Преподо́бный оте́ц наш Вита́лий, бе от Ки́прскаго о́строва, в Тримуфи́и гра́де роди́ся. И доше́д в соверше́ный во́зраст, и бысть мних. И сотвори́ шестьдеся́т лет тружда́яся в ке́лии свята́го Спиридо́на. И посе́м и́де во Александри́ю, и нача́ та́ко жи́ти челове́ком на собла́зн. Не хотя́ше бо сла́вы име́ти себе́ на земли́, но наима́шеся на дневну́ю стра́ду, и по сре́бренику на день взима́ше, и изъяда́ше на еди́ну ме́дницу бо́бу. И заходя́щу со́лнцу, отхожда́ше в до́мы блудни́ц. И к еди́ней вла́зяше от них, дав ей сре́бреник из него́ же страда́ше день, и глаго́ла ей снабди́ся в сию́ нощь, и никого́ же от ю́ных не прие́мли. И вле́зши в храм, стоя́ше всю нощь близ ея́, в еди́ном угле́, поя́ Бо́гу и моля́ся за ню и до у́тра. И отходя́ше ста́рец заклина́я жену́, я́ко никому́же яви́ти дела́ его́. И та́ко по вся но́щи творя́ше. Еди́на же от них обличи́вши житие́ его́, я́ко не блуда́ ра́ди к нам вхо́дит мних сей, но спасе́ния ради. И се слы́шав Вита́лий помоли́ся Бо́гу, и возбеси́ся жена́, да и про́чии не сме́яху обличи́ти дел его́. Ини́и же глаго́лаху возбеси́вшейся, виждь я́ко не отда́ст ти Бог, поне́же солга́, я́ко не блуда́ ра́ди вхо́дит мних сей. И по вся дни укоря́юще глаго́лаху ему́, пойди́ у́же окая́нне, ждут тебе́ блудни́цы. И отвещава́я им, аз несмь ли пло́тен, я́коже и вси челове́цы. Или́ чернори́зцы еди́ны лиши́л Бог. Пои́стине и чернори́зцы челове́цы суть. Друзи́и же глаго́лаху ему́, у́же поими́ си еди́ну от них, и измени́ си мни́шеский о́браз, да не ху́лится тобо́ю. Он же я́ко се гне́ваяся глаго́лаше: "Не слу́шаю вас, что ми за добро́ жену́ поя́ти, да пеку́ся до́мом и сотворю́ злы дни. Почто́ мя су́дите, еда́ вам за мя отвеща́ти пред Бо́гом? Собо́ю пеци́теся, а мене́ оста́вите". И та́ко пожи́в, утаи́в, доброде́тель, и мно́ги блудни́цы спасе́. Егда́ же преста́вися, а́нгел рече́ возбеси́вшейся блудни́це, иди́ и прикосни́ся моще́м свята́го Вита́лия, да исцеле́еши. И ше́дши прикосну́ся ему́, и отбежа́ от нея́ бес. И мно́зи хроми́и и слепи́и исцеле́шя. И прише́д епи́скоп взя те́ло свята́го, и погребо́ша е че́стно со псалмы́ и пе́сньми. И просла́виша Бо́га да́вшаго ему́ такову́ю благода́ть и терпе́ние. Се же бра́тие и нам на поуче́ние, да не осужа́ем чернори́зцев о вся́ком гресе́.