Му́ченик Христо́в Калу́ф, бе в ца́рьство Максимия́не от Вифаи́ды гра́да еги́петскаго. Испове́дания же ра́ди Христо́ва ят быв, и пре́дан иге́мону. Иге́мон же ка́мень вели́к на вы́ю его́ навяза́ти повеле́, и пове́сити и́ стрем глав, и бие́н бысть от слуг. И глаго́лаше им, аз жела́ю бу́дущия сла́вы, и ра́ны и страсть того́ ра́ди терплю́. Посе́м сне́мши со дре́ва, ну́диша и́ пожре́ти и́долом, и не повину́ся. И огню́ пре́дан бысть, и ту коне́ц прия́т вре́меннаго живота́.