Варлаа́м святы́й му́ченик бя́ше от Антиохи́и Си́рския, стар сый во́зрастом. Испове́дания же ра́ди е́же во Христа́ ят быв, и приведе́н ко кня́зю. И пону́дився пожре́ти и́долом и не повину́ся, бие́н бысть пе́рвее говя́жиими жи́лами, и стро́ган бысть ногты́ желе́зными. И посе́м к тре́бищу веде́н быв, и просте́рше ру́ку его́, возложи́ша нань огнь с лива́ном, да к тре́бищу возве́ржет. Мня́ше у́бо князь, я́ко а́ще у́глие горя́щее ве́ржет с лива́ном к тре́бищу, и реку́т ему́, уже́ поже́рл еси́ бого́м. Он же неподви́жно и неизме́нно стоя́ше сильне́йши ме́ди и желе́за я́вльшися руце́ его́, до́ндеже отгоре́вше пе́рсты его́, со огне́м на зе́млю падо́ша. И сему́ бы́вшу, ника́коже возврати́ся к тре́бищу: но изво́ли сгоре́ти рука́ма си, не́жели лива́н на тре́бище воврещи́. И та́ко до́брым смы́слом предаде́ ду́шу свою́ Го́сподеви.