Симео́н и Иса́кий и Ва́хфий Христо́вы му́ченицы бы́ша от страны́ Пе́рския, при Саво́рии беззако́нном царе́. И я́ко христия́не, того́ ра́ди я́ти бы́ша от идолослужи́тель, и ну́дими бы́ша отврещи́ся Христа́, и поклони́тися со́лнцу и огню́. Они́ же отвеща́вше, ре́ша, не отве́ржемся Творца́ тва́ри, и со́лнцу и огню́ не поклони́мся. И связа́вше им ру́це и но́зе, и бие́ни бы́ша кре́пко. И посе́м вве́ржени в темни́цу, и седмь дний не прия́ша пи́щи. Посе́м изведе́ни бы́ша из темни́цы, и разли́чны му́ки претерпе́ша. И наконе́ц честны́я их главы́ отсеко́ша мечи́, и та́ко сконча́шася.