, и ми́лостынями Того́ и́щущи. На те́ле же свое́м ни цве́та рути́шнаго восхоте́ носи́ти, а́ще и не́ким благоле́пием из внеу́ду оде́яна бя́ше, внутрь же те́ла о́тай ру́бы о́стрыми плоть томя́ше. И по́стническое житие́ держа́щи, многопи́щных же трапе́з преоби́дящи. И худым, ре́кше препросты́м хле́бом, и зе́лием сухи́м пита́шеся. А я́же в ру́ки ея́ впада́ющая бога́тства, и стяжа́ния честна́я, жите́йскаго привиде́ния, та́я ни́щым подава́ше. И многоце́нныя ри́зы, тре́бующым раздава́ше: си́рым и вдови́цам, име́ния оби́льно расточа́ше: и́ночествующым же худа́я пребыва́лища, стяжа́нием и богат́ством исполня́ше, слуга́м и рабыням, я́ко бра́тиям прилежа́ше. И не зва́ше никого́ просты́м и́менем, но всех о Го́споде сла́вяше зва́нием, и́мже кто нарече́н. Не рече́ язы́ком кля́тву, ни лжий глаго́л изоу́ст ея́ изы́де, ни оболга́ние, ни клевета́. И не преста́ никогда́же со все́ми ра́вно пла́чущи и се́тующи, и посте́лю слеза́ми моча́щи. Одр же ея́ златы́м блиста́нием, и с ви́ссом настла́н. Она́ же на рого́зе с зубы́ о́стрыми по земли́ пове́ргши лежа́ше, час от часа́ востаю́щи, и Бо́гу хвалы́ возсыла́ющи. Те́мже от зе́льнаго на ню жестока́го жития́, теле́сный нападе́ неду́г, я́коже ей воздержа́ния де́ля и при́тчу прия́ти и у́зу. Не преста́ше раздробл́яющи ни́щым хлеб свой. Устне́ же ея́ к поуче́нию боже́ственных зако́н подвиза́хуся: не почива́ше бо свяще́нная словеса́ Дави́дова пою́щи. Ниже́ презира́ема быва́ше от нея́ седмори́чная хвала́ Госпо́дня: ниже́ поспа́ сна поко́йна без слез. Чадь же свою́ проща́ющи и ми́лующи, и со слеза́ми Бо́гу моля́щися, е́же оби́димых по́мощи ру́ку пода́ти. Си́рым и вдови́ца засту́пница, и и́же в ско́рбех и уны́нии валя́ющымся, быва́ющи благоду́шие и уте́ха. Вся же мирска́я и я́же в ми́ре суть, Христа́ ра́ди отве́ргши, и благо́е и́го Христо́во возлюби́вши, и крест на ра́мо взе́мши, и та́ко к наде́жным благи́м не погреши́. И сама́ ощути́вши, е́же от ми́ра исхо́д, целова́ти себе́ всем повеле́. Коне́чное и после́днее целова́ние, всем подаде́. И та́ко с ми́ром дух свой предаде́ Го́сподеви.

Муж свят ви́де еди́ного согреша́юща, го́рько прослези́ся, и рече́: «Сей днесь, аз у́тро». То́кмо и а́ще кто согреши́т, не осуди́ его́, но име́й ся гре́шнее его́, лю́бо и неве́рен бу́дет, стра́нно от Бо́га не прирази́, но помяни́ся у́бо сам и внемли́ себе́, ка́ко хо́диши, и никогда́же паде́шися. Даждь те́ло души́ свое́й, и́же ста́ти на моли́тве приле́жно, име́ти Бо́га, да не удоле́ет ти по́мысл неприя́знин. Моли́ся, да дух забве́ния отступи́т от тебе́, и а́ще у́бо что потре́бно сотвори́ши, не похвали́ся, и не погуби́ши е́. «Аз, рцы, ве́чер умре́ти, и зау́тра, и на всяк час». И а́ще глаго́леши кому́ о жи́зни, со умиле́нием пла́чися, рцы послуша́ющему: «Поне́же мне еси рекл: да не умреши без по́льзы, пребыва́ю чужи́ми словесы́, но хотя́й ся спасти́». Блюди́ же ся и похваля́ющих тя по́мысл, и бли́жняя укаря́юща. И никто́же ничто́же не весть: разбо́йник на кресте́ бе, от словесе́ еди́наго оправда́ся, Иу́да со апо́столы причте́н бе, и в нощи́ еди́ной погуби́в труд, и сни́де с небесе́ во ад. Те́мже никто́же благотворя, и да ся не похва́лит, вси у́бо упова́ющии собо́ю падоша. А́ще ви́диши кого́ согреша́юща, не на того́ возлага́й вину́, но на победя́щагося, и глаго́ли: «Го́ре мне, я́ко сий нево́лею прельще́н бысть, та́ко и аз!» И пла́чи и проси́ от Бо́га по́мощи: никто́же бо хо́щет согреши́ти в Бо́га, но вси прельща́емы есмы́. Егда́ в мире еси, не победишися, еда́ ка́ко ра́дости чужде́й похва́лишися: и похва́лимся, и пре́дани бу́дем на бра́ни. Мы́шцею Бог поусти́ на ны, не́мощи ра́ди нам бра́тися, да не поги́бнем. Бо́гу на́шему сла́ва всегда́, ны́не и при́сно и во ве́ки веко́в. Ами́нь.