Сей Закхе́й приведе́н бысть на суди́ще, желе́зо тя́жко на вы́и нося́. Вопроше́н же, и Христа испове́да: лю́то и безчелове́чно му́чен быв. И в кла́де но́зе его́ кли́ны заби́ша, и четы́ре дни муче́ние до́блественно терпя́ше. Посе́м приведе́н бысть Алфе́й, испо́лнен Ду́ха Свята́го. И я́звами все те́ло его́ обра́нено, и ре́бром сожже́нным: И той приведе́н в темни́цу, и с подвижником Закхе́ем в то́йже кла́де но́зе его́ заби́ша, и нощь и день пострада́ша. И посе́м о́ба изведе́на, и ме́чную кончи́ну прия́ста о Го́споде.