Сей бяше от Едесскаго града, евреин родом. Изведав совершене божественая писания. Той взыде во Иерусалим поклонитися, во дни Иоанна Крестителя, и слышав проповедание его и ангельское житие, удивлья, крестися от него. Потом видев Христа, и несведомая от него соделоваемая чудеса, и учения Его слышав, последова Ему, даже и до спасеныя страсти. И по вознесении Его в свой град возвратися и местнаго князя Авгаря крестив. И изоставшую часть от проказы очистив, и многия ины крестив. В Месопотамию же шед, и тамо многия наказав и просветив, и церкви создав. Прехождаше грады Сирския. И пришед в Вирит град Финикийский, и тамо поучив, крести многих, почи о Господе.

Стихи́:

Еди́ны ма́тере трие́ добре́йшая де́ти,

С ма́терию Ва́ссою к посече́нию душа́ еди́ны.

Сия́ му́ченица бя́ше при Максимиа́не царе, во Еде́се гра́де Елла́дстем. Сочта́вшися не́коему Уале́рию иере́ю и́дольскому, и роди́ с ним три де́тища, Фео́гния, Ага́пия и Пи́ста, ихже питаше боже́ственым благоче́стием, и́бо та от прароди́телей ве́рна, и христиа́ныня бяше. Оклевета́на же бы́вши свои́м му́жем, предста́ с свои́ми детьми́ вика́рию анфипа́ту, и христиа́ну себе́ испове́давши. Та́же и два сы́на ея́ в темни́цу вве́ржена бы́ста. Фео́гний же пе́рвый сын ея́ пове́шен и стро́ган. Пото́м же изведе́н вторы́й сын ея́ и бие́н, ма́тери предстоя́щи, и крепя́щи того́ к подвиго́м и моля́щи его. Посе́м ко́жу главну́ю одра́ша, да́же и до пе́рсей, и ничто́же веща́я. Посе́м тре́тий изведе́н, и Христо́ву ве́ру испове́дав, и вся́кими искуше́н быв му́ками: А́бие трие́ ку́пно посе́чени бы́ша. Ма́ти же их в темни́цу вве́ржена, иде́же и пи́щу от руки́ а́нгеловы приемши укрепи́ся. Та́же изведена́, и повеле́нием вика́риевым в Македо́нию тому́ после́довавши, и та́мо пону́ждена пожре́ти, и не поко́ршися. Пе́рвее в во́ду вве́ржена бысть, та́же во огнь. И по сих ка́мением бие́на, и от всех невреди́ма пребы́сть. Та́же ведена́ в ка́пище и́дольское, и Ди́ево истука́нное прие́мши исте́рши, и на зе́млю пове́рже истончи́. Посе́м звере́м вдана́ бысть, и в мо́ре от су́ха три́десятим по́прищем вве́ржена. Тогда́ яви́ся ви́дящым издале́ча благолепне седящи, и с не́ю три му́жи па́че со́лнца сия́юще: И́же и мневше си́и ку́пно на престо́ле в корабли́ всади́вше. По осми́ же дний яви́ся во́ином в не́котором о́строве Еллиспо́нт нарица́емь. И се уве́дев в Македо́нии анфипа́т Филипп, не́коему тому́ пове́давшу писа́ к консула́рию Кизи́ческому, Еллиспо́нтския епа́рхии е́же я́ти ю́. И обре́т ю́ не покоря́ющуся е́же принести́ же́ртву и́долом, повеле́ о́пако ру́це ея́ связа́ти. Та́же удеса́ ея́ сокруши́ти, и потом главу́ ея́ отсещи́. И тому́ бы́вшу, в ру́це Богу дух свой предаде́.

Глаго́лаше не́кий от ста́рец вели́к, и да́рование име́я духо́вное: я́ко в нача́ле егда́ в сию́ страну́ приидо́х, в преслову́щий град Антиохи́ю вшед: И от мно́ги ве́ры подви́жен, всели́хся в вы́шних страна́х в верте́пе, и́же во святых Иоа́нна Златоу́стаго, я́ко хотя́ та́мо жи́ти. Человеколюби́вый же Бог хотя́й моему́ спасе́нию, во е́же убе́гнути собла́зн же и ла́яней, показа́ ми ца́рствующее, да си́це реку́ де́йство, и одержа́ща во всех живу́щих внутрь Антиохи́и. И ка́ко? Слы́ши: Ви́дех бо зве́ря я́ко зми́я вели́ка зело́, и все те́ло его́ раждеже́но и испо́лнено, окружа́я же и приплета́я весь град Антиохи́ю: и пояда́я всех от ма́ла же и до вели́ка несы́тне, му́жи же и жены́ и де́ти, иере́и и мона́хи: и себе убега́яй от снеде́ния его́. И сей бя́ше сластолю́бия бес, его́же аз ви́дев убоя́хся, и бе́гах вне гра́да. И зрю не́коего глаго́люща ми: до́бре твори́ши от зде́шних бе́гая, и восходя́ на го́ры: сам бо бес зде рече́ си́лу и́мать, а не на го́рах. Избе́гнув убо и приидо́х в го́ру во еди́н монасты́рь, и внеу́ду того обрето́х ка́мень надкло́ньшийся, и седо́х. Не бех же и еще́ нака́зан и́ноческому жи́тельству, и недоуме́ваяся у́бо в себе́ что сотворю. И прии́де ми си́цев по́мысл глаго́ля: вмени́ ны́не я́ко при апо́столех изнача́ла еси́ и ты, поищи́ у́бо и виждь что уча́т, и что пропове́дают а́постоли о спасе́нии челове́честем? Сия́ у́бо помы́слив, снидо́х во оби́тель, и проче́т четвероблагове́стник, избра́х от него́ о себе́ за́поведи Госпо́дни, и ноша́х в себ́е сия́ непреста́нно. И испе́рва у́бо соверше́ное име́х нестяжа́ние, я́коже ле́по есть мона́хом. Пото́м же всесоверше́ное и опа́сное по́стничество. И сия́ у́бо вели́кий сей ста́рец глаго́лаше о пе́рвем свое́м жи́тельстве: А о е́же по сих бы́вших стра́шных и вели́ких дарова́ниих и́хже прия́т, и открове́ниих, не подае́т вре́мя изрещи́, я́коже сам нам испове́да все свое́ пре́жнее жи́тельство: И́же и пи́щу прия́т от руки́ а́нгеловы, и друга́я стра́шна по вели́кому апо́столу, я́же не леть есть челове́ку глаго́лати. Сие́ же то́чию пону́дихомся ма́лое испове́дати, я́коже от него́ слы́шахом, служа́ще мы таково́му вели́кому ста́рцу, и в та́ковая стра́шная дости́г дарова́ния. Рече́м же зде па́ки о сих: Сей вели́кий ста́рец я́коже глаго́лаше, пре́жде да́же ми́ру прибли́житися ему́, и оби́тель соста́вити, имя́ше с собо́ю ученика́ живу́ща на еди́не в коли́бе: сам же той ста́рец осо́бне безмо́лвствуя, слы́шаше бесы вопию́ща и глаго́люща ре́чию си́це: я́ко стужи́хом си от сих мона́хом. И к сему́ ста́рцу я́ве я́ко прибли́житися не мо́жем, ко ученику́ же его́ ника́коже, зане́ разоря́ет и зи́ждет, и не обрета́ем его́ пра́здна. Сия́ бесом глаго́лющым. Свое́ у́бо позна́ старец я́ко су́щая в нем от Бо́га благодать бя́ше, отгоня́ющи и упражня́ющи бе́сы, и не можа́ху ему́ прибли́житися: О ученице́ же недоуме́яше что у́бо есть, е́же разоря́ет и зи́ждет: Ве́чер же ко ученику́ прише́д вопроша́ше и, ка́ко пребыва́ет? Он же отвеща́в рече́: до́бре о́тче. Ста́рец же испытова́ше его́ о уны́нии. Он же рече́ глаго́ля, [пе́рстом показу́я ка́мение,] сим ка́мением созида́ю сте́ны, и па́ки разоря́ю, и се творя́ не ощуща́ю уны́ния. Сия́ слы́шав вели́кий ста́рец, позна́ ко́ея ра́ди вины́ не можа́ху бе́си прибли́житися ему́, не обрета́ющее его́ никакоже пра́здна. Те́мже в ле́поту глаго́лаху: я́ко разоря́ет и зи́ждет. Сия́ све́дый старе́ц, благоусе́рдна творя́ше тогда́ ученика́ на та́ковое де́лание, Нам же глаго́лаше: я́ко ве́де ниже́ по́́льзу не́кую, или прибы́ток теле́сный имя́ше, или́ себе́, или иному, но за е́же не бы́ти пра́здну, не обрета́ху вре́мя нечи́стии беси соде́яти что в нем. Па́ки, та́коже творя́ше ины́м о́бразом ин ста́рец и́же во оте́честем: Ка́ко обре́т коли́бу тро́стяну, и сед плетя́ше плени́цу, и вмета́ше ю́ в реку́? И оба́че не прибы́тка, но труда́ ра́ди и безмо́лвия.