Мно́го мо́жет моли́тва пра́веднаго поспешеству́ема. Поспева́ет же, а́ще ка́яйся труди́тися на́чнет, и плоды́ покая́ния соверши́т. А́ще ли еди́н есть созида́яй, а други́й разоря́яй, что успе́юта? То́чию тя́гость си приобрета́юта. Вели́ко бо есть зло, е́же ити́ к це́ркви иму́щу кому́ зло́бу на кого́, и моли́тися лже́ю, глаго́люще в моли́тве: О́тче наш оста́ви нам до́лги наша. О́ челове́че, что глаго́леши, и без у́ма труди́шися на моли́тве, неприя́знивый яд в се́рдцы свое́м нося́! Вопие́ши ло́жно к Бо́гу: Оста́ви ми я́ко аз оста́вих. Моли́тися ли прише́л еси́, или́ лга́ти? Благода́ть ли обрести́, или́ гнев прия́ти? Спасе́ние ли хо́щеши прия́ти, или́ му́ку? Не слы́шиши ли что в год боже́ственыя слу́жбы иере́й возглаша́ет: Возлю́бим друг друга, ре́кше вся непра́вды и жестосе́рдия отложи́м. Что челове́че твори́ши? А́нгелом служа́щым, многоочи́тым херуви́мом на Трапе́зе Те́ло Христо́во покрыва́ющым, и шестокри́льным серафи́мом Трисвяту́ю песнь пою́щым, и с боя́знию стоящым. Иере́ю за вся лю́ди моля́щуся. Ду́ху Свято́му сходя́щу. И а́нгелом напису́ющым имена́ незло́бивых, входя́щих в це́рковь. Ка́ко люби́миче не ужаса́ешися? И ка́ко про́сиши проще́ния, а сам не проща́еши? А́ще бо не прости́ши согре́щшым ти, Госпо́дь и тебе́ не отда́ст. Проща́яй бо проще́н бу́деши, и ми́луяй поми́лован бу́деши. А не рцы, мно́го отпущах бра́ту моему́, и па́ки зле досади́л ми, и мно́го наведе́ на мя зла, и не могу́ отда́ти ему́. Ни, возлю́бленне того́ не глаго́ли, но уподо́бися Стефа́ну, и Иа́кову бра́ту Госпо́дню, за творя́щым ти зло моли́ся: И своему́ Влады́це уподо́бися, смерть за ны прии́мшему, стерпи́ доса́ду и уко́р от дру́га, да оставя́ттися согреше́ния мно́гая. Бежи́м бра́тие злопомне́ния лю́таго греха́. Всяк бо грех вкра́тце соверша́ется, и бо́рзо мину́ется, а злопомне́ние лю́ту и́мать страсть паля́щу. И́бо ходя́ и лежа́ и востая́, зми́ев яд в се́рдце си име́ет: То́ю стра́стию одержи́мь не насле́дит Ца́рствия Бо́жия, и проще́ния не сподо́бится. Ту бо ника́яже доброде́тель успе́ет, ни пост, ни ми́лостыня: вся бо злопомне́ние погубля́ет. А́ще бо дар твой принесе́ши ко олтарю́, и ту воспомяне́ши зло́бы, шед пе́рвее смири́ся, и тогда́ принесе́ши дар, и прия́тен бу́деши. Бо́гу на́шему сла́ва, ны́не и при́сно и во ве́ки веко́в. Ами́нь.