Ча́дца моя́ возлю́бленная воспомина́йте коли́ко благ от всеми́лостиваго Бо́га прия́сте безсме́ртное и безпеча́льное житие́. За́вистию и пре́лестию дия́волею, не то́кмо изгна́ние прия́хом, но и сме́ртни бы́хом и досе́ле не престае́т ловя́, и прельща́я нас. Того́ ра́ди мы бра́тие ста́нем проти́вящеся ему́ наде́ждею Блага́го Бо́га. Дела́ бо о́ного на нас суть, е́же отврати́ти от ве́ры нас и наде́жи Бо́га на́шего и в неве́рство привести. И ктому́ не престае́т вся зла́я наводя́ на ны блуд, прелюбоде́йство, татбы́, уби́йство, пия́нство, клевету́, за́висть, не́нависть, лихоима́ние, и ина́я зла́я дела́. И чрез естество́, и про́чая. Я́же от Ада́ма и до Но́я, от Но́я же и до Авраа́ма, во идолослуже́ние и сребролю́бие, в волхвова́ние и чародея́ние введе́, и отучи́ от Бо́га жива́го. Да то се во ум и в се́рдце приводя́ще, блюди́теся от се́ти вра́жия, и о всех дел его́ злых, и потщи́теся уго́дна твори́ти, во Святу́ю Тро́ицу ве́рующе, Отца́ и Сы́на и Свята́го Ду́ха, и в Пречи́стую Богоро́дицу, и во всех святы́х, да не то́кмо му́ки убежи́м, но и Ца́рства сподо́бимся. Потщи́мся бра́тие и ча́да блага́я уклони́тися от зла́го де́ла и лука́ваго, и сотвори́ти блага́я Христу́ Бо́гу на́шему, и име́ти к Нему́ ве́ру пра́вую от души́, и наде́жу и́стинну, ю́же име́шя пре́же пи́сании уго́ждьшии Бо́гу. Любо́вь же име́ти нелицеме́рну ко вся́кому христия́нину бе́зо льсти, и мир, зане́ вси есмы́ бра́тия по пло́ти. Долготерпе́ние и кро́тость, смире́ние, и покая́ние, испове́дание и ина́я дела́ блага́я. Вы́ше же всех ми́лостыню твори́те ко вся́кому, без го́рдости и без высокоу́мия и велича́ния, со благоволе́нием. Того́ ра́ди Бог бога́та и убо́га сотвори́, да препита́н бу́дет убо́гий от бога́таго, и спасе́тся бога́тый ми́лостыни ра́ди. Да вси изба́влени бу́дем от вели́ких бед и муче́ния, и услы́шим от Го́спода благослове́наго гла́са о́наго, прииди́те благослове́нии Отца́ Моего́, насле́дуйте угото́ванное вам Ца́рство небе́сное. Взалка́хбося и да́сте Ми я́сти. Возжада́х, и напои́сте Мя, стра́нен бых, и введо́сте Мя. Бо́лен бых, и посети́сте Мя. В темни́це бых, и приидо́сте ко Мне. А не сотво́ршим сих рече́т, отъиди́те от Мене́ про́клятии во огнь ве́чный, угото́ванный дия́волу и а́ггелом его́. [Того́ ра́ди приле́жно мо́лим Иису́са Христа́ Бо́га на́шего, да изба́вит ны от му́ки, и сподо́бит ны Ца́рства Своего́ небе́снаго. Ему́же сла́ва ны́не и при́сно и во ве́ки веко́в.|Да приле́жно о нас гре́шных мо́лит Пречи́стая Богоро́дица Влады́чица Го́спода Бо́га Спа́са на́шего Иису́с Христа́ да изба́вит ны от му́кы ве́чныя и дости́гнем десны́я страны́ моли́твами Пречи́стыя Влады́чицы на́шия Богоро́дицы при́сно Де́вы Мари́я, и святы́х апо́стол и всех святы́х Твои́х. Ами́нь.]