Стихи́:

Ше́ю Мефо́дию протя́гшу,

Спекула́тор отсече́, уби́в мече́м.

Сей блаже́нный, изде́тства себе́ возложи́в Бо́гу. Сосу́д че́стен и прия́телище Свята́го Ду́ха бысть, тем и жре́бием боже́ственым свяще́нству сподо́бися. До́бре же и боголюбе́зне пася́ше свое́ ста́до; словесы́ ти́хими просвети́ церко́вная исправле́ния. Тем и Ориге́нову пре́лесть востаю́щу ви́дев; я́ко добр па́стырь, огне́м боже́ственым словесы́ свои́ми попали́ и вся́ку мглу и мрак ерети́ческий истреби́в прему́дрыми словесы́ и боже́ственою благода́тию. Словеса́ же его́ я́ко мо́лния и ра́зуму труба́ по всей земли́ изы́де. Тем не терпя́ враг дерзнове́ния и трудо́в его́ вели́ких, вооружа́ет слуги́ к его́ уби́йству. О́нже пре́же муче́ния во умерщве́ние живоно́сное обле́кся, мече́м главу́ его́ отсеко́ша, и к лу́чшей жи́зни преложи́ся. Пе́рвее же служа́ А́гньцу Бо́жию, пото́м же пожре́ся Бо́гу же́ртва жи́ва. Тем и сугу́быми венцы́ украше́н быв, до́брый побо́рник по благоче́стию, зане́ кровьми́ му́ченическими кончи́ну прие́м.

Стихи́:

Аристокли́й рачи́тельный вои́стинну ору́жник,

Вся́ка бо приобре́те главе́ отсе́кшися:

Афана́сие обре́те безсме́ртие со Димитриа́ном, мече́м у́мер.

В сих у́бо святы́й му́ченик Аристокли́й бя́ше ро́дом ки́прянин, гра́да Тама́са, собо́рныя це́ркве презви́тер. Во времена́ же Максимиа́на царя́, шед в го́ру кры́яшеся в не́коем верте́пе. Убоя́вжеся належа́щаго гоне́ния, иде́же моля́ся, и све́том облиста́яся па́че со́лнца. И гла́су прише́дшу с небесе́, повелева́ющу ему́ ити́ в Соломи́нскую митропо́ль, и та́мо подвиза́тися. Иду́щу же по дубра́ве, до́йде в дом Варна́вы апо́стола, и обре́те та́мо Димитриа́на дия́кона, и Афана́сия четца́, и прия́т быв и́ми, и вину́ ше́ствия ра́ди по о́ному виде́нию оне́ма сказа́в. И прича́стники о́ною де́йствию нарица́ше, возжеле́нно Христа́ ра́ди хотя́щым умре́ти. Вше́дше же в не́который град, и на взо́рне и высо́це ме́сте тща́щеся ста́ти. И́хже ви́дев иге́мон, и призва́ их, и от них уве́дав я́ко христиа́ни суть, мече́м посещи́ веле́ Аристокли́я. Святу́ю же Димитриа́на и Афана́сия пребыва́ющу в ве́ре Христо́ве, по мно́гих му́ках огню́ преда́ти повеле́. Без стра́сти же в нем сохране́ни бы́ша. И посе́м повеле́ ею́ мече́м уби́ти и та́ко сконча́стася.

Стихи́:

Та́ко ни телесы́ и по земли́ па́дше о́ба,

Ду́шу омы́вше, на высоте́ небе́сней обита́сте.

Ти́и святи́и му́ченицы бе́ша от се́верския страны́, от земли́ ва́рварския, ученицы́ бы́вше Андре́я апо́стола. И мно́ги от ва́рвар обрати́ша на ве́ру Христо́ву от пре́лести куми́рския. И я́ти бы́ша и предста́ша кня́зю ва́рварскому, и мно́гими преще́нии и ласка́нии хотя́ше я́ прельсти́ти: но ти́и не покори́шася че́стем его́. Тем ве́ры ра́ди Христо́вы би́ша их без пощаде́ния. Зиме́ же су́щи вели́цей, река́м поме́рзшим, и по ле́ду могу́щим преходи́ти. И посреди́ реки́ поста́вльше на леду́ проста́я древеса́ утверже́на, и к ним святу́ю привяза́ша: ле́ду же у́бо прогиба́ющуся, и воде́ до вы́й их доше́дши, и та́ко святы́я своя́ душа́ преда́ша Го́сподеви: и́хже телеса́ тогда́ не́котории христия́не погребо́ша. Последи́ же епи́скоп возгре́б я́, и на свое́ ра́мо взем, во свое́й положи́ це́ркви. И по седми́ ле́тех муче́ния их яви́шася святи́и, и прину́диша епи́скопа пренести́ мо́щи их, в ме́сто нарица́емое Али́кс, и приста́нище су́хо су́ще. Мы же вре́мени не ве́дуще сконча́ния их, преложе́ние пра́зднуем, на сла́ву Бо́гу, и честь святы́м Его́ му́чеником.

Брат прии́м оби́ду от ино́го мни́ха и прии́де ко отцу́ Сисо́ю Фиве́янину, и рече́: «Доса́ду прия́х от е́тера бра́та, и хощу́ мсти́ти себе́». И моля́ше ста́рец, глаго́ля: «Ни, ча́до, оста́ви его́ па́че Бо́гови, да Той мстит тебе́». О́нже глаго́лаше: «Не оста́влю, а́ще не мщу себе́». Рече́же ста́рец: «Да помо́лимася бра́те к Бо́гу». И воста́в, рече́: «Бо́же, уже́ мы на Тя не упова́ем, да не пече́шися на́ми, ни мсти́ши оби́дящих нас, мы бо са́ми себе́ мща́ем». Се же слы́шав брат, паде́ на ногу́ ста́рца, глаго́ля: «Уже́ не сварю́ся с бра́том, и проще́ние пода́м ему́». И рече́ ста́рец: «Ими́ ми ве́ру ча́до, я́ко претерпе́вый доса́ду, без труда́ спасе́тся. А гне́ваяйся на бра́та своего́, всю свою́ доброде́тель погубля́ет, и раба́ себе́ дия́волу сотворя́ет».

Ста́рец не́кий живя́ше в да́льней пусты́ни. Име́яше же сро́дницу в ми́ре и мно́земи ле́ты вжеле́ ви́дети его́. Испыта́вши же о нем где живе́т. И вре́мя улучи́вши, взы́де в пусты́ню обре́тши камиларя́. Бе бо гони́ма бе́сом, и прии́де двере́м ке́лии ста́рца. И нача́ бесе́довати к нему́ глаго́лющи, я́ко сро́дница твоя́ есмь. И пребы́сть у него́ нощь еди́ну, и впаде́ ста́рец в блуд с не́ю. Бе же ин ста́рец отше́лник пребыва́я во о́ной стране́, и начерпа́я ча́шу воды́, и во вре́мя сне́ди его́ превраща́шеся ча́ша. По смотре́нию же Бо́жию глаго́ла к себе́, иду́ в пусты́ню и скажу́ сия́ ста́рцу. И воста́в по́йде. Ве́черу у́же бы́вшу. Но́щию же спа в це́ркви и́дольстей, и слы́ша в нощи́ бе́сы глаго́люща, я́ко в нощь сию́ поверго́хом в блуд мни́ха о́ного, и́мя ре́кше ему́. Слы́шав же се от бесо́в ста́рец и оскорби́ся. И прише́д к ста́рцу, и обре́те его́ уны́ла, и глаго́ла ему́, что сотворю́ о́тче, я́ко наполня́ю ча́шу воды́, и во вре́мя снеде́ния превраща́ется. И рече́ ему́ ста́рец, аз же что сотворю́, я́ко в нощь сию́ впадо́х в блуд. О́нже рече, и аз уве́дех о́тче. И вопроси́ его́, ка́ко уве́дел еси́. О́нже рече́, спя́щу ми в це́ркве и́дольстей, слы́шах бе́сы глаго́люща о тебе́. И рече́ ста́рец, се аз иду́ в мир. О́нже моля́ше и́ глаго́ля, ни о́тче, но пребыва́й на ме́сте свое́м, жену́ же отжени́ от себе́, сие́ бо искуше́ние бесо́вско есть. О́нже послу́шав его́ и пребы́сть в ке́лии свое́й, и держа́ пра́вило свое́. И по вся дни прилага́ше сле́зы к слеза́м, до́ндеже па́ки прии́де в пе́рвый свой чин.

Ча́дца моя́ возлю́бленная воспомина́йте коли́ко благ от всеми́лостиваго Бо́га прия́сте безсме́ртное и безпеча́лное житие́. За́вистию и пре́лестию дия́волею, не то́кмо изгна́ние прия́хом, но и сме́ртни бы́хом и досе́ле не престае́т ловя́, и прелща́я нас. Того́ ра́ди мы бра́тие ста́нем проти́вящеся ему́ наде́жею блага́го Бо́га. Де́ла бо о́ного на нас суть, е́же отврати́ти от ве́ры нас и наде́жи Бо́га на́шего и в неве́́рьство привести. И ктому́ не престае́т вся зла́я наводя́ на ны блуд, прелюбоде́йство, татбы́, уби́йство, пия́ньство, клевету́, за́висть, не́нависть, лихоима́ние, и ина́я зла́я де́ла. И чрез естество́, и про́чая. Я́же от Ада́ма и до Но́я. От Но́я же и до Авраа́ма, во идолослуже́ние и сребролю́бие, в волхвова́ние и чародея́ние введе́, и отучи́ от Бо́га жива́го. Да то се во ум и в се́рдце приводя́ще, блюди́теся от се́ти вра́жия, и о всех дел его́ злых, и потщи́теся уго́дна твори́ти, во Святу́ю Тро́ицу ве́рующе, Отца́ и Сы́на и Свята́го Ду́ха, и в Пречи́стую Богоро́дицу, и во всех святы́х, да не то́кмо му́ки убежи́м, но и Ца́рства сподо́бимся. Потщи́мся бра́тие и ча́да блага́я уклони́тися от зла́го де́ла и лука́ваго, и сотвори́ти блага́я Христу́ Бо́гу на́шему, и име́ти к Нему́ ве́ру пра́вую от души́, и наде́жу и́стинну, ю́же име́шя пре́же пи́сании уго́ждьшии Бо́гу. Любо́вь же име́ти нелицеме́рну ко вся́кому христия́нину бе́зо льсти, и мир, зане́ вси есмы́ бра́тия по пло́ти. Долготерпе́ние и кро́тость, смире́ние, и покая́ние, испове́дание и ина́я де́ла блага́я. Вы́ше же всех ми́лостыню твори́те ко вся́кому, без го́рдости и без высокоу́мия и велича́ния, со благоволе́нием. Того́ ра́ди Бог бога́та и убо́га сотвори́, да препита́н бу́дет убо́гий от бога́таго, и спасе́тся бога́тый ми́лостыни ра́ди. Да вси изба́влени бу́дем от вели́ких бед и муче́ния, и услы́шим от Го́спода благослове́наго гла́са о́наго, прииде́те благослове́нии Отца́ Моего́, насле́дуйте угото́ванное вам Ца́рство небе́сное. Взалка́хбося и да́сте Ми я́сти. Возжада́х, и напои́сте Мя, стра́нен бых, и введо́сте Мя. Бо́лен бых, и посети́сте Мя. В темни́це бых, и приидо́сте ко Мне. А не сотво́ршим сих рече́т, отъиди́те от Мене́ про́клятии во огнь ве́чный, угото́ванный дия́волу и а́ггелом его́. [Того́ ра́ди приле́жно мо́лим Иису́са Христа́ Бо́га на́шего, да изба́вит ны от му́ки, и сподо́бит ны Ца́рства Своего́ небе́снаго. Ему́же сла́ва ны́не и при́сно и во ве́ки веко́в.|Да приле́жно о нас гре́шных мо́лит Пречи́стая Богоро́дица Влады́чица Го́спода Бо́га Спа́са на́шего Иису́с Христа́ да изба́вит ны от му́кы ве́чныя и дости́гнем десны́я страны́ моли́твами Пречи́стыя Влады́чица на́шия Богоро́дицы при́сно Де́вы Мари́я, и святы́х апо́стол и всех святы́х Твои́х. Ами́нь.]