Стихи́:

И Фео́дора, и ме́ртваго Фео́дора

Чудодей́ствовати дар от Бо́га ве́лий:

В два́десять вторы́й Сикео́ту о́чи смежи́шася.

Той нарица́шеся от ве́си Гала́тския, села́ нарица́емаго Сике́я, роди́вся во времена́ Иустиниа́на вели́каго. Мни́тся я́ко не име́ти похвалы́ сро́дствию нра́ва. Непло́дней бо су́щи ма́тери его́, лична́ бо бя́ше я́коже глаго́лют: Мари́я же и́мя ей, взо́ром и красото́ю мно́гою сия́ющи: я́ко привлещи́ не́коего Косму́ и́менем, ца́рскаго скороше́ственика, от него́же глаго́лют бы́ти свята́го. И́же и породи́ти его́ скры́вши ей, зане́же бя́ше сра́мотно и уко́рно. А́бие бо внегда́ сни́деся роди́вшая его́ му́жеви, в той нощи́ прилучи́ся ей сон ви́дети: звезде́ сше́дши и па́сти во утро́бу ея́, и́же и проявля́ше све́тлость отроча́те. Но тому́ не па́че вменя́ти такова́го, или́ ве́ровати не́когда сотво́ршемуся, в не́мже от пе́рваго во́зраста Бо́га возлюби́. И я́ко мне́тися ему́, е́же свято́му му́ченику Гео́ргию с ним сопребыва́ти и нака́зовати, и к лу́чшим приводи́тися жела́нием, и весьма́ приноси́ти ему́ боже́ственое и чу́дное не́которое раче́ние. Сей у́бо по ча́сти восхо́ду иды́й. Пе́рвее у́бо мни́шескому совменя́ется чи́ну, и архимандри́т поста́влен бысть. Та́же о и́хже подоба́ше е́же к соверше́ней доброде́тели ше́ствовати начина́ющим, и явле́ньми соверше́ныя доброде́тели к Бо́гу обетова́нию, чуде́сными обогати́вся соде́ловании, к вели́цей высоте́ архиере́йства возведе́н быв, Анаста́сию гра́ду вруче́н, иде́же мно́гих богоразу́мию наказа́в, и повсю́ду чудесы́ единому́дреники учреди́в: и я́коже подоба́ет твори́ти поучи́в, сви́точным и́менем преда́, всех уди́вль. Царе́м же и архиере́ом чу́ден я́влься и люби́м. И мно́гим проро́чествовав о сбы́вшихся. И отъи́де жития́ че́стне: ко а́нгелом пои́мшим ду́шу его́ ускла́бився. Глаго́лет же ся: я́ко пре́жде сконча́ния его́ вма́ле во сне ему́ предста́вшу сла́вному му́ченику Гео́ргию, подаю́щу ему́ тоя́г е́здя на коне́, и други́й водя́, нань же повеле́ ему́ все́сти, и ко она́мошнему ше́ствию, чуде́с ра́ди проявля́ющу. Соверша́етжеся собо́р его́ в муче́нии свята́го му́ченика Гео́ргия, су́щем в Девте́рии.