Сей нарече́н свое́ю страно́ю о́строва не́коего, и́же не́киим Ниве́рт глаго́лется, от ины́х же Веро́й, близ су́щи Гади́р, и окиа́новым приближа́яся тече́нием. Бога́тством мно́гим окла́ден, и в христиа́нстве совоспита́вся. Бо́гу же па́че, не́жели челове́ком живя́ше. Тем сметие́ вся вмени́в, ца́рствие всем оставля́ет: и в Ри́ме быв, а́нгельский восприя́т о́браз. Та́же изя́щный Константи́нь град дости́же. И к Константи́ну и Рома́ну багряноро́дныма царе́ма на бесе́ду доше́д, и во Иерусали́м от них по́слан бысть. Сие́ тем блаже́нный испроси́в, иде́же и быв, и ме́ста обше́д: И та́мо су́щему патриа́рху Христоду́лу, вели́кую схи́му тому́ наложи́вшу, и Стефа́на того́ именова́в: мно́ги доса́ды, и ра́ны от скве́рнаго язы́ка срацы́нскаго подъя́т за е́же не остри́щи брады́. Та́же прихо́дит во Еги́пет, в не́мже и ят бысть, и в темни́цу вве́ржен бысть, со стра́ждущима с ним двема́ иере́ома: и за шесть ме́сяц пострада́в, гла́дом и жа́ждею, и вся́ким злострада́нием. И а́бие от содержа́щаго е́же ко еги́петскому Ами́ре посыла́ется, от него́же смертоно́сными у́зами обложе́н присновоспомина́емый, и ну́димь быва́ше Христа́ отврещи́ся. Кре́пко же сопроти́влься и не обину́яся, но испове́дая дерзнове́нно Го́спода на́шего Иису́са Христ́а, Бо́га бы́ти И́стиннаго. И мно́гая и безчи́сленная томле́ния нань наложи́ша, и́же и изнемога́емь в неду́г впаде́, в не́мже и житие́ оста́ви: провозвести́вшися ему́ Бо́гом кончи́не.