Свято́му ста́рцу иду́щу от Ро́ва (Ру́вы) ко Тро́стнику (Тростя́нику) Иорда́нову, сре́те и́ лев превели́к храмля́. И припа́д, каза́ше ему́ но́гу, и я́ко моля́ся получи́ти ему́ от ста́рца исцеле́ние. Оте́ц же наш Са́вва разуме́в льво́ву беду́ се́де, и за но́гу ем его́, и сук вонзе́ный изъя́ из ноги́. И облегча́в от боле́зни лев, и воста́в отъи́де. Отто́ле в мясопу́стныя дни во след ста́рца хожда́ше и служа́ше ему́. Имя́ше же тогда́ святы́й ста́рец ученика́ не́коего си́рина, и́менем Флавиа́на, иму́щу осля на слу́жбу его́: и посыла́ше на не́кое ору́дие ученика́ своего́ святы́й Са́вва, повелева́ше льву набде́ти осла́. Лев же по вся у́тра е́мля усты́ узду́, и весь день пася́ше, и к ве́черу напои́в привожда́ше. Мину́вшим же днем не́ким, и льву ту слу́жбу творя́щу, по́слан бысть на ору́дие Флавиа́н, и своего́ спасе́ния небре́г, или́ не́кым велича́нием объя́т впаде́ в блуд. И в ты́я дни лев осла́ сокруши́в изъя́сть и́. И се уве́дав Флавиа́н, разуме́в осло́во изъяде́ние су́ще от своего́ ему́ греха́, и отто́ле не сме яви́тися ста́рцу, но отча́явся зле творя́ше. И шед пребы́ в не́коей ве́си своего́ греха́ пла́чася. И оба́че святы́й ста́рец, Влады́чнее милосе́рдие подражая, не преоби́де его́, но мно́го взыска́в и обре́те и́. Благода́тию же Христовою наказа́в его́ и уте́шив и́, и от паде́ния возста́вив его́, затвори́ и́ еди́ного. И покая́вшуся все́ю душе́ю, и угоди́вшу Бо́гу по вели́ку. Ему́же сла́ва ны́не и при́сно и во ве́ки веко́в. Ами́нь.