Сия́ му́ченица бя́ше при Максимиа́не царе, во Еде́се гра́де Елла́дстем. Сочта́вшися не́коему Уале́рию иере́ю и́дольскому, и роди́ с ним три де́тища, Фео́гния, Ага́пия и Пи́ста, ихже питаше боже́ственым благоче́стием, и́бо та от прароди́телей ве́рна, и христиа́ныня бяше. Оклевета́на же бы́вши свои́м му́жем, предста́ с свои́ми детьми́ вика́рию анфипа́ту, и христиа́ну себе́ испове́давши. Та́же и два сы́на ея́ в темни́цу вве́ржена бы́ста. Фео́гний же пе́рвый сын ея́ пове́шен и стро́ган. Пото́м же изведе́н вторы́й сын ея́ и бие́н, ма́тери предстоя́щи, и крепя́щи того́ к подвиго́м и моля́щи его. Посе́м ко́жу главну́ю одра́ша, да́же и до пе́рсей, и ничто́же веща́я. Посе́м тре́тий изведе́н, и Христо́ву ве́ру испове́дав, и вся́кими искуше́н быв му́ками: А́бие трие́ ку́пно посе́чени бы́ша. Ма́ти же их в темни́цу вве́ржена, иде́же и пи́щу от руки́ а́нгеловы приемши укрепи́ся. Та́же изведена́, и повеле́нием вика́риевым в Македо́нию тому́ после́довавши, и та́мо пону́ждена пожре́ти, и не поко́ршися. Пе́рвее в во́ду вве́ржена бысть, та́же во огнь. И по сих ка́мением бие́на, и от всех невреди́ма пребы́сть. Та́же ведена́ в ка́пище и́дольское, и Ди́ево истука́нное прие́мши исте́рши, и на зе́млю пове́рже истончи́. Посе́м звере́м вдана́ бысть, и в мо́ре от су́ха три́десятим по́прищем вве́ржена. Тогда́ яви́ся ви́дящым издале́ча благолепне седящи, и с не́ю три му́жи па́че со́лнца сия́юще: И́же и мневше си́и ку́пно на престо́ле в корабли́ всади́вше. По осми́ же дний яви́ся во́ином в не́котором о́строве Еллиспо́нт нарица́емь. И се уве́дев в Македо́нии анфипа́т Филипп, не́коему тому́ пове́давшу писа́ к консула́рию Кизи́ческому, Еллиспо́нтския епа́рхии е́же я́ти ю́. И обре́т ю́ не покоря́ющуся е́же принести́ же́ртву и́долом, повеле́ о́пако ру́це ея́ связа́ти. Та́же удеса́ ея́ сокруши́ти, и потом главу́ ея́ отсещи́. И тому́ бы́вшу, в ру́це Богу дух свой предаде́.